13. Məkàyn mə̀ Nyìngòŋ wenə̀ Isrèl

Nyìngòŋ ə̀ njèʔsə̀ li vunə Isrèl avyi fa muʔu yì ə̀ chò fa əshi zɨm və ətsenə və ə djʉ̀ a pfèn ətsen və dzàŋə nə̀ Sanà. A dìʔ tsu a Musìs ə̀ nyen əzhiʔ yi ghè bolə kèn la ətoʔ ə fwi li. Vunə Isrèl mbwòm li təto tə vəwenə a chi pfèn ayì.

Nyìngòŋ ngàʔə̀ li à Musìs nə̀ vunə Isrèl, “Sətsèn ghə̀ŋ zhʉ mò ə̀ tsì a jì a mà kəŋə, ghə̀ŋ a ndìʔ viʔi ə vwomə, dìʔ əloʔ juŋə ghə a mà kòŋə̀.”

Nyìngòŋ ə̀ nku li məntsi ntaʔ vəwenə shìtə̀ tətɨm tə vəwenə, ghə̀ shiʔə ə̀ vì a pfèn ə Sanà, əwʉ bwaynkə, fəlɨʔ fə kuʔə, təsoŋ tə gàʔə̀. A ndìʔ tà Musìs wenə nyɨŋ a ghə̀ nzì ghə̀ kuʔ a kwì ə pfèn ayì.

Nyìngòŋ mə̀ ku təsoʔ à wen ə̀ gàʔ, “Mà dìʔ Yawè, Nyìngòŋ ə̀ ghə̀ŋ, a ghə nshìsə̀ ghə̀ŋ fa kəkòs a Igyìb. Kə ghə̀ŋ a kuʔsə vənyìngòŋ vətsenə və.”

“Kə ghə̀ŋ a shìtə̀ vənyìngòŋ ə̀ nkuʔsə, byì tàndə mò, Yawè, Ma ə ko kòŋ ə gə̀tə̀ kuʔsə ə ghomə. Kə ghə̀ŋ a dzàŋ əzhiʔ ə ghomə tà kəjàŋ. Kə ghə̀ŋ à shyèʔ a kətsi kə kuʔsə ə̀ mò. Ghə̀ŋ shyèʔ təshyèʔ ə̀ tyən məntsi ə̀ ntʉ̀fə, byì a məntsi ə̀ sòmbo dìʔ kətsi ə ghə̀ŋ zhùtə̀ ə kwòʔtə byì mò.”

“Zhu tìʔ ə̀ wù bènə̀ lì ə̀ wù. Kə a zhwi wìʔ. Kə a tsi nə̀ wì ə̀ wìʔ bènə̀ lɨm ə̀ wìʔ. Kə a tsoŋ. Kə a zhò ə ndzɨ̀ŋ. Kə a kəŋ jì ə lyɨ̀ wì ə̀ wùntə̀ʔ ə̀ wù, ko kəbəŋ kə ə wen, ko noʔə̀ kəfo kə wen kətsen.”

Nyìngòŋ mə̀ nyòʔ təsoʔ atèn ə̀ wum a ngùʔ sə̀bò ə̀ ku a Musìs. Nyìngòŋ bɛ̀ ku təsoʔ tà a kədɨ̀ŋ la vəwenə ndzɨ̀mtə̀. Nyìngòŋ gàʔ la sətsèn vəwenə wʉ təsoʔ atyì yi a bwaʔsə ə̀ bɛ̀ tsɨ̀ŋ vəwenə. Sətsèn vəwenə to kəchʉ Nyìngòŋ à bwoynsə vəwenə.

Nyìngòŋ ə̀ mbɛ nshə̀ʔtə̀ jì ə vəwenə bwom əngə̀ŋ ə̀ wen fa tsu. A ndìʔ əngə̀ŋ ə̀ ntsèntə̀, kiʔ vətin və aloʔ vəbò, mu və gə̀sə̀ nə̀ njisə. A nzì à kwen tà kəchʉ kə nshə̀ʔtə̀ sə əngə̀ŋ ə̀ Nyìngòŋ a tyì əngə̀ŋ fa bàm ə njisə ayì, fambu a Nyìngòŋ ə̀ ntsiə tsu.

