50. Yesù ə lu Bwìnə̀ ə Vì
Ngwʉ̀ʔsə chòə̀ li nkam sə̀bò (2,000) luwèn viʔi zhʉə djʉ̀ə̀ tà djʉ̀ə̀ byì Yesù ə Mèzayà. Vìʔ vəbyɨmə və ghoʔtə djʉ̀ tà djʉ̀ə. Yesù ngàʔə̀ li la yì ə lu bwìnə̀ ə vì a əchʉʔ ə bàm. Ghə̀ ə ko tɨmə̀ bwìnə̀ nvì a lì dìʔə lu vì.
Nyìngòŋ ə kəŋə la vəghəŋ sə nkə̀ʔə̀ Yesù vəghəŋ ə ntsi a jì ə juŋə a ghə̀ bòŋə̀ à Nyìngòŋ. Ghə̀ kəŋə la vəghəŋ ə nshə̀ʔtə̀ à viʔ vətsenə və byì kəshi kə fòyn ə̀ Nyìngòŋ. A ndìʔ àndə Yesù mbu a mbyi a shə̀ ghə̀ gàʔ, “Ndzɨ̀mtə̀ shomsə lu shə̀ʔtə̀ byì kəshi kə fòyn of Nyìngòŋ a mbyi yèn ətsèm mimbu mà bwìnə̀ vì.”
Viʔi ko tɨmə̀ zhʉ byì Yesù a əshi tà a kədɨ̀ŋ a mbyi yèn. Mimbu ghə̀ sə bwìnə̀ ə kuʔ a əkaŋ, Yesù ngàʔə̀ a ndzɨ̀mtə̀ sə wen la sə shə̀ʔtə̀ əgàʔ ə wen a viʔi a və ko tɨmə zhʉ. Ghə̀ gàʔ, “Ghə̀ŋ djʉ̀ ə̀ gàʔ byì mò a viʔi a chì mbyi yèn noʔə̀ ətsèm!” ghə̀ bɛ gàʔ, “Təsɨm tə sə̀ dìʔ a mə̀pfì!”
Yesù mbɛ̀ gàʔ, “Wùshyèʔ ə ko chòə̀ masà ə wen. Viʔi mbyi vənə ne bàyn ghə̀ŋ, ə nyàblə̀ nə̀ ghə̀ŋ tà a jì a vəwenə tə̀ nè nə̀ mò. Ghə̀ŋ ə nyenə tɛ̀ ngəʔ a mbyi, ghə̀ŋ ə ntosə tà ətyɨm byì àndə mà a zhɨli Satàyn a dìʔ fòyn ə̀ mbyi yèn. Ghə̀ŋ tò ta lì ə̀ djʉ̀ zaʔə a kəmyètə̀, Nyìngòŋ à bwòŋsə̀ ghə̀ŋ!”
Yesù ə nshə̀ʔtə̀ li fətitì à ndzɨ̀mtə̀ sə wen ti vəwenə kɨ kənyʉ̀ a kə lu ndìʔ a kətsi kə bàm. Ghə̀ gàʔ, “Wìʔ nwye ashɨ əfo ajuŋə ghə à wenə əsɨm. Ghə̀ sə mbɨnə, wù kəbàyn ə̀ wen nyeʔtə̀ vì wye kəfʉ̀ʔ tsu.”
“Əfo avyi fʉ̀ ə̀ sə nkwiə, viʔi əshyèʔ ə̀ wìʔ ayì bə̀m a wen, ‘Masà, wù nwye ashɨ əfo ajuŋə ghə a əsɨm yenə, kəfʉ̀ʔ kə nlù fa fənə tsu a lə̀ a?’ Masà ayì bwìnsə̀, ‘A dìʔ a lə̀ mu à wye wù kəbàyn ə̀ mò ə nwye kəfʉʔ akèn.’”
“Viʔi əshyèʔ ə wen bwìnsə̀ a wen, ‘Yès su kəfʉ̀ʔ akèn à?’ Masà ayì bwìnsə̀, ‘Jòʔ. Sətsèn ghə̀ŋ su, ghə̀ŋ à tsuʔtə əfozhɨvə ətsenə və. Ghə̀ŋ kə̀ʔtə̀ əzhʉ a və sə̀ pfìə̀, ghə̀ŋ mu tsèntə̀ kəfʉ̀ʔ ə̀ nyùʔ ə̀ pfwòə̀ nə̀ əfozhɨvə a əngə̀ŋ.’”
Ndzɨ̀mtə̀ sə wen sə nko kɨ la fətitì a fèn fə dìʔ la ghɔ̀ lɔ. Vəwenə gàʔ la Yesù shə̀ʔtə̀ à vəwenə. Yesù gàʔ, “Wìʔ yì a ghə̀ nwye ashɨ əfo ajuŋə ghə lì dìʔ Mèzayà. Əsɨm ə dìʔə mbyi yèn. Ashɨ əfo ajuŋə ghə dìʔ viʔi a və byɨmə à Nyìngòŋ.”
