5. Wàyn ə̀ Məkàyn

Ngwʉ̀ʔsə ə̀ wum sə chò fa əchʉʔ a Abàm wenə̀ Sèra nvìə a Kanàn, kèn la vəwenə tɨmə kiʔi wàyn. Sà ra ə w ìə Abàm, gàʔ a wen la, “Lam Hagà, lè ə wàyn ə̀ yuwù yèn, ə̀ bwi wàyn wyewen àndə Nyìngòŋ ə̀ ko ku wàyn à mo lə̀. Mà ə to li nchò ə kiʔi wàyn.”

Abàm mə̀ lam Hagà. Hagà bwi wàyn ə wùlɨm, Abàm chʉ əzhiʔ ə wen la Ismàyel. Ə sətsèn Sèra zìtə̀ sə̀ bànə̀ Hagà. Ismàyel sə ndìʔ ngwʉ̀ʔ ndjùsə̀ taʔ a wum, Nyìngòŋ bɛ̀ gàʔ a Abàm.

Nyìngòŋ gàʔ, “Mà dìʔ Nyìngòŋ a ghə̀ chòə̀ mbyi yèn noʔə̀ ətsèm. Mà ə kàyn məkàyn yuwù.” Abàm bvɨ̀ a nse. Nyìngòŋ gàʔ a wen, “Wù a ndìʔ tìʔ ətɨm tà a kədɨ̀ŋ. Mà ə ku əloʔ Kanàn a wù bɛ̀nə̀ à ngwàʔ ə̀ wù a və a bwi. Mà ə ndìʔ Nyìngòŋ ə̀ vəwenə noʔə̀ mənzhʉ əntsèm. Wù a tin əde ə vunə lyʉmə noʔə̀ vətsèm à wù ə ngwàʔ ə əngə̀ŋ.”

“Sèra, wì ə wù a bwi wàyn ə wùlɨm—wàyn ə wùlɨm yì a mà ngàʔə̀ la mà a ku a wù. Əzhiʔ ə wen a ndìʔ Azìk. Mà ə wʉ məkàyn ə mwomə̀ yuwùwen, ghə̀ ə ndìʔ tìʔ ətɨm tà a kədɨ̀ŋ. Mà ə ku kətɨ̀m kəghoʔə kə à Ismàyel, a lì məkàyn ə mwomə̀ a ndìʔ yuwù Azìk.” Nyìngòŋ mè kwìtə əzhiʔ ə Abàm ə̀ chʉ nə̀ Abàham, à dìʔ la “tìʔ ətɨm ə kədɨ̀ŋ.” Nyìngòŋ mè kwìtə əzhiʔ ə Sèra ə̀ chʉ nə̀ Sàra, à dìʔ la “wùwì ə ntuʔ.”

Zòyn ayì Abàham tin təde tə vunə lyʉmə noʔə̀ vətsèm à wen ə kəbəŋ. Ngwʉ̀ʔ ə mpfen se nchòə̀ djʉ̀, mú Abàham sə̀ dìʔ ngwʉ̀ʔ əghɨ Sàra dìʔ ngwʉ̀ʔ məwum àbʉ̀muʔ, Sèra bwi wàyn ə wùlɨm ə Abàham. Vəwenə chʉ əzhiʔ ə wen nə̀ Azìk àndə Nyìngòŋ ə̀ ngàʔə̀ à vəwenə.

Azìk sə nkwiə Nyìngòŋ mwomsə̀ əbyɨmə Abàham, ə̀ gàʔ a wen “lyɨ̀ə wàyn ə̀ wù ə Azìk ə djʉ̀ zhwiə wen a nə̀ kəku à mò.” Abàham bɛ̀ zhʉ Nyìngòŋ tà zhʉ ə̀ bwiə nkòʔ ə̀ baʔtə əfo ə kəku ə djʉ̀ ə zhwi wàyn ə̀ wen.

Andə Abàham wenə̀ Azìk mboʔsə djʉ̀ a kəshi kə kəku akyì, Azìk bèm à tìʔ ə wen, “Yuwù kiʔi tà nkòʔ a lə̀ byi dìʔ fenə a?” Abàham bwìnsə̀ a wen, “Nyìngòŋ a ku byi a yuwù.”

Vəwenə djʉ̀ ə̀ zaʔə a kəshi kə kəku akyì Abàham kwiʔ Azìk ə̀ nyòŋsə̀ a kwì ə chɨ ə sə̀ nkəŋə əzhwi ə wen Nyìngòŋ gàʔ a wen. “Kye! Kə a zhwi wàyn yì! mà ə kɨ li luwèn la wù zhʉə mò byì tà àndə wù ko yì chen wàyn ə wù fà mò.”

Nyìngòŋ gàʔ a Abàham la ghə̀ kaʔkə əlye byì a ghə̀ a yen byi ə ku kəku akyì tsu. Abàham kaʔkə ə yen əlwìn a ətoʔ a Nyìngòŋ kuə là ghə̀ zhwi a kəshi ə̀ Azìk. Abàham lyɨ̀ əlwìn ayì ə̀ ku kəku à Nyìngòŋ nə̀ saŋlə ghə.

Nyìngòŋ gàʔ a Abàham, “Mà ə bwaʔsə wu byì tàndə wù kòŋə̀ li ə ku noʔə̀ əfo tsèm, tɛ̀bɛ̀ wàyn ə wù à mò. Ngwàʔ ə̀ wù lu chò mədzɨ̀ŋ a mə̀ dìʔ a əkaŋ. Mà ə chò fà wù ə ngwàʔ ə̀ əngə̀ŋ ə bwaʔsə mbyi yèn.”

Fətitì fa nwàʔlə̀ ə̀ Nyìngòŋ//: Jènesìs 16-22//