42. Yesù Bwìnə̀ Kuʔ a Əkaŋ

A kətsi a Yesù nlùə̀ fa əpfɨ, ndzɨ̀mtə̀sə wen səbò sə ndjʉ̀ a ntə̀ʔ ətsen a mboʔsə. Vəwenə njèʔə̀ djʉ̀ə̀ gàʔə̀ byì kənyʉ̀ a kə fʉ̀ nə̀ Yesù. Vəwenə nkɨə la ghə̀ ndìʔ Mèzