38. Və Mbaʔlə Yesù

Vəju ə̀ zhɨə kətsi kə ghoʔə kyì a və nzaʔsə aloʔ ə vəwenə noʔə̀ ngwʉ̀ʔsə̀ tsèm. Vəwenə nsaŋlə kwòʔtə̀ kətsi a Nyìngòŋ ə̀ nshìsə̀ vəwenə fa əloʔ ə Igyìb. Ngwʉ̀ʔsə nchòə̀ li ə zaʔə sətaʔ fa əchʉʔ a Yesù nzìtə̀ ə̀ sə̀ ziʔi viʔi, Yesù gàʔ à ndzɨ̀mtə̀sə wen la vəwenə djʉ̀ ə̀ zhɨ kətsi kə ghoʔə akyì a Jèlusalèm. Ghə̀ bɛ̀ gàʔ la və a zhwi wen tsu

Əzhiʔ ə ndzɨ̀mtə̀ ə̀ Yesù ətsen ndìʔ Judàs. Judàs ə̀ ndìʔ wìʔ a ghə̀ nwʉə əko, a lì bɛ kòŋə̀ ə ntsoŋtə əko fà vəwenə kəmbò byì àndə ghə̀ nkòŋə̀ əko nànto. Yesù wenə ndzɨ̀mtə̀ sə wen sə nkwen li a Jèlusalèm, Judàs djʉ̀ a əchʉ əchʉ ə Vəju ə gàʔ la yì a baʔlə Yesù. Ghə̀ ə nkɨ li la əchʉ əchʉ ə Vəju avyi nkoə byɨmə la Yesù dìʔ Mèzayà. Ghə̀ ə nkɨ li la vəwenə nkəŋə jì ə zhwi ə wen.

Əchʉ əchʉ ə Vəju avyi, nloʔə̀ li Judàs flaŋ məwum ə̀ ntaʔ ti ghə̀ baʔlə Yesù à vəwenə. Wokèn kə njèʔə̀ tà a jì a nshə̀ʔtə̀ Nyìngòŋ ə̀ ngàʔə̀. Judàs ə̀ mbyɨmə li, ə̀ shi əko ayi, ə̀ djʉ̀. Ghə̀ mə̀ zìtə̀ ə̀ sə̀ kəŋə jì a ghə a nə̀ ə və ghaʔ Yesù.

Yesù ə̀ nzhɨ li kətsi kəghoʔ kə wenə̀ ndzɨmtə̀sə wen a Jèlusalèm. Vəwenə nwʉʔmə li ə zhɨ, Yesù nkwàʔə̀ li kəbayn kə mənkalə̀ ə̀ gàʔ, “Ghə̀ŋ ghaʔ. A dìʔ ə njò əwen ə̀ mò lə̀, a mà ku à ghə̀ŋ. Ghə̀ŋ ə nnèə̀ tà a lə̀ kwòʔtə̀ mò.” A dìʔ jì a Yesù nshə̀ʔtə̀ à vəwenə la və ne zhwi wen byì viʔi

Yesù ə̀ tsòʔsə̀ ndoŋ ə̀ gàʔ, “Ghə̀ŋ nyʉ mèn. A dìʔ mənlyuŋ ə́ mwomə̀ à mà kuə a məkàyn mə mfimə̀ ə shʉ̀ ə mbyɨsə viʔi. Ghə̀ŋ ə nnèə̀ tà a lə̀ nyʉə noʔə̀ mənzhʉ əntsèm kwòʔtə̀ mò.”

Yesù gàʔ à ndzɨmtə̀sə wen, “Wìʔ fà ghə̀ŋ ə ne baʔlə mò.” Kənyʉ̀ əkyikə ghoʔə ndzɨmtə̀sə Yesù, sə bə̀m la a ne nè ndə wokèn kənyʉ̀ à? Yesù gàʔ, “A dìʔ wìʔ a wìʔ a mà a ku kəntə̀mə kə kəbayn kə mənkalə̀ kèn a wen.” Ghə̀ ku a Judàs.

Judàs ə̀ nshi li kəntə̀mə kə kəbayn kə mənkalə̀ akyì Satàyn kwen à wen əwen ghə̀ lù djʉ̀ ə gyàmtə̀ əchʉ əchʉ ə Vəju vyi ə və ghaʔ Yesù. A ndìʔ nə̀nchʉʔə.

