16. Vəmbwòngsə̀ və Vunə Isrèl

Joshwà ə̀ mpfɨ li vunə Isrèl kwitə ə̀ sə̀ toə kəchʉ à Nyìngòŋ. Vəwenə nko dzɨ̀m viʔi ə Kanàn vətsenə vyi, kèn la vəwenə mbɛ wʉ təsoʔ tə Nyìngòŋ. Vunə Isrèl ə nkye li Yawè ə̀ zìtə̀ ə̀ sə̀ kuʔsə vənyìngòŋ və viʔi ə Kanàn. Vunə Isrèl ə nko kyiʔ foyn noʔə̀ ndə̀ sə̀ nè tɛ̀ ghɔ̀ a ghə̀ kòŋə̀.

Nyìngòŋ ə̀ mmòʔtə̀ li viʔi ə kəbàyn ə̀ vunə Isrèl soyn ə̀ zhɨ vəwenə byì ə̀ toə kəchʉ ə̀ vəwenə. Viʔi kəbàyn avyi ntsoŋ li əfo ə vunə Isrèl, ə̀ byɨfsə ətsenə və, ə̀ bɛ̀ zhwiə ngwàʔ ə̀ wìʔ. Vəwenə nyen li ngəʔ a ngwʉ̀ʔsə a ngwʉ̀ʔsə a avu ə̀ viʔi ə kəbàyn ə̀ vəwenə mimbu kwitə ə loyn la Nyìngòŋ gyàmtə̀ vəwenə.

Nyìngòŋ ə̀ nkusə li nshinsə ə̀ ku mbwòŋsə̀ ghə̀ gyàmtə̀ vəwenə fa avu ə̀ viʔi kəbàyn ə̀ vəwenə, mbwaʔmə̀ sə̀ dìʔ. Kə ko ntsitə viʔi Isrèl vyi bɛ̀ lyèsə̀ byì Nyìngòŋ ə̀ bɛ̀ zìtə̀ sə̀ kuʔsə vənyìngòŋ və kəjàŋ. Nyìngòŋ mə̀ kye viʔi Midyàn və soyn ə̀ zhɨ vəwenə.

Viʔi Midyàn ə nlyɨə li əfozhɨvə fa təsɨm ə̀ viʔi Isrèl a ngwʉ̀ʔsə ə̀ sòmbo. Viʔi Isrèl ə mfwànə̀ li ə̀ lyòmtə̀ a təfyə̀ ti kə viʔi Midyàn ə yen vəwenə. Kə nzaʔə li a nsɨʔ ətsen vəwenə bɛ loyn la Nyìngòŋ gyàmtə̀.

Əchʉʔ ə tsenə ghə, wù Isrèl ə tsen vədzàŋə̀ nə̀ Gidyòn lyòmtə̀ fa viʔi Midyàn ə̀ sə̀ ghòmə̀ asaŋ. Ntsɨ̀ŋ ə̀ əngə̀ŋ ə̀ Nyìngòŋ vì a Gidyòn ə̀ gàʔ, “Nyìngòŋ dìʔ wyewen, wù dìʔ wù ŋàŋ. Djʉ̀ə̀ ə̀ bwòŋsə̀ vunə Isrèl fa viʔi Midyàn.”

Tìʔ ə̀ Gidyòn ə̀ nkiʔ əfəm a ghə̀ nwʉ nyingòŋ tsu və sə̀ kuʔsə. Nyingòŋ gàʔ a Gidyòn la ghə̀ bìs əfəm ayì. Gidyòn ə̀ nkə̀ʔtə̀ li nə̀nchʉʔə byì àndə ghə̀ mfwànə̀ viʔi. A nsə ndìʔ nə̀nchʉʔə ghə̀ bìstə̀ əfəm ayi ə̀ sàstə̀ noʔə̀ ətsèm. Ghə̀ mbom li kəshi kə kuʔsə Nyingòŋ à yì ə ben ə̀ ku kəku tsu à wen.

