37. Yesù Lùsə̀ Lazaròs fa Əpfɨ

Əchʉʔ ə tsenə ghə, ntɨm vì a Yesù la Lazaròs ə̀ kwaʔə. Lazaròs wenə̀ vələ̀mə̀ və wen ə kyìʔi vəbò, Mèri wenə̀ Matà, ndìʔ viʔi ndoŋsə ə̀ Yesù. Yesù nzhʉ byì əkwaʔə ayi ə̀ gàʔ, “Əkwaʔə yenə ko dìʔ əpfɨ, à dìʔ jì ə Nyìngòŋ a jiʔ kəjoʔ kə wen fa tsu.” Tɛ̀ àndə Yesù nkòŋə̀ viʔi ndoŋsə ə̀ wen lì, ghə̀ ə nko ə̀ lɨf. Ghə̀ ə ntsi li məntsi mbò mimbu djʉ̀.

Məntsi amyì chò mbò, Yesù gàʔ à ndzɨ̀mtə̀sə wen, “Vəghəŋ bwìnə̀ ə̀ djʉ̀ a Jùdeyà.” Ndzɨ̀mtə̀sə wen sə bwìnsə̀, “A və tə̀ ə nkəŋə ə zhwi wù tsu tà zòyn zòyn!” Yesù gàʔ, “Wùndoŋ ə vəghəŋ ə Lazaròs ə djʉ̀ə̀ li a mbinsə, mà dìʔ ə djʉ̀ zhòmə wen.”

Ndzɨ̀mtə̀sə Yesù sə gàʔ, “Masà, mu Lazaròs ə̀ bɨnə ghə̀ a to.” Yesù gàʔ a vəwenə tà fəchìʔ, “Lazaròs ə̀ pfɨ li. Mà saŋlə byì andə ghə̀ŋ a byɨmə a mò fambu a mà shə̀ʔtə̀ à ghə̀n kèn la mà yì ndìʔ tsu.”

Yesù sə zaʔə a əloʔ ə Lazaròs mu à sə̀ dìʔ məntsi nkàʔ fa əchʉʔ a Lazaròs tə̀ pfɨ. Matà fʉ̀ ə̀ kwetə Yesù ə̀ gàʔ, “Masà, wù ti ndìʔ a shə̀ mu lə̀mə̀ ghomə ko tə̀ pfɨ. A lì mà kɨ la Nyìngòŋ a nè noʔə̀ ghɔ̀ a wù bə̀mə̀ a wen.”

Yesù bwìnsə̀, “A dìʔ mò a mà ku kəzhwì nə̀ mbyi a viʔi. Noʔə̀ ndə̀ a ghə̀ byɨmə à mò kòŋ ghə̀ pfɨ ghə̀ lu bwòŋ. Noʔə̀ ndə̀ a ghə̀ byɨmə à mò ghə ko lu pfɨ. Ghə̀ŋ ə byɨmə li kənyʉ̀ a mà gàʔə̀?” Matà bwìnsə̀, “Əŋ, Masà! Mà ə byɨmə li la wù dìʔ Mèsayà, Wàyn ə̀ Nyìngòŋ.”

Tà a əzhʉ ayì, Mèri vì, ə̀ fəŋ a əshɨ ə̀ Yesù ə̀ gàʔ, “Masà, wù ti ndìʔ a shə̀ mu lə̀mə̀ ghomə ko tə̀ pfɨ.” Yesù bə̀m à vəwenə, “Ghə̀ŋ bvɨ̀mə̀ Lazaròs fenə?” Və gàʔ a wen, “A əsè. Vì ə̀ yen.” Yesù dì.

Viʔi əloʔ avyi nchiʔtə̀ ngùʔsə a təchʉ̀ tə təsè. Yesù nzaʔə li tsu ə̀ gàʔ à vəwenə, “Ghə̀ŋ lyìsə̀ ngùʔ yì.” Matà gàʔ, “A sə̀ dìʔ məntsi nkàʔ fa əchʉʔ a ghə̀ tə̀ pfɨ. Əshi a lèm a jì ə byɨfə.”

Yesù gàʔ, “A mà ə yì gàʔ a ghə̀ŋ la ghə̀ŋ a yen kəjoʔ kə Nyìngòŋ a əzhʉ a sətsèn ghə̀ŋ byɨmə à mò?” Vəwenə mə̀ buŋə ngùʔ ayì ə̀ lyìsə̀.

Yesù kyiʔi əkaŋ ə̀ gàʔ, “Tìʔ ə̀ ghom, kəzòŋ tà àndə wù zhʉə mò. Mà kɨ li la wù nə nzhʉtə mò. Mà gàʔə̀ byì viʔi vənə a və dìʔ a shə̀ lə̀, ti vəwenə byɨmə la à tɨm wù ntɨm mò.” Yesù gàʔ, “Lazaròs, fʉ̀ə̀ vì!”

Lazaròs fʉ̀! Ghə̀ mbɔ̀ ndìʔ tà nə̀ njisə a və mbvɨ̀mə̀ wen nə̀ səwen. Yesù gàʔ à vəwenə, “Ghə̀ŋ gyàmtə̀ wen ə̀ tsuʔtə njishì fa wen ə wen ə̀ mòʔtə̀ wen ghə̀ djʉ̀!” Vəju mbyɨmə li a Yesù tà a kədɨ̀ŋ byì kənyʉ̀ kə̀ kanə akèn a ghə̀ nnè lə̀.

A lì njìʔsə̀ sə Vəju sə mbòŋsə̀ ghə̀ʔə̀ Yesu. Vəwenə ntsèntə̀ li ə myə̀ʔsə̀ jì a vəwenə a zhwi Yesù wenə̀ Lazaròs fa tsu.

Fətitì fa nwàʔlə̀ ə̀ Nyìngòŋ//: Jon 11:1-46//