Yesù wenə̀ ndzɨmtə̀sə wen sə zhɨ ə̀ mè, ə̀ jèʔ ə̀ djʉ̀ a pfen ə̀ Olif. Yesù gàʔ, “Ghə̀ŋ ə ne chen mò layn. Kə dìʔ a nwàʔlə̀ Nyìngòŋ la, ‘Mà ə lu ghaʔə ntsɨ̀ŋ ə byisə sàskə̀.’”

Bità bwìnsə̀ gàʔ, “kòŋ viʔi kye wù noʔə̀ vətsèm, kò mà kye!” Yesù gàʔ a Bità, “Satàyn ə̀ kəŋə kiʔi ghə̀ŋ noʔə̀ vətsèm, a lì mà ə jɨ̀mə̀ li à wù ə Bità, la əbyɨmə ə wù to kə wù à fəŋ. Tɛ̀ a lì mimbu nkəʔ nè sə toŋ a ghayn à taʔ nənchʉʔə ə layn, wù ə ne tensə la wù ə ko kɨ mò.”

Bità gàʔ a Yesù, “A dìʔ tɛ̀ la mà a pfɨ kò mà lù chen wù!” ndzɨmtə̀sə wen noʔə̀ sətsèm sə gàʔ ta lì.

Yesù mə̀ djʉ̀ wenə̀ ndzɨmtə̀sə wen a kəshi və dzàŋə̀ nə̀ Gètsemanì. Yesù gàʔ à ndzɨmtə̀sə wen la vəwenə njɨ̀mə̀ la kə vəwenə à fəŋ a mwòmsə̀. Yesù mə̀ djʉ̀ ə jìm tà wen.

Yesù jɨ̀m à ghayn à taʔ, “Tìʔ ə̀ ghom, shi ndoŋ yèn fà mò a əzhʉ a jì dìʔə̀. Jì dìʔ kə ndìʔ wù ə nèə a jì a wù kòŋə̀.” Kənyʉ̀ akèn kə̀ nlɨ̀mə̀ a əwen ə Yesù ghə̀ zhʉʔsə mənlyuŋ shiʔə . Nyìngòŋ ə̀ ntɨm li ntsɨ̀ŋ ə̀ əngə̀ŋ ə wen la ghə̀ vi ə̀ ku ətyɨm ə to ghə a Yesù.

Yesù ə̀ mmyètə̀ jɨ̀mə̀ noʔə̀ əzhʉ kɔ̀ ghə̀ bwìnə̀ vì ə lyeə ndzɨmtə̀sə wen. Noʔə̀ zɛnə a ghə̀ nvì, vəwenə bɨnə tà bɨnə. Ghə̀ bwìnə̀ vì a mənzhʉ ntaʔ ə̀ gàʔ, “Ghə̀ŋ lùkə! Wìʔ yì ə vì li ə baʔlə̀ mò.”

Judàs ə̀ nvìə̀ li wenə̀ əchʉ əchʉ ə Vəju vyi, bɛ̀nə̀ Vəsugèʔ, nə̀ ngwàʔ ə̀ wìʔ. Vəwenə nvìə̀ nə̀ nyisə nə̀ mənyì. Judàs vì a Yesù ə̀ gàʔ, “Mà toŋtə a Njìʔsə̀,” ə̀ ghaʔtə ə wen. A dìʔ jì a ghə̀ njìʔə̀ wìʔ a əchʉ əchʉ ə Vəju vi ə və ghaʔ. Yesù bə̀m, “Judàs, wù ghaʔtə mò à mə dìʔ jì a wù baʔlə mò a?”

Vəsugèʔ avyi ghaʔ Yesù, Bità tsuʔ fənyì fəwen ə tyin kətiʔətiʔə kə sugèʔ ə tsen. Yesù gàʔ, “Bwìnsə̀ wye fənyì fyì! Mà zì mà gàʔ Nyìngòŋ tɨm ə ntsɨ̀ŋsə ngə̀ŋ ə̀ wen sə vì gyàmtə̀ mò. A lì mà dìʔ ə zhʉ Tìʔ ə ghom” Yesù bwìnsə̀ baʔsə kə̀tiʔitiʔi kə wutsen. Və nghaʔ li Yesù tà ghaʔə, ndzɨ̀mtə̀sə wen noʔə̀ sə̀ tsèm sə nyɨŋkə.

Fətitì fa nwàʔlə̀ ə̀ Nyìngòŋ//: Machò 26:14-56; Mak 14:10-50; Luk 22:1-53; Jon 12:6; 18:1-11//