Əchʉʔ ə nlayn li viʔi yen la wutsen ə yì bìstə̀ əfəm ayi ə̀ nsàstə̀, kə̀ zaf vəwenə. Viʔi mə̀ djʉ̀ a gə̀ ə̀ Gidyòn ə zhwi ə wen, tìʔ ə Gidyòn gàʔ, “Byì ghɔ̀ a ghə̀ŋ ə tàŋkə̀ ə gyàmtə̀ nyìngòŋ ə̀ ghə̀ŋ a? Mu ghə̀ dìʔ nyìngòŋ ghə̀ gyàmtə̀ əwen ə wen! ” Tà àndə ghə̀ gàʔ a lì vəwenə kye və ko zhwi Gidyòn.

Viʔi Midyàn ə bɛ̀ vì ə tsoŋ əfo ə vunə Isrèl. Vəwenə ndìʔ tà a kədɨ̀ŋ kèn la və zì və taŋ. Gidyòn dzàŋ viʔi Isrèl la və tsèntə̀ ə̀ soyn vəwenə. Gidyòn gàʔ à Nyìngòŋ la ghə̀ jìʔ əchwiʔtə əbò à yì ti yì kɨ la Nyìngòŋ a gyàmtə̀ yì ə bwòŋsə̀ viʔi Isrèl.

Mbì kəchwiʔtə ə̀ ndìʔ la Gidyòn a nyə̀ŋsə̀ gwʉ̀ ə̀ byìnjɨ̀ a nse ə̀ gàʔ a Nyìngòŋ la ghə̀ nè təgiʔ tə shiə tà tsu kə tə à kùm ə̀ nse. Nyìngòŋ ə̀ nnèə̀ li. Əchʉʔ ə njɨ li ghə̀ bɛ̀ gàʔ a Nyìngòŋ la təgiʔ tə shiə tà a nse kə tə a kùm gwʉ̀ ayì. Nyìngòŋ bɛ nè ta li. Əchwiʔtə vənə əbò və nnèə̀ li Gidyòn byɨmə la Nyìngòŋ a gyàmtə̀ ə wen ə ghə̀ bwòŋsə̀ vunə Isrèl fa viʔi Midyàn.

Vəsugèʔ və Isrèl nkam ə̀ nju səbò a məwum ə̀ ntaʔ (32,000) nvì li a Gidyòn, Nyìngòŋ tensə a wen la vəwenə ghoʔ li nchò. Gidyòn bwìnsə̀ tɨm ə nkam ə̀ nju səbò a məwum ə̀ mbò ( 22,000) a və mfwànə̀ ə soyn. Tɛ lì Nyìngòŋ bɛ̀ gàʔ a wen la vəsugèʔ avyi ghoʔ li nchò. Gidyòn bwìnsə̀ vəwenə ə̀ kye tà vəsugèʔ təghɨ tə̀ taʔ (300).

Nə̀nchʉʔə ayì Nyìngòŋ gàʔ a Gidyòn, “Shiə ə̀ djʉ̀ a kəbyə̀ kə viʔi Midyàn byì àndə wù a zhʉ kənyʉ̀ a vəwenə gàʔə̀ kèn la wù ə̀ bɛ a fwàyn” Nə̀nchʉʔə ayì, Gidyòn shiʔə ə̀ djʉ̀ a kəbyə̀ akyì ə̀ zhʉ tà àndə sugə̀ʔ ə̀ Midyàn ə shə̀ʔtə̀ jòm à wùndoŋ ə̀ wen a ghə̀ yì tsi ə wen. Wùndoŋ ə̀ wen ayì gàʔ, “Jòm yèn dìʔ la vəsugèʔ və Gidyòn a zhɨ vəsugèʔ və Midyàn a əghoŋ yèn!” Gidyòn zhʉ ə̀ kuʔsə Nyìngòŋ.

Gidyòn bwìnə̀ kuʔ à vəsugèʔ və wen ə̀ ku əsoŋ, ntòyn ə̀ kətsoʔ, nə̀ nkàʔtə̀ à noʔə sugèʔ kɔ. Vəwenə bùm ə̀ kaʔ kəbyə kə vəsugèʔ və Midyàn. Vəsugèʔ və Gidyòn vyi təghɨ tə̀ taʔ (300) lì nkiʔ nkàʔtə̀sə nə̀ vəntoyn a və ngyàmtə̀ la kə viʔi Midyàn yen tà àndə nkàʔtə̀ ashì sə banə.