Noʔə̀ ndə̀ a ghə̀ nkwàʔə̀ əsoʔ ə Nyìngòŋ nzì ghə̀ vì nə̀ nyàm a əchʉ əngə̀ŋ ə̀ ntsèntə̀ ə̀ ku a Nyìngòŋ. Sətsèn wìʔ vì nshə̀ʔtə̀ ə zhwi nyàm ayì ə̀ nyùʔ a kwì ə chɨ. Mənlyuŋ mə̀ nyàm amyì ə̀ nshʉ̀ ə mbyɨsə wìʔ ayì ghə̀ ə bɛ sə dìʔ a nkàyn a əshɨ ə Nyìngòŋ. Nyìngòŋ ə̀ ntsuʔ li lə̀mə̀ Musìs ə Aròn, nə̀ vunə ə ənòyn ə̀ Aròn la vəwenə ndìʔ nshə̀ʔtə̀sə sə wen sə.

Viʔ vətsèm ə mbyɨmə li la vəwenə a wʉ təsoʔ atyì a Nyìngòŋ ə̀ nku lì, ti ndìʔ viʔi ə wen. Tà kəntə̀mə kə əzhu kə sə chò, vəwenə zì ə̀ sə̀ toə kəchʉ à Nyìngòŋ nèə̀ mbyɨ noʔə̀ jì ə byɨfə.

Musìs ə nkuʔ li a kwì ə pfèn ə Sanà ə̀ sə̀ dìʔ tsu məntsi tà a kədɨ̀ŋ gàʔə̀ wenə̀ Nyìngòŋ. Viʔi Isrèl kə̀ʔ ə̀ wen ə̀ bwaʔ ə̀ vì nə̀ gol a Aròn la ghə̀ shìtə̀ nyìngòŋ nə̀ wen à vəwenə!

Aròn ə̀ nshìtə̀ li nyìngòŋ ghə̀ kə̀ʔə̀ ta nə̀ wàyn ə̀ nyàm. Vunə Isrèl nzìtə̀ li sə̀ kuʔsə wen ku kəku a wen! Tin ə Nyìngòŋ ə̀ mfwi li noʔə̀ nànto byì mbyɨ ayì ghə̀ wʉ la ghə̀ a zhwilə vəwenə. Musìs ə̀ njɨ̀mə̀ li ə̀ nsensə Nyìngòŋ ghə̀ kusə nshinsə ə̀ kye vəwenə.

Musìs ə̀ nshiʔə yen nyìngòŋ ayì, kənyʉ̀ əkyikə zaf ə wen ghə tùʔ ngùʔ shìsə a Nyìngòŋ yì nyòʔ təsoʔ tyì tsu li ə̀ zhwilə.

Musìs ghòm nyìngòŋ ayì ghə̀ kaʔkə a kəbʉ, ghə̀ wye a chì à muʔu ə̀ gàʔ viʔi Isrèl ə nyʉ. Nyìngòŋ ə̀ ntɨm li əkwaʔə a vəwenə ngwàʔ ə̀ wìʔ pfƗkə.

Musìs ə̀ mbwìnə̀ ə̀ kuʔ a kwì ə pfèn ayì ə̀ jɨ̀m la Nyìngòŋ lyèsə̀ ə̀ ku vəwenə. Nyìngòŋ ə̀ nzhu li Musìs ə̀ lyè sə̀ ə̀ ku vəwenə. Musìs ə̀ mbwìnsə̀ nyòʔ təsoʔ tyì ə̀ wum a kwì ə ngùʔsə fisə. Nyìngòŋ mə̀ lyɨ̀ vunə Isrèl fa pfèn ə Sanà sə̀ djʉ̀sə̀ a əloʔ yì a ghə̀ nkəŋə ə ku à vəwenə.

Fətitì fa nwàʔlə̀ ə̀ Nyìngòŋ//: Eksedòs 19-34//