47. Pɔ nə Salàs a Filìba

Andə Sɔ ə̀ njèʔə̀ fa əloʔ ə Romàyn, və zìtə̀ sə̀ dzàŋə̀ wen a wen əzhiʔ ə Romàyn, “Pɔ.” Kətsi kətsen, Pɔ wenə̀ wùndoŋ ə wenə Salàs djʉ̀ a kətɨm kə Filìpa ə gàʔ byì Yesù. Vəwenə djʉ̀ a wen a muʔu a viʔi ntsèntə̀ tsu jɨ̀mə̀. Vəwenə nkwetə li wùwì ətsen tsu əzhiʔ ə wenə dìʔ Lidyà. A ndìʔ wù mbàʔ ə̀ nkùm. Ghə̀ nkòŋə̀ Nyìngòŋ kuʔsə̀ wen.

Nyìngòŋ ə mbwaʔsə li ətyɨm ə Lidyà’s ghə̀ byɨmə kənyʉ̀ kə Nyìngòŋ, ə̀ shi muʔu wenə̀ ngwàʔ ə̀ wen. Ghə̀ ə ndzàŋə̀ li Pɔ wenə̀ Salàs la vəwenə vì ə̀ tsi à wenə əngə̀ŋ, vəwenə və ə̀ tsi tsu.

Pɔ wenə̀ Salàs nkɨə djʉ̀ ə̀ bùmtə̀ viʔi a kəshi kə jɨ̀m kyì. Noʔə̀ zenə a vəwenə njèʔə̀ djʉ̀ə̀ tsu, wàyn ə wùwì kəkòs ətsen nə̀ zhɨ a wen əbə̀m ə̀ ndzɨ̀mtə̀ vəwenə. Zhɨ ayì ngyàmtə̀ wen ghə̀ shəŋə fənyoʔ shə̀ʔtə̀ ənyʉ̀ a viʔi a və lu fʉ̀ à vəwenə. Ghə̀ nshèʔə̀ kədɨ̀ŋ kə əko a masà ə wen.

Wàyn ə wùwì kəkòs ayì nzɨmə tà àndə vəwenə njèʔə̀ chòə̀, “Viʔ vənə dìʔ vyi əshyèʔ ə̀ Nyìngòŋ a ghə̀ dìʔ a əkaŋ. Vəwenə shə̀ʔtə̀ jì ə ghə̀ŋ bwoŋ fa tsu!” Ghə̀ ngàʔə̀ tà a lə̀ noʔə̀ mənzhʉ ə̀ntsèm, kənyʉ̀ əkyikə kaʔ ə̀ zaf Pɔ.

Kətsi kətsen ke wàyn ə wùwì kəkòs ayì zìtə̀ ə̀ sə̀ zɨmə, Pɔ kaʔkə a wen ə̀ gàʔ a zhɨ ayì, “A əzhiʔ nə̀ Yesù, fʉ̀ə̀ fa wen əwen.” Zhɨ ayì mfʉ̀ə̀ li tà a əzhʉ ayì.

Kə nzaf li viʔi a və̀ nkiʔə̀ wàyn ə wùwì kəkòs ayì! Vəwenə nkɨ li la zhɨ ayì dìʔ kɛ ndìʔ kɔ̀ wàyn ə wùwì kəkòs ayì à shəŋ fənyoʔ a viʔi. Ghə̀ dìʔ kə bɛ shəŋ fənyoʔ ko əko bɛ a ndìʔ ə̀ ghə̀ ku a viʔi a və nkiʔə wen.

Viʔi a və nkiʔə wàyn ə wùwì kəkòs ayì mə̀ ghàʔ Pɔ wenə̀ Salàs ə djʉ̀ à əchʉ əchʉ ə Romàyn, və ghòm vəwenə ə̀ wye vəwenə a mfɨŋ.

