3. Muʔu a mə̀ a Vì ə Lwinə Mbyi

Kəlyɨŋ kə dyə̀fə kə nchòə̀ lí viʔi ghoʔ a mbyi. Vəwenə zìtə̀ sə̀ tsiə ntsɨ̀nə̀ ə byɨ. Kə byɨf ə̀ chò Nyìngòŋ wʉ la yì a byɨfsə mbyi nə̀ muʔu.

A lì Nuà nstiə ntsìnə̀ əjùŋ Nyìngòŋ saŋlə nə̀ wen. A ndìʔ tà wen a ghə̀ ntsiə a nkàyn a ntìntìn ə̀ viʔ və byɨfə və avyi. Nyìngòŋ shə̀ʔtə̀ a Nuà byì muʔu amyì a ghə̀ a tɨm ə mə̀ vì lwinə mbyi. Ghə̀ gàʔ a Nuà la ghə̀ bwom ə mpfì ə kə̀baŋ.

Nyìngòŋ gàʔ a Nuà la ghə̀ bwɔm kə̀baŋ akjì kə ghoʔ noʔə̀ nànto ə̀ bɛ̀ jə̀f noʔə̀ nə̀mwìn. Nuà ndìʔ ə bwom nə̀ nkòʔ, ə kuʔsə noʔə̀ əkaŋ, ə wye chinsə̀ aloʔ tsu bènə̀ məlili tà a kədɨ̀ŋ. A dìʔ a kə̀baŋ akèn a Nuà nə̀ ngwàʔ ə wen nə̀ vəkayn və nyamsə fa mbyi a shə̀ noʔə̀ sə̀tsèm ə ne kwen a əzhʉ a əwʉ zìtə̀.

Nuà ə nzhʉ li Nyìngòŋ wenə̀ vunə lyʉmə wen vətaʔ ə bwom kəbaŋ akyì tà a jì a Nyìngòŋ ngàʔə̀ a wen. Vəwenə nlyɨ̀ə ngwʉ̀ʔsə tà a kədɨ̀ŋ ə bwom tà àndə kəbaŋ akyì kə nghoʔə noʔə̀ nànto. Nuà ə̀ nshə̀ʔtə̀ a viʔi byì muʔu amyì a mə̀ ne vìə lwinə mbyi, gàʔə̀ la vəwenə kwitə ə̀ byɨmə à Nyìngòŋ, a li vəwenə ko zhʉtə.

Nyìngòŋ bɛ̀ gàʔ a Nuà wenə̀ ngwàʔ ə̀ wen la vəwenə kəŋ əfozhɨvə tà a kədɨ̀ŋ a nyamsə bɛ̀nə̀ à vəwenə. Vəwenə mpfɨtə li əfo ə̀ me, Nyìngòŋ gàʔ a Nuà la əzhʉ kwʉ̀ʔə̀ li ə wen, wì ə wen, vunə lyʉmə ə wen vətaʔ nə̀ kyì ə vəwenə kwen a kəbaŋ akyì. Vəwenə ndìʔ ə̀ fwòmə.

Nyìngòŋ ə̀ mbɛ tɨ̀m ə lɨm nə̀ kyi ə nyamsə nə̀ mənyin a Nuà ə ghə̀ kwensə a kəbaŋ akyì ti nyamsə nə̀ mənyin ə bwoŋ. Nyìngòŋ ə̀ ntɨ̀m tə lɨm nə̀ tə̀ kyi ə̀ sòmbo fa nyamsə a və nku kəku tsu à Nyìngòŋ. Vəwenə nkwen ə me noʔə̀ mpfen ə̀ Nyìngòŋ chiʔ əch ə kəbaŋ akyì.

Əwʉ mə̀ zìtə̀ ə̀ vì, ə̀ vì, ə̀ vì. Ghə shiə ta lì məntsi məwum ə nkàʔ, nə̀nchwì nə̀nchʉʔə kèn la ghə chòə̀ li! Muʔu kaʔkə sə̀ fʉ̀ə̀ fa nse. Noʔə̀ əshi ətsèm a mbyi sə̀ dìʔ tà muʔu, tɛ̀ pfénsə́ jəfkə́ sə́.