“Kəfʉ̀ʔ kyikə dìʔ viʔi a və ko byɨmə à Nyìngòŋ. Wù kəbàyn yì a ghə̀ nwye kəfʉ̀ʔ kyì dìʔ Satàyn. Əzhʉ ə pfì əfo dìʔ kəmyètə̀ kə mbyi, viʔ və pfìə və dìʔ ntsɨ̀ŋsə əngə̀ŋ ə̀ Nyìngòŋ.”
“A lu ndìʔ a kətsi kə bàm, ntsɨ̀ŋsə əngə̀ŋ ə̀ Nyìngòŋ sə lu tsèntə̀ viʔi ə Satàyn ə màʔà à chì əzhiʔ ə to ghə, ə vəwenə mfwiə, nyenə ngəʔ tsu. Viʔ və byɨmə və lu nsaŋlə, zhʉə a nkàyn a kəshi kə fòyn ə̀ Nyìngòŋ.”
Yesù mbɛ gàʔ la yì ə lu bwìnə̀ ə vì mimbu mbyi yèn mèə̀. Ghə̀ ə lu bwìnə̀ ə shiə tà a jì a ghə̀ nkuʔ. A dìʔ la ghə̀ ə lu ndìʔ wìʔ nə̀ əwen ə wen, ə shiə a mbòʔsə. A lu ndìʔ a kətsi a Yesù bwìnə̀ ə̀ vì, viʔ vəbyɨmə və a və pfɨkə li və lu lù fa əpfɨ ə kuʔ ə bùmtə̀ ə wen a əkaŋ.
Viʔ və byɨmə və a və bu a nse və mə dzɨ̀mtə̀ ə̀ kuʔ a əkaŋ ə̀ kwetə viʔ və byɨmə vyi a və yì lù fa əpfɨ lì. Noʔə̀ vəwenə vətsèm ə lu ndìʔ wenə̀ və̀ Yesù tsu. Yesù ə lu ntsiə wenə̀ viʔi ə wen a bwàʔmə̀ nə̀ saŋlə ghə.
Yesù ə ngàʔə̀ li la yì ə lu ku əsòʔ ə əbwòŋ a noʔə̀ mə ndə̀ a ghə̀ byɨmə à yì. Vəwenə lu sè wenə̀ və̀ Nyìngòŋ nə̀ bwàʔmə̀ bɛ̀nə̀ saŋlə ghə.
A lì Nyìngòŋ ə lu soʔ viʔi a və ko mbyɨmə à Yesù. Ghə̀ ə lu wye vəwenə a chì təzhiʔ ə vəwenə mfwiə fa tsu zhʉə əzaf. Əzhiʔ ayì ko lu mè. Əzhiʔ ə lu mfwiʔə vəwenə a lì kèn la vəwenə pfɨkə.
Yesù ə̀ lu bwìnə̀ ə vì ə mə myètə̀ ə zhwi Satàyn bɛ̀nə̀ mfɨnə̀ ə wen. Ghə̀ ə lu wye Satàyn a chì təzhiʔ nkayntə wen ə mfwi fa tsu wenə̀ viʔ vyi a və nko byɨmə à Nyìngòŋ lì.
Nyìngòŋ ngàʔə̀ li la yì ə lu byɨfsə mbyi yèn byì mbyɨ a Adàm wenə̀ If ə̀ nnèə̀. Əchʉʔ ətsenə ghə lu kwʉ̀ʔ ə Nyìngòŋ shə̀tə̀ əkaŋ ə fighə nə nse ə fi kɛ̀nə̀ mbyɨ tsu.
Yesù wenə̀ viʔi ə wen və lu ntsi a mbyi ə fi ayì. Ghə̀ ə lu nsoʔə mbyi yen noʔə̀ ətsèm. Ghə̀ ə lu chì mənshɨ noʔə̀ məntsèm fa viʔi ashɨ. Ngəʔ nə kusə nshensə nə̀ mbyɨ bɛ̀nə̀ əpfɨ ə lu mè. Yesù ə lu soʔ kəshi kə fòyn ə wen nə̀ bwàʔmə̀ bɛ̀nə̀ əkòŋ. Ghə ə lu ndìʔ nə̀ saŋlə ghə wenə̀ viʔi ə wen.
Fətitì fa nwàʔlə̀ ə̀ Nyìngòŋ: Machò 24:14; 28:18; Jon 15:20, 16:33; Lèvèlashòn 2:10; Machò 13:24-30, 36-42; 1 Tèsàlonyàns 4:13-5:11; Jems 1:12; Machò 22:13; //Lèvèlashòn__ 20:10, 21:1-22:21//