27. Fətitì fə Sàmalitàyn ə Jùŋə

Əchuʔ ə tsenə ghə wutsen a ghə̀ nkɨə təsoʔ tə Vəju noʔə̀ nkàyn ghə̀ vi a Yesù ə mwòmsə̀ ə wen, ghə̀ bə̀m, “Njìʔsə̀, mà zì mà nè a lɛ ə kwen a kəshi kə fòyn ə Nyìngòŋ a?” Yesù bwìnsə̀ bə̀m, “Və nyòʔ la ghɔ̀ a əsoʔ ə Nyìngòŋ a?”

Wìʔ yì a ghə̀ nkɨə təsoʔ tə Vəju noʔə̀ nkàyn bwìnsə̀ la əsoʔ ə Nyìngòŋ ə gàʔ, “Kòŋə̀ Nyìngòŋ ə̀ wù nə̀ ətyɨm ə wù ətsèm, nə̀ ŋàŋ ə̀ wù ətsèm, nə̀ kəzhwì ə kyə̀ kətsèm. Ə bɛ̀ kòŋ lə̀mə̀ wù tà àndə wù kòŋə̀ ə̀ wen ə wù.” Yesù bwìnsə̀, “Wù ə gàʔə̀ li nə̀mwìn! Nèə̀ ta li wù a bwòŋ.”

Wìʔ ayì a ghə̀ nkɨə təsoʔ tə Vəju noʔə̀ nkàyn lì nkəŋə jìʔ la yì dìʔə̀ nges ə̀ wìʔ, ghə̀ bə̀m, “Lə̀mə̀ ghom dìʔ ndə?”

Yesù bwìnsə̀ wìʔ ayì a ghə̀ nkɨə təsoʔ tə Vəju noʔə̀ nkàyn nə̀ fətiti fə. “Ju ətsen ə̀ nlùə̀ fà Jèlusalèm ə̀ sə̀ djʉ̀ə̀ a Jèlikò.”

“Wìʔ ayì njèʔə̀ djʉ̀, vətsòŋ ə ghaʔ ə wen a jì. Və nshitə li əfo ə wen noʔə̀ ətsèm ə̀ ghòmə̀ wen ghə̀ sə̀ boʔsə pfɨ. Vəwenə mə̀ mòʔtə̀ wen ə̀ nyɨŋkə.”

“A sə laʔtə, njìʔsə̀ ətsen à dìʔ Ju vì chò fa jì ayì. Njìʔsə̀ ayì nyen li wìʔ yì a və ntsoŋ fa wen ə̀ ghòm ghə̀ sə̀ laʔtə pfɨ li, ghə̀ jàŋ ə̀ chò djʉ̀ a əshə ə jì ətsene yi ə̀ sə̀ djʉ̀ə̀ kèn la ghə̀ə gyàmtə̀ li wìʔ ayì.”

“A sə laʔtə, wùngə̀ŋ ə̀ Levì ətsen sə̀ chòə̀ fa jì ayì (Viʔi əngə̀ŋ ə̀ Levì dìʔ Vəju a və ngyàmtə̀ vənjìʔsə̀ a əngə̀ŋ ə̀ Nyìngòŋ). Wùngə̀ŋ ə̀ Levì ayì mbɛ jàŋ ə̀ chò djʉ̀ a əshə ə jì ətsene yi ə̀ sə̀ djʉ̀ə̀ kèn la ghə̀ ə gyàmtə̀ li wìʔ ayì a və ntsoŋə fa wen ə̀ ghòm lì.”

“Wìʔ a ghə̀ mbɛ̀ vìə̀ ndìʔ Sàmalitàyn. (Vəsàmalitàyn ə̀ ndìʔ vunə ə Vəju a və nlamə fa təloʔ tə kəjàŋ. Vəsàmalitàyn nə̀ Vəju mbànə̀ təwen tə vəwenə.) Sàmalitàyn ayì nyen li Ju ayì ə̀ kusə nshinsə a wen. Ghə̀ gyàmtə̀ ə̀ kwiʔ təfyɨŋ tə wen.”

“Sàmalitàyn ayì mbyèʔə̀ li wen à wen nduŋkyì ə̀ djʉ̀ nə̀ wen a əngə̀ŋ a viʔi nlòʔə̀ tsi tsu ə̀ tùʔmə̀ nə̀ wen.”

“Əchuʔ ə nlayn li ə Sàmalitàyn ayì bɛ njèʔə̀ djʉ̀. Mimbu ghə̀ sə lù ghə̀ ku əko à wù ə̀ngə̀ŋ ayì ə̀ gàʔ, ‘Tùʔmə̀ nə̀ wen noʔə̀ nkàyn. Sətsèn əko yenə dìʔ kə kwʉ̀ʔ mà ne lwinsə a əzhʉ a mà bwìnə̀.’”

Yesù mə̀ bə̀m à wìʔ ayì a ghə̀ nkɨə təsoʔ tə Vəju noʔə̀ nkàyn, “Wù kwòʔtə̀ la ghɔ̀? À dìʔ wìʔ kɔ a ntìntìn ə̀ viʔ və̀nə vətaʔ a ndìʔ lə̀mə̀ wìʔ yì a və ntsoŋə fa wen ə̀ ghòmə̀ wen lì a?” Ghə̀ bwìnsə̀, “Wìʔ yì a ghə̀ ngyàmtə̀ wen li.” Yesù gàʔ a wen, “Nkàyntə̀ wù djʉ̀ ə̀ bɛ̀ nè ta lì.”

Fətitì fa nwàʔlə̀ ə̀ Nyìngòŋ//: Luk 10:25-3//