11. Zaʔsə Aloʔ
Nyìngòŋ ə̀ ngàʔə̀ li a Ferò la sətsèn ghə̀ dìʔ kɛ kye vunə Isrèl ə və djʉ̀, yì à zhwi mbìsə vunə lyʉmə nə̀ mbìsə vunə nyamsə ə viʔi Igyìb. Ferò zhʉ ə̀ bɛ̀ chən la yì ə ko a ne kənyʉ̀ a Nyìngòŋ yì gàʔə̀.
Nyìngòŋ ə̀ nkəŋ li jì ə bwòŋsə̀ mbìsə vunə lyʉmə ə viʔi a və mbyɨmə a wen. Noʔə̀ viʔi kəbəŋ kəkɔ̀ ndìʔ sì ə ngəs ə̀ byìnjɨ̀ ə zhwi.
Nyìngòŋ ə̀ ngàʔə̀ li a vunə Isrèl la vəwenə zuʔ fa mənlyuŋ mə byìnjɨ̀ a kwì əchʉ əngə̀ŋ ə̀ vəwenə, ə̀ nyùʔ byìnjɨ̀ ayì ə̀ zàŋsə̀ pfiʔ nə̀ kəbayn kə mənkalə̀ a və ko nə̀ kə nkuʔ. Ghə̀ bɛ̀ gàʔ la vəwenə baʔtə əfo ə vəwenə ndìʔ tà a jì a əzhʉ a vəwenə myètə̀ ə̀ zhɨ.
Vunə Isrèl ə nnè li tà a jì a Nyìngòŋ ngàʔə̀ à vəwenə. A sə̀ ndìʔ a ntìntìn ə̀ nə̀nchʉʔə Nyìngòŋ jèʔ fa chì ə Igyìb ə̀ zhwilə mbìsə vunə viʔi Igyìb.
Nyìngòŋ ə̀ nzaʔsə li aloʔ ə vunə Isrèl noʔə̀ atsèm fambu a mənlyuŋ ndìʔ à yì ə təchʉ̀. Viʔi a və ndìʔ à tinsə aloʔ ashìsə mbwòŋə̀ li. Vəwenə mbwòŋə̀ byì mənlyuŋ mə byìnjɨ̀ myì.
Nyìngòŋ ə̀ nkwen li a aloʔ ə viʔi Igyìb ə zhwi li mbìsə vunə ə vəwenə noʔə̀ vətsèm byì tà àndə viʔi Igyìb ə nko byɨmə a wen kèn la vəwenə nwʉə təsoʔ tə wen.
Mbìsə vunə ə viʔi Igyìb noʔə̀ vətsèm sə mpfɨkə li, ə zì fa mbì wàyn ə wìʔ a ghə̀ dìʔ a mfɨŋ ə djʉ̀ ə zaʔə a mbì wàyn ə Ferò. Əloʔ ə Igyìb noʔə̀ ətsèm ə ndìʔ a dì əpfƗ.
Ferò ə̀ ndzàŋə̀ li Musìs wenə̀ Aròn tà nə̀nchʉʔə ayì ə̀ gàʔ à vəwenə, “Ghə̀ŋ lyɨ vunə Isrèl venə ə̀ lù fa əloʔ ə Igyìb tà luwèn!” Viʔi Igyìb ə nsensə li vunə Isrèl la vəwenə djʉ̀ tà a əzhʉ ayì.
Fətitì fa nwàʔlə̀ ə̀ Nyìngòŋ//: Eksedòs 11:1-12:32//