9. Nyìngòŋ Dzàŋ Musìs

Jòsef ə̀ mpfɨ viʔi ə wenə sè ta Igyìb. Vəwenə mfàŋ tsu ə̀ sə̀ bwiə ghoʔə djʉ̀ə̀. Ngwʉ̀sə sə chò ə ghoʔtə mu vəwenə kiʔi li ngwàʔ ə̀ wàyn tà a kədɨ̀ŋ. Və ndzàŋə̀ vəwenə la vunə Isrèl.

Ngwʉ̀sə sə nchò li ə zaʔə təghɨ tà a kədɨ̀ŋ vunə Isrèl ə ghoʔ noʔə̀ nànto. Kə ntsi li ə̀ chò viʔi Igyìb ə lyèsə̀ Jòsef nə̀ gyàmtə̀ a ghə̀ nku à vəwenə. Viʔi Igyìb ə zì ə̀ sə̀ fwànə̀ vunə Isrèl byì tà àndə vəwenə̀ nghoʔə nànto. Kə ghoʔ Ferò a ghə̀ ndìʔ fòyn ə̀ Igyìb ghə̀ nè la vunə Isrèl ndìʔ əkòs ə viʔi Igyìb.

Viʔi Igyìb ə nnèə̀ vunə Isrèl ə shyèʔə̀ kəkòs noʔə̀ nànto, bwomə aloʔ, bwomə tɛ̀ ətɨm ə mpfensə. Əshyèʔ ə̀ to ghə̀ ayì ə nè vunə Isrèl sè tà a ngəʔ, a lì Nyìngòŋ bwaʔsə vəwenə nə̀ vunə ta kədɨ̀ŋ.

Ferò ə̀ nyen li jì a vunə Isrèl ə mbwi fa tsu ghoʔə djʉ̀ə̀ tà djʉ̀ə̀ ghə̀ chòsə̀ əsoʔ la viʔi Igyìb ə mòʔlə̀ vunə vəbwaʔ ə Isrèl noʔə̀ vətsèm a muʔu mə̀ Naìl ə̀ zhwilə.

Wùwì ə̀ Isrèl ətsen bwi wàyn ə wùlɨm a mənsti ayì. Wenə̀ lɨm ə wen tàŋkə̀ ə lyòmtə̀ wàyn ayì fa viʔi Igyìb kə və zhwi.

Kə nghoʔ li vətìʔ və wàyn ayì vəwenə kəŋə nkyè ə̀ wye ə wen tsu ə̀ djʉ̀ ə̀ lyəŋsə a muʔu mə̀ Naìl ti kə və zhwi ə wen. Lə̀mə̀ ə̀ wen ə wùwì ə totə lyòmtə̀ ə̀ sə̀ lyè jì a ghə̀ a lyəŋə djʉ̀.

Wàyn ə̀ wùwì ə Ferò nyen li nkyè shiə ghə̀ sə lye a dìʔ wàyn à yì ə tin. Ghə̀ nkòŋə̀ li wàyn ayì ə̀ lyɨ̀ wen ə̀ djʉ̀. Ghə̀ nkəŋ li wùwì Isrèl a ghə̀ nzì ghə̀ ə nyoŋsə wàyn ayì, ə̀ sə kəŋ ə̀ fʉ̀ ta əwen ə̀ lì wen kèn la ghə̀ ə kɨ li. Lì wàyn ayì ntsuʔ li ə̀ wen fa əzhwin ə̀ bwìnsə̀ ku ə wen a wàyn ə̀ wùwì ə Ferò ghə̀ chʉ əzhiʔ ə wen la Musìs.

Əchʉʔ ətsenə ghə, mu Musìs ə totə li, ghə̀ yen wù Igyìb ətsen ghə̀ ghòmə̀ wàyn ə̀ Isrèl ətsen. Kə ghoʔ Musìs ghə̀ tàŋkə̀ ə gyàmtə̀ lə̀mə̀ wen ayì.

Musìs ə̀ nkwòʔə̀ la wìʔ ə ko yenə ghə̀ zhwi wù Igyìb ayì ə̀ bvɨ̀mə̀, a lì wìʔ ə yen kənyʉ̀ a Musìs ə nnè.

Ferò ə̀ nzhʉ li kənyʉ̀ a Musìs ə nnè ghə̀ kəŋ jì ə zhwi wen. Musìs ə̀ nyɨŋ li fa Igyìb ə̀ djʉ̀ a kəshi kətsen kə zɨmə la kwas ə̀ lyòmtə̀ fa vəsugèʔ və Ferò.

Musìs ə̀ nkaʔkə li ntsɨ̀ŋə̀ ə̀ byisə tsu. Ghə̀ nlam li wùwì wenə̀ wen bwi vunə ə lyʉmə vəbò.

Kətsi kətsen Musìs ə̀ tsɨ̀ŋə byisə ə wen ə̀ sə tsèn kəshi kə ətoʔ kətsen kə zìtə̀ sə̀ fwiə. Əzhiʔ nkuʔə kèn la ətoʔ ə fwiə. Musìs ə̀ ndjʉ̀tə̀ li ə boʔsə ə lye la à dìʔ kənyʉ̀ kəkɔ̀ lɔ. Ghə̀ boʔsə ə̀ djʉ̀ gɨ̀ ə Nyìngòŋ gàʔ a wen, “Musìs, tsuʔtə gʉ shə̀sə. A dìʔ kəshi kə kuʔsə Nyìngòŋ a wu tiə tsu lì.”

Nyìngòŋ gàʔ, “Mà ə yen li ngəʔ ə̀ vunə vwomə yenə. Mà a tɨm wù a Ferò ti wù djʉ̀ ə̀ shìsə̀ vəwenə fa ngəʔ a Igyìb. Mà ə ku əloʔ ə Kanàn à vəwenə, əloʔ yì a mà nkanə̀ la mà ə lu ku a Abàham, Azìk, nə̀ Yàkob lì.”

Musìs ə̀ mbə̀mə̀, “Mà gàʔ la ghɔ̀ à vəwenə a əzhʉ a sətsèn və bə̀m la à tɨm ndə ntɨm mò a?” Nyìngòŋ gàʔ, “MÀ DÌʔ MÒ A MÀ DÌʔ. Gàʔə à vəwenə, ‘À tɨm MÀ DÌʔ ə tɨm wù.’ Ə bɛ̀ gàʔ à vəwenə, ‘MÀ DÌʔ Yawè, Nyìngòŋ ə̀ vətìʔ ə vyəŋə Abàham, Azìk, nə̀ Yàkob.’ A lə̀ əzhiʔ ə ghomə lə̀.”

Musìs ə̀ mfwànə̀ ə djʉ̀ a Ferò byì àndə ghə̀ mɨʔtə. Nyìngòŋ tɨm lə̀mə̀ wen ə Aròn ə ghə̀ djʉ̀ ə gyàmtə̀ wen. Nyìngòŋ shə̀ʔtə̀ a Musìs wenə̀ Aròn la Ferò ə ne nchənə ə mòʔtə̀ vunə Isrèl ə və djʉ̀.

Fətitì fa nwàʔlə̀ ə̀ Nyìngòŋ//: Eksedòs 1-4//