18. Əgə̀sə̀ Əloʔ ə Isrèl

Ngwʉ̀ʔsə nchoʔə li tà a kədɨ̀ŋ Devìd pfɨ, wàyn ə̀ wen ə Solomòn sə̀ dìʔ fòyn ə̀ Isrèl. Nyìngòŋ ə̀ mbə̀mə̀ li à Solomòn la ghə̀ kòŋ la yì ku ghɔ̀ a wen lɔ. Solomòn ə̀ ngàʔə̀ la Nyìngòŋ ku ətof yì soʔ viʔi ə wen a nkàyn. Kənyʉ̀ əkyikə mbòŋə̀ li a Nyìngòŋ ghə̀ ku ətof a Solomòn ə̀ chò noʔə̀ viʔ vətsèm a mbyi. Solomòn ə̀ ndìʔ noʔə̀ fòyn ətofə, Nyìngòŋ bɛ̀ bwaʔsə ə wen nə̀ əghoʔə.

Solomòn ə̀ mbwom li əngə̀ŋ ə̀ Nyìngòŋ yì a Jèlusalèm a tiʔ ə wen ə Devìd ə̀ mpfɨtə əfo ə bwom li. Viʔi mə̀ sə̀ kuʔsə Nyìngòŋ tsu kèn la və bɛ̀ djʉ̀ a kəshi yi a Musìs ə mbwomə̀ lì. Nyìngòŋ ə̀ nviə li ə̀ sə̀ dìʔ a əngə̀ŋ ayì, tsiə tsu wenə̀ viʔi wen.

Solomòn ə̀ nkòŋə̀ kyìʔi ətɨm ə kəjàŋ. Ghə̀ ə nto li kəchʉ à Nyìngòŋ ə̀ làm kyìʔi tà a kədɨ̀ŋ, kwensə̀ djʉ̀ə̀ nkam! Nghoʔə̀ kyìʔi avyi nlùə̀ fa ətɨm ə kəjàŋ, ə̀ sə nvìə̀ ə̀ vì nə̀ vənyìngòŋ və vəwenə ə̀ vì ə̀ sə̀ kuʔsə. Solomòn ə̀ nlaʔtə li ə̀ zìtə̀ sə̀ kuʔsə vənyìngòŋ və kyìʔi wen avyi.

Tin ə̀ Nyìngòŋ ə̀ mfwi li à Solomòn, Nyìngòŋ wʉ la yì a lòʔ Solomòn a wen ə mbyɨsə. Ghə̀ wʉ la Solomòn ə̀ lu pfɨ̀ yì gə̀sə̀ əloʔ ə Isrèl aghayn abò.

Solomòn ə̀ mpfɨ li wàyn ə wùlɨm ə wen ə Lèhobàm, sə̀ dìʔ fòyn. Lèhobàm ə̀ ndìʔ kənkoyn. Viʔi Isrèl ə ntsèntə̀ li noʔə̀ vətsèm ə̀ ghàʔ ə wen a fòyn. Vəwenə ndìə̀ li à Lèhobàm la Solomòn ə̀ nnè li vəwenə shyèʔ noʔə̀ nànto ə̀ bɛ lòʔ kənzì ə̀ chò.

Lèhobàm ə̀ ngàʔə̀ li à vəwenə a nə̀ kənkoyn kə la, “Ghə̀ŋ ə kwòʔə̀ la tiʔ ə ghom ə Solomòn ə̀ nnèə̀ li ghə̀ŋ shyèʔ noʔə̀ nànto, mà ə nə̀ ə ghə̀ŋ shyèʔ ə̀ tsò fa lì, ə bɛ ku ngəʔ à ghə̀ŋ ə chò tiʔ ə ghom.”

Ntə̀ʔsə Isrèl əwum sə mfwisə li tyin à Lèhobàm ə̀ sayn əloʔ ə vəwenə. A mfaŋ tà ntə̀ʔ sə̀bò à wen ə bàm. Ntə̀ʔ asèn sə̀bò sə ntsèntə̀ li ə̀ sə̀ dìʔ əloʔ ə Judà.

Ntə̀ʔ shisə əwum a sə mfwisə tyin à Lèhobàm lì ntsuʔ li Jèhobàm la ghə̀ ə ndìʔ fòyn ə̀ vəwenə. Vəwenə ntsèntə̀ li ə̀ lam fa shə ə gə̀ ə̀ kwì ə̀ dzàŋ əloʔ ə vəwenə la Isrèl.

Jelobàm ə̀ nto li kəchʉ à Nyìngòŋ ə̀ nè viʔi Judà ə nè mbyɨ à Nyìngòŋ. Ghə̀ ə mbwom li vənyìngòŋ vəbò la viʔi nkuʔsə kə vəwenə bɛ kuʔsə Nyìngòŋ a əngə̀ŋ ə̀ Nyìngòŋ yì a ghə̀ ndìʔ a əloʔ ə Judà lì.

Əloʔ ə Isrèl nə̀ əloʔ ə Judà ə̀ ndìʔ tà nə̀ kəbàyn kə, laʔtə sonə tà sonə.

A ndìʔ a əloʔ ə Isrèl ə fi ghə yi, noʔə̀ təfòyn tətsèm tə mbyɨfə. A nzwhi viʔi Isrèl vətsenə və a və nkəŋə ndìʔ fòyn ə̀ zhwi ə nghoʔə̀ təfòyn tə Isrèl.

Təfòyn tə Isrèl noʔə̀ tətsèm nə̀ nghoʔə̀ viʔi Isrèl nkuʔsə̀ vənyìngòŋ və kəjàŋ. Vəwenə ə̀ nku tɛ̀ vunə vəwenə à vənyìngòŋ, viʔi bɛ tsi wənə̀ vətsenə və tà a mpfen.

Təfòyn tə Judà tə ndìʔ fa nòyn ə̀ Devìd. Vəwenə vətsenə və ndìʔ tefòyn tə juŋə tə ə̀ soʔə viʔi noʔə̀ nkàyn bɛ kuʔsə̀ Nyìngòŋ. A lì nghoʔə̀ tə̀fòyn tə Judà tə ndìʔ viʔi nkùf dìʔ viʔi vəbyɨfəvə bɛ kuʔsə vənyìngòŋ və kəjàŋ. Təfòyn tətsen atyìtə nku li vunə vəwenə à vənyìngòŋ. Nghoʔə viʔi Judà nto li kəchʉ à Nyìngòŋ ə̀ sə̀ kuʔsə vənyìngòŋ və kəjàŋ.

Fətitì fa nwàʔlə̀ ə̀ Nyìngòŋ//: 1 Kiŋs 1-6; 11-12//