Vəsugèʔ və Gidyòn ə mbvɨ̀tə̀ li ə̀ zhwilə vəntoyn avyi tà əzhʉ ə̀ mùʔ nkàʔtə̀ shìsə bayn. Vəwenə zì ə toŋ təsoŋ tyì bɛ zɨmə, “Əghoŋ a Yawè, əghoŋ a Gidyòn!”

Nyìngòŋ ə̀ nnèə̀ li tətof tə viʔi Midyàn tə sàskə̀, vəwenə zìtə̀ sə̀ soynə zhwilə̀ vələ̀mə̀ və vəwenə. Tà a əzhʉ ayi və dzàŋ viʔi Isrèl vətsenə və və vì gyàmtə̀ dzɨ̀m viʔi Midyàn avyi. Və nzhwi li fa tsu ə̀ dzɨ̀m vətsenə və və fʉ fa əloʔ ə Isrèl. Və nzhwi viʔi Midyàn nkam ə̀ ghɨ nə̀ nkam məwum ə̀ mbò (120,000) tà zoyn ayì. Nyìngòŋ ə̀ mbwòŋsə̀ li Isrèl.

Vəwenə nkəŋə ə ghaʔ Gidyòn a fòyn. Gidyòn chen, ə̀ gàʔ la vəwenə ku mfɨŋsə gol sətsen a vəwenə yì shitə fa viʔi Midyàn àvyì. Vəwenə nku li kədɨ̀ŋ kə gol a Gidyòn.

Gidyòn lyɨ gol ayì ə̀ shìtə̀ nges ə njisə tsu sə kə̀ʔə̀ tà a nə̀ shisə a kəchʉ kə nshə̀ʔtə̀ sə əngə̀ŋ ə̀ Nyingòŋ ə̀ mmòʔə̀. Viʔi Isrèl ə zìtə̀ sə̀ kuʔsə tà sə̀ à dìʔ Nyìngòŋ. Nyìngòŋ bɛ̀ bwoynsə Isrèl fambu a vəwenə kuʔsə nyìngòŋ ə̀ kəjàŋ. Nyìngòŋ kye viʔi kəbàyn və zhɨ vəwenə a əghoŋ. Vəwenə kaʔ ə̀ bɛ̀ lòyn Nyìngòŋ ghə̀ bɛ̀ tɨm wìʔ ə ghə̀ vì ə̀ bwòŋsə̀ vəwenə.

Vəwenə nè ta lə̀ à ghayn tà a kədɨ̀ŋ: Viʔi Isrèl ə nnè ə mbyɨ, Nyìngòŋ ə̀ bwoynsə vəwenə, vəwenə ə̀ kwitə ə̀ dì à Nyìngòŋ ə̀ loyn ə wen, Nyìngòŋ ə̀ tɨm wìʔ ghə̀ ə vì gyàmtə̀ vəwenə. Nyìngòŋ ə̀ ntɨm li viʔi tà a kədɨ̀ŋ a ngwʉ̀ʔsə a ngwʉ̀ʔsə və vì gyàmtə̀ vunə Isrèl ə̀ bwòŋsə̀ vəwenə fa viʔi kəbàyn ə vəwenə.

Vəwenə nkaʔ li ə̀ gàʔ la Nyìngòŋ ku fòyn à vəwenə tà a nə̀ ətɨm ə tsenə və. Vəwenə nkəʔə fòyn a ghə̀ njə̀fə̀ bɛ̀ to a jì a ghə̀ nzì ghə̀ lyɨ vəwenə ə̀ djʉ̀ a əghoŋ. Nyìngòŋ ə̀ nko kòŋ kənyʉ̀ a vəwenə nkəʔə a lì ghə̀ ku fòyn tà àndə vəwenə mbèmə̀ li.

Fətitì fa nwàʔlə̀ ə̀ Nyìngòŋ//: Jɔjìs 1-3; 6-8//