48. Yesù Dìʔə Mbwòŋsə̀ a Nyìngòŋ ə̀ Ntɨmə̀

Nyìngòŋ ə̀ nshìtə̀ ə mbyi ghə̀ bòŋ, əfo ətsèm ə dìʔ tà a nkàyn. Mbyɨ ə nko dìʔ bwen. Adàm wenə̀ If nkòŋə̀ təwen tə vəwenə, bɛ kòŋə̀ Nyìngòŋ. Əkwaʔə wenə̀ əpfɨ nko dìʔ. A dìʔ jì a Nyìngòŋ nkəŋə la mbyi ndìʔ fa tsu.

Satàyn vì a nə̀ zhù ə̀ vì lobtə If. Wenə̀ Adàm to kəchʉ à Nyìngòŋ. Tà àndə vəwenə nto kəchʉ ə̀ nè mbyɨ li, noʔə̀ viʔ vətsèm a mbyi sə kwaʔkə bɛ pfɨkə.

Byì àndə Adàm wenə̀ If nnèə mbyɨ lì, ngəʔ ə ghoʔə sə̀ dìʔ. Vəwenə nsə̀ dìʔ viʔi ə kəbàyn ə̀ Nyìngòŋ. Kə nè la fa əchʉʔ ayì, və bwi noʔə̀ ndə̀ tà nə̀ mbyɨ ghə̀ dìʔ tà wù kəbàyn ə̀ Nyìngòŋ. Mbyɨ ə mbyɨfsə li jì a Nyìngòŋ ə̀ nkòŋə̀ ntsi fa tsu wenə̀ viʔi. Nyìngòŋ ə̀ nkəŋ li jì ə bwìnsə̀ nè la wenə̀ viʔi ndìʔ a nkàyn.

Nyìngòŋ ə̀ nwʉ li la wù əngə̀ŋ ə If ətsen ə lu sàstə̀ kəchʉ kə Satàyn, Satàyn ə lu lɨm ə̀ bàm əfwin ə̀ wen. Wokèn kə ndìʔ la Satàyn ə lu zhwi Mèzayà, ə Nyìngòŋ bɛ lùsə̀ ə wen fa əpfɨ, Mèzayà lu fa əpfɨ ə̀ mə̀ zhɨ Satàyn. Ngwʉ̀sə nchòə̀ li tà a kədɨ̀ŋ, Nyìngòŋ jìʔ la Yesù dìʔ Mèzayà ayì.

Nyìngòŋ ə̀ mbɨsə mbyi nə̀ muʔu li ə̀ ku kəbaŋ la kə bwòŋsə̀ viʔi a və mbyɨmə a wen. Kə jìʔə̀ la noʔə̀ ndə̀ dìʔ ə yenə ngəʔ byì mbyɨsə wen, a lì Nyìngòŋ tɨm Yesù la ghə̀ vì gyàmtə̀ ə̀ bwòŋsə̀ viʔi a və a byɨmə a wen.

A chì ngwʉ̀ʔsə təghɨ təkàʔ (400), nshə̀ʔtə̀ sə əngə̀ŋ ə̀ Nyìngòŋ sə nkuə kəku a Nyìngòŋ byì mbyɨsə viʔi. A lì kəku akyìkə nko shʉ̀ə̀ mbyɨsə viʔi bwen. Yesù dìʔ noʔə̀ kəchʉ kə nshə̀ʔtə̀sə əngə̀ŋ ə̀ Nyìngòŋ. Ghə̀ ə nku li əwen ə wen a nə̀ kəku a kə a shʉ̀ə̀ mbyɨsə viʔi a kwì ə mbyi. Yesù ndìʔ ə nges ə̀ kəchʉ kə nshə̀ʔtə̀sə əngə̀ŋ ə̀ Nyìngòŋ byì fàmbu a ghə̀ mbyèʔə̀ noʔə̀ mbyɨ a viʔi nnèə̀ li bɛ̀nə̀ shìsə a və lu nè.

Nyìngòŋ ə̀ ngàʔə̀ li a Abàham, “Mà ə lu chò fà wù ə bwaʔsə mbyi yèn noʔə̀ ətsèm.” Yesù ndìʔ wù ngwàʔ ə̀ Abàham. Nyìngòŋ ə bwaʔsə li mbyi yèn noʔə̀ ətsèm ə chò fa wen, byì àndə Nyìngòŋ ə lyèsə̀ ku noʔə̀ ndə̀ a ghə̀ byɨmə a Yesù, ghə̀ ə mə̀ sə dìʔ wù ngwàʔ ə̀ Abàham a kəzhwì.

