30. Yesù Nzhis li Viʔi Nkamsə Tàyn

Yesù ə̀ ntɨm li ndzɨ̀mtə̀sə wen la sə djʉ̀ a əshi a əshi ə̀ shə̀ʔtə̀ a viʔi byì kəshi ke fòyn ə̀ Nyìngòŋ. Vəwenə mbwìnə̀ li ə̀ vì a kəshi a Yesù ndìʔ tsu, ə̀ shə̀ʔtə̀ ənyʉ̀ a wen a vəwenə nè. Yesù lyɨ̀ vəwenə ə̀ tɨm mo ə̀ djʉ̀ a kəshi kə lyòmtə̀ kə ə djʉ̀ ə zhwʉ̀ tə̀. Vəwenə ntɨm li ə̀ djʉ̀ a əndzèn əfwayn ətsenə ghə.

A li ngwàʔ ə̀ wìʔ ə nyen li Yesù wenə̀ ndzɨ̀mtə̀sə wen tà àndə və tɨmə djʉ̀ə̀. Vəwenə nyɨŋ ə̀ tɨm fa əshə ə kəjaŋ. Yesù sə zaʔə tsu wenə̀ ndzɨ̀mtə̀sə wen mu viʔi sə̀ kə̀ʔtə̀ vəwenə kə̀ʔtə̀.

Ənòyn ə viʔi avyi nkìʔ lyʉmə nkamsə tàyn, kèn la və taŋ li kyìʔi bɛ̀nə̀ vunjə. Yesù nkusə li nshinsə à vəwenə. Yesù nyen vəwenə dìʔ tà a nə̀ byisə kɛ̀nə̀ ntsɨ̀ŋ. Ghə̀ chʉʔ vəwenə, ə̀ ziʔi vəwenə ə̀ chʉʔ viʔi və kwaʔkəvə à vəwenə ntìntìn.

A sə ndìʔ a mpfwomə zòyn ayì, ndzɨ̀mtə̀sə Yesù sə gàʔ a wen, “Əshi ə kutə li. Gə̀sə̀ viʔ və̀nə ti vəwenə djʉ̀ ə̀ kəŋ kəfo ə̀ zhɨ.”

Yesù bòŋsə̀ gàʔ à ndzɨ̀mtə̀sə wen, “Ghə̀ŋ ku kəfo vəwenə zhɨ!” Vəwenə bwìnsə̀, “Yès zhis vəwenə a lɛ? A dìʔ tà ntə̀mə kəbayn kə mənkalə̀ ə̀ tàyn nə̀ məshʉ̀tə mə̀ mbò a shə̀.”

Yesù gàʔ à ndzɨ̀mtə̀sə wen vəwenə gàʔ a viʔi avyi və nwʉʔtə a nse, a əjuʔ məwum ə̀ ntàyn məwum ə̀ ntàyn.

Yesù shi ntə̀mə kəbayn kə mənkalə̀ ə̀ tàyn avyi nə̀ məshʉ̀tə myì mə̀ mbò, ə̀ kyiʔi əkaŋ, ə̀ kù kəzoŋ ke Nyìngòŋ a əfozhɨvə avyi.

Yesù byəʔtə kəbayn kə mənkalə̀ akyì nə̀ shʉ shìsə a byeʔ a byeʔ, ə̀ ku à ndzɨ̀mtə̀sə wen la sə gə̀tə̀ a viʔi. Ndzɨ̀mtə̀sə Yesù sə fàŋ ə̀ sə̀ gə̀tə̀ əfozhɨvə avyi, ko və lə mmè! Noʔə̀ viʔ vətsèm ə zhɨ li ə̀ kwiʔ.

Və mmyètə̀ li ə̀ zhɨ, ndzɨ̀mtə̀sə Yesù sə boŋtə əbyeʔ əfozhɨvə a və ko nzhɨ və lwin a nkyèsə njù sə̀bò a wum! Əfozhɨvə avyi noʔə̀ ətsèm və̀ mfʉ̀ə̀ tà fa ntə̀mə kəbayn kə mənkalə̀ vyi ə̀ tàyn nə̀ məshʉ̀tə myì mə̀ mbò.

Fətitì fa nwàʔlə̀ ə̀ Nyìngòŋ//: Machò 14:13-21; Mak 6:31-44; Luk 9:10-17; Jon 6:5-15//