Noʔə̀ əfo ətsèm a mbyi pfɨkə, à faŋ ta viʔ vyi nə̀ nyam shi nə̀ mənyin myi a chi kəbaŋ. Kəbaŋ akyì kə faŋ ə̀ sə̀ lyəʔə fa kwì a muʔu kèn la vəwenə lyəŋ li.

Əwʉ ə ne nchò, kəbaŋ akyì kə lyəʔ a kwì a mù vəsàŋ vətayn, muʔu amyì shiʔtə̀ djʉ̀. Kətsi kətsen kəbaŋ akyì kə shiʔtə a kwì ə pfɛn ətsen, əshi bɔ dìʔ tà muʔu ə muʔu. Vəsàŋ ə bɛ cho vətaʔ tə̀ kwi tə ətàŋ tə mə̀ zì əkə̀ʔ.

Məntsi bɛ cho məwum ə nkàʔ, Nuà tɨm fənyin la fə djʉ̀ lyeə la muʔu zɨm li lɔ. Fənyin afyìfə tànə̀ ə̀ kaʔ, ə̀ kəŋ, fə ko yen ə nse ə zɨm.

Nuà tsitə ə̀ bɛ̀ tɨm kə̀làtó. Kə tànə̀ kaʔ kə ko yen ə nse ə zɨm ə̀ bɛ bwìnə̀ vì. A sə ndìʔ a bàm ə əwəŋ ə mpfen ghə̀ bɛ̀ bwìnsə̀ tɨm kəlàtó akyì, kə djʉ̀ bwìnə̀ vì nə̀ əfʉ ə fəkòʔ! Kə njìʔə la muʔu zɨmə djʉ̀ nkòʔ bwìnsə̀ kwiə a mfi!

Nuà bɛ kə̀ʔtə̀ əwəŋ ə mpfen ə bɛ̀ tɨm kəlàtó akyì a ghayn a taʔ. Kə djʉ̀ yen kəshi ə shyə̀ʔə əloʔ ə wen tsu kə ko bɛ̀ bwìnə̀ vì bwen. Kə njìʔə la muʔu zɨmə djʉ̀ noʔə̀ nkàyn!

Vəsàŋ ə bɛ̀ chò vəbò Nyìngòŋ gàʔ a Nuà, “Wù zì wù fʉ̀ nə̀ ngwàʔ ə̀ wù bènə̀ nyam shi nə̀ mənyin myì luwèn. Ghə̀ŋ djʉ̀ ə̀ bwì vunə tà a kədɨ̀ŋ ə̀ lwinsə mbyi tsu.” Nuà wenə̀ ngwàʔ ə̀ wen mə̀ fʉ̀ fa kəbaŋ akyì.

Nuà fʉ̀ fa kəbaŋ akyì, ə̀ bwom kəshi kə kuʔsə ə̀ Nyìngòŋ ə̀ kù nyamsə kəku sətsen a wen. Kənyʉ̀ əkyikə bòŋ à Nyìngòŋ ghə̀ bwaʔsə Nuà nə̀ ngwàʔ ə̀ ə̀ngə̀ŋ ə̀ wen.

Nyìngòŋ gàʔ, “Mà ə wʉ li la mà ə ko lu bɛ byɨfsə mbyi byì ənyʉ̀ ə byɨfə və a viʔi nè, kèn la mà ə lu bɛ tɨm muʔu la mə̀ byɨfsə mbyi tɛ̀ ndə viʔi nèə̀ mbyɨ nànto fa əbwi.”

Nyìngòŋ mə̀ shìtə̀ mbì kəmpfembyiʔ a nə̀ kəchwiʔtə kə. Noʔə̀ zenə a kəmpfembyiʔ kə mfʉ̀ a əkaŋ Nyìngòŋ ə̀ kwòʔtə̀ məkàyn amyì, viʔi ə wenə bɛ kwòʔtə̀.

Fətitì fa nwàʔlə̀ ə̀ Nyìngòŋ: //Jènesìs__ 6-8//