28. Wùmbvòʔ ə̀ Wìʔ ə Ghoʔə

Kətsi kətsen wùmbvòʔ ə̀ wìʔ ə̀ ghoʔə ətsen vi a Yesù ə̀ bə̀m, “Njìʔsə̀ ə̀ jùŋə, Mà zì mà nè a lɛ ti lu kiʔə əbwòŋ a ghə lu faŋ əghayn ə̀ mùʔ a?” Yesù bə̀m a wen, “Byì ghɔ̀ a wù dzàŋə̀ mò nə̀ wujùŋə a? Wujùŋə dìʔ tà mùʔ, à dìʔ Nyìngòŋ. Mu wù kəŋə ə kiʔə ə bwòŋ a ghə lu faŋ əghayn ə̀ mùʔ, wù wye təsoʔ tə Nyìngòŋ.”

Ghə̀ bə̀m, “à dìʔ təsoʔ tə Nyìngòŋ təkɔ̀ a mà dìʔə̀ wʉ a?” Yesù bwìnsə̀, “Kə a zhwi wìʔ. Kə a tsi nə̀ wì ə̀ wìʔ. Kə a tsoŋ. Kə a zhò ndzɨ̀ŋ . Kuʔsə tìʔ ə̀ wù bɛ̀nə̀ lì ə̀ wù, ə̀ bɛ̀ kòŋ lə̀mə̀ wù tà àndə wù kòŋə̀ əwen ə wù.”

Wìʔ ayì gàʔ, “Mà ə wʉ li təsoʔ atèn noʔə̀ tətsèm noʔə̀ fa əchʉʔ a mà dìʔ wànjə̀. Mà zì mà bɛ nè ghɔ̀ ti lu bwòŋ a?” Yesù kyiʔə wen ə̀ kòŋə̀ wen.

Yesù bwìnsə̀, “Mu wù kəŋə ə layn, wù djʉ̀ə̀ baʔlə əfo ə vyə noʔə̀ ətsèm ə ku əko ə yi à viʔi kəmfem, ə̀ mə bwìnə̀ vì ə ndzɨ̀mtə̀ mò. Əghoʔə lu ndìʔ à wù a əkaŋ.”

Wughoʔə ayì ə nzhʉ li kənyʉ̀ a Yesù ngàʔə̀, kə kwen a wen əwen ghə̀ bwaʔ, byì a ghə̀ ndìʔ noʔə̀ wù əko kèn la ghə̀ nkòŋə̀ əku əfo ə wen noʔə̀ ətsèm. Ghə̀ ə nlù li fa bɛn ə̀ Yesù ə̀ pfwoə.

Yesù mə̀ gàʔ à ndzɨ̀mtə̀sə wen, “Kə to ə wù əko kwen a kəshi kə fòyn ə̀ Nyìngòŋ! A dìʔ nə̀mwìn, kə bwaʔmə ənshen ə cho fa əshɨ ə nsoʔ chòə̀ ə wù əko kwen a kəshi kə fòyn ə̀ Nyìngòŋ.”

Ndzɨ̀mtə̀sə wen shì zhʉ kənyʉ̀ akèn a Yesù gàʔə̀ kə ghoʔ vəwenə vəwenə gàʔ, “A lə̀ lu bwòŋ ndə?”

Yesù kyiə ndzɨ̀mtə̀sə wen ashì ə̀ gàʔ, “Kə toə a viʔi, a lì à Nyìngòŋ, kənyʉ̀ kə to kə ko dìʔ.”

Bità gàʔ a Yesù, “Yès ə wʉsə li noʔə̀ əfo ətsə̀m ə dzɨ̀mtə̀ wù. Yès ə lu se ghòʔə̀?”

Yesù bwìnsə̀, “Noʔə̀ ndə a ghə̀ kye li kəbəŋ kə wen, vələ̀mə̀ və wen, vətìʔ və wen, vunə ə wen, nə̀ əfo ə wen byì mò, ghə̀ ə lu kiʔə a ghayn əghɨ ə bɛ kiʔə əbwòŋ a ghə lu faŋ ə ghayn ə̀ mùʔ. A lì ə̀ nghoʔ a ghə diʔə mbì ə lu ndìʔ ə̀ bam, ə̀ nghoʔ a ghə diʔə bam ə lu ndìʔ ə̀ mbì.”

Fətitì fa nwàʔlə̀ ə̀ Nyìngòŋ//: Machò 19:16-30; Mak 10:17-31; Luk 18:18-30//