Vəwenə nwye Pɔ wenə̀ Salàs noʔə̀ kəshi a vəwenə ko zì və fʉ̀ə̀ ə̀ bɛ̀ kwiʔ afwin ə vəwenə noʔə̀ nkayn. A sə ndìʔ a ntìntìn ə̀ nə̀nchʉʔə, Pɔ wenə̀ Salàs zìtə̀ sə̀ zhɨmə ndzàŋsə kuʔsə Nyìngòŋ.

A sə laʔtə əshi nɨ̀ʔ noʔə̀ nànto! Təchʉ tə mfɨŋ tə bòʔmə̀ noʔə̀ tətsèm, mpfɨ̀sə a və nkwiʔ vəwenə tsu sə tyinkə noʔə̀ sətsèm.

Wìʔ a ghə̀ ntsɨ̀ŋə̀ mfɨŋ kɨ̀blə̀. Ghə̀ yen la təchʉ tə mfɨŋ tə dìʔ təboʔə ghə̀ fwàyn! Ghə̀ nkwòʔə̀ la viʔi nyɨŋkə li noʔə̀ vətsèm fa mfɨŋ, ghə̀ sə̀ kəŋə djʉ̀ ə zhwi əwen ə wen. (Ghə̀ ə nkɨ li la sətsèn yì kye viʔi nyɨŋkə fa mfɨŋ əchʉ əchʉ əloʔ Romàyn à zhwiə yì.) Pɔ nyen li wen ə̀ zɨmə, “Kə mwòm! Kə a zhwi əwen ə wù. Yès dìʔ a shə̀ tà vətsèm.”

Ntsɨŋ ə̀ mfɨŋ ayì mfwànə̀ li ə̀ nyɨŋ ə̀ vì a Pɔ wenə̀ Salàs ə̀ bə̀m, “Mà nè ghɔ̀ ti bwòŋ a?” Pɔ gàʔ a wen, “Byɨmə a Yesù, Masà, wù bɛ̀nə̀ ngwàʔə̀ əngə̀ŋ ə̀ wù à bwòŋ.” Ntsɨŋ ə̀ mfɨŋ ayì lyɨ̀ Pɔ wenə̀ Salàs ə̀ djʉ̀ a wenə̀ gə̀ ə̀ shʉ̀ təfɨŋ tə vəwenə. Pɔ ngàʔə̀ li byì Yesù a viʔi a və ndìʔ a wenə kəbəŋ noʔə̀ vətsèm.

Ntsɨŋ ə̀ mfɨŋ ayì wenə̀ ngwàʔə̀ əngə̀ŋ ə̀ wen ə byɨmə li a Yesù ə̀ shi muʔu. Ntsɨŋ ə̀ mfɨŋ ayì bɛ̀ ku əfozhɨvə a Pɔ wenə̀ Salàs vəwenə zhɨ ə̀ saŋlə a mwuʔu.

Əchʉʔ ə nlayn li və shìsə̀ Pɔ wenə̀ Salàs fa mfɨŋ ə̀ gàʔ à vəwenə la vəwenə djʉ̀ fa Filìpa. Pɔ wenə̀ Salàs djʉ̀ ə̀ ghayntə Lidyà bɛ̀nə̀ viʔi ndoŋsə ə̀ vəwenə vətsenə və ə̀ mə̀ djʉ̀ la Filìpa. Kənyʉ̀ kə Nyìngòŋ kə ndjʉ̀ tà nə̀ mbì viʔ və byɨmə ghoʔtə djʉ̀ tà djʉ̀ə.

Pɔ wenə̀ əchʉ ə chʉ ə viʔ vəbyɨmə vətsenə və nghayntə li əshi tà a kədɨ̀ŋ, shə̀ʔtə̀ djʉ̀ə̀ byì Yesù bɛ ziʔi əgàʔ ə Nyìngòŋ. Pɔ ə nyoʔə li vənwàʔlə̀ à viʔ vəbyɨmə və ta əshi a əshi ə tomsə vəwenə à vəwenə əbyɨmə. Nghoʔ ə̀ vənwàʔlə̀ avyi dìʔ a Babə̀lə̀.

Fətitì fa nwàʔlə̀ ə̀ Nyìngòŋ//: Aks 16:11-40//