A ndìʔ tà àndə Nyìngòŋ ə ngàʔə̀ a Abàham la ghə̀ ku wàyn ə̀ wen ə Azìk, a nə̀ kəku kə lì, Nyìngòŋ ə nku li byìnjɨ̀ a wen la ghə̀ zhwi ə̀ kye Azìk. Vəghəŋ vətsèm dìʔə pfɨ byì mbyɨsə vəghəŋ! A lì Nyìngòŋ ə nku Yesù, byìnjɨ̀ ə̀ Nyìngòŋ, a nə̀ kəku ə ghə̀ pfɨ à vəghəŋ ə kəshi.

A ndìʔ tà àndə Nyìngòŋ ntɨmə əpfɨ a Igyìb, ghə̀ gàʔ à vʉnə Isrèl la vəwenə zhwi ngesə̀ byìnjɨ̀ ə̀ zuʔ mənlyuŋ ə myimə a kəchʉ kə əchʉ̀ ə əngə̀ŋ. Nyìngòŋ ə̀ nyenə mənlyuŋ amyì ghə̀ chòə̀ kèn la ghə̀ a zhwì wàyn ə̀ mbyì ə̀ kəbəŋ ayì. Adìʔ kənyʉ̀ a və dzàŋə̀ nə̀ zaʔsə aloʔ.

Yesù dìʔ byìnjɨ̀ ə̀ zaʔsə aloʔ ə vəghəŋ. Ghə̀ ə nko kiʔə mbyɨ bwen. Və nzhwi wen a əzhwʉ ə zaʔsə əngə̀ŋ. Sətsèn wìʔ byɨmə à Yesù, mənlyuŋ mə̀ Yesù ə̀ shʉ̀ə̀ mbyɨsə, tyin ə fwi ə̀ Nyìngòŋ ə̀ zaʔsə wen.

Nyìngòŋ ə̀ nkyìʔ məkayn wenə̀ vʉnə Isrèl, viʔi ə wen a ghə̀ nkòŋə̀. Luwèn Nyìngòŋ ə nkàyn məkàyn mə mfimə̀ wenə̀ viʔ vətsèm. Noʔə̀ ndə̀, noʔə̀ fa əloʔ əkɔ̀ zì ghə̀ byɨmə a Yesù ndìʔ wàyn ə̀ Nyìngòŋ byì məkàyn mə mfimə̀ amèn mə.

Musìs ndìʔ noʔə̀ nshə̀ʔtə̀ Nyìngòŋ ə to a ghə̀ nshə̀ʔtə̀ əgàʔ ə Nyìngòŋ. A lì Yesù dìʔə nshə̀ʔtə̀ a ghə̀ chòə̀ noʔə̀ nshə̀ʔtə̀ sətsèm. Ghə̀ dìʔ Nyìngòŋ, noʔə̀ ənyʉ̀ ətsèm a ghə̀ ngàʔə̀ bɛ nèə̀ a ndìʔ ənyʉ̀ ə Nyìngòŋ. A nè kənyʉ̀ əkyi və dzàŋ Yesù la Əgàʔ ə Nyìngòŋ.

Nyìngòŋ ə ngàʔə̀ li à fòyn Devìd la wù ngwàʔ ə̀ wen ə lu ndiʔ fòyn ə̀ mbyi yèn ə soʔ viʔi Nyìngòŋ vətsèm. Byì àndə Yesù dìʔ Wàyn ə̀ Nyìngòŋ, dìʔ Mèzayà, ghə̀ dìʔ wù ngwàʔ ə̀ Devìd ayì a ghə̀ lu soʔ viʔi Nyìngòŋ.

Devìd ə̀ ndìʔ fòyn ə̀ əloʔ ə Isrèl, Yesù dìʔ fòyn ə̀ mbyi ətsèm! Ghə̀ ə lu bwìnə̀ ə vì ə soʔə mbyi yèn nə̀ kòŋə bɛ̀ nə̀ mbwaʔmə̀.

Fətitì fa nwàʔlə̀ ə̀ Nyìngòŋ//: Jènesìs1-3, 6, 14, 22; Eksedòs 12, 20; 2 Samwə̀l 7; Hibù 3:1-6, 4:14-5:10, 7:1-8:13, 9:11-10:18; Lèvèleshòn 21//