4. Məkàyn mə̀ Nyìngòŋ wenə̀ Abàham

Ngwʉ̀ʔsə nchò li ta kədɨ̀ŋ fá əchuʔ a muʔu myì mbyɨfsə mbyi, viʔi bɛ̀ bwi ə̀ ghoʔ. Vəwenə ngàʔə̀ ta əgàʔ əmùʔ. Ə vəwenə mbwi lwinsə̀ mbyi tà àndə Nyìngòŋ ə̀ ngàʔə li vəwenə bòŋsə̀ tsèntə̀ ə bwom aloʔ.

Kənyʉ̀ əkyikə bòŋ à vəwenə vəwenə zì ə kuʔsə təwen tə vəwenə kèn la vəwenə bɛ̀ zhutə Nyìngòŋ bwen. Kə zaʔə a nsɨʔ ətsen vəwenə zì ə̀ sə̀ bwomə əngə̀ŋ ə ghə̀ kuʔ ə̀ zaʔə a əkaŋ. Nyìngòŋ yen la sətsèn yì kye vəwenə nshyèʔə̀ djʉ̀ a mwuʔu, nèə̀ djʉ̀ nə̀ mbyɨ mu kə a byɨf.

Nyìngòŋ mə̀ bìstə̀ əngə̀ŋ ayì ə̀ ku təgàʔ à vəwenə tà a kədɨ̀ŋ ə̀ sàs vəwenə a chi ə mbyi tà a əshi a əshi. Əzhiʔ ə kətɨm akyìkə a vəwenə mbwomə li ndìʔ Babèl, à dìʔ “ə lè ətof.”

Ngwʉ̀ʔsə təghɨ tà a kədɨ̀ŋ sə chò Nyìngòŋ gàʔ à wutsen və ndzàŋə̀ wen nə̀ Abàm. Nyìngòŋ gàʔ à wen, “Luə fà wù əloʔ nə̀ ngwàʔ ə̀ wù ə̀ djʉ̀ a kəshi a mà a jìʔ à wù. Mà ə ne bwaʔsə wù ə kwʉ̀ʔsə̀ ngwàʔ ə̀ wù ə ghə̀ lwin ə mbyi ə mpfen. Mà ə nè əzhiʔ ə wù djʉ̀ nə̀ mbì. Mà ə ne bwaʔsə viʔi a və bwaʔsə wù ə ghə̀ʔ ə vyi a və ghə̀ʔə̀ wù. Mà ə ne bwaʔsə mbyi yèn ətsèm byì wù.”

Abàm ə̀ nzhʉ li Nyìngòŋ. Ghə̀ lyɨ̀ wì ə wen, Sèra, nè viʔi əshyèʔ ə wen nə̀ əfo ə wen noʔə̀ ətsèm ə̀ djʉ̀ a kəshi a Nyìngòŋ njìʔə a wen, a əloʔ ə Kanàn.

Andə Abàm nzaʔə a Kanàn, Nyìngòŋ gàʔ a wen, “Lye ə kaʔsə à wù ben. Mà a ku nse yèn a wù yenə lə̀ à wù bènə̀ ngwàʔ ə wù a wù ə lu bwi.” Abàm mə̀ sè tsu.

Kətsi kətsen, Abàm bwùmtə̀ Mèlchizedèk, à dìʔ wùshyèʔ a əngə̀ŋ ə̀ Nyìngòŋ. Mèlchizedèk bwaʔsə Abàm ə̀ gàʔ a wen, “Nyìngòŋ a ghə̀ dìʔ a kwikwi, a ghə̀ kyìʔ əkaŋ wenə̀ nse bwaʔsə wù.” Abàm gə̀sə̀ əfo wen əshi ə̀ wum ə̀ kù əshə ə̀ mùʔ à Mèlchizedèk.

Ngwʉ̀ʔsə nchò li ta kədɨ̀ŋ kèn la Abàm wenə̀ Sèra kiʔi li wàyn. Nyìngòŋ bɛ̀ gàʔ a Abàm la ghə̀ a kiʔi wàyn ə wùlɨm a ghə̀ a bwi ngwàʔ ə wàyn tà a nə̀ mədzɨ̀ŋ fa əkaŋ. Abàm bɛ̀ zhʉ Ngìngòŋ ə̀ byɨmə. Ngìngòŋ gàʔ la əbyɨmə Abàm ə to tà àndə ghə̀ choʔsə yì byɨmə̀ ənyʉ̀ a yì gàʔə̀.

Nyìngòŋ mə̀ kàyn məkàyn wenə̀ Abàm. Məkàyn dìʔ əsoʔ a viʔ vəbò wʉmə̀. Nyìngòŋ ngàʔə̀, “Mà ə lu ku wàyn ə wùlɨm à wù fà wù ə mənlyuŋ. Mà ə lu ku əloʔ ə Kanàn à ngwàʔ ə wù.” Tɛ̀ a lì Abàm nko tɨmə kiʔ wàyn.

Fətitì fa nwàʔlə̀ ə̀ Nyìngòŋ: //Jènesìs__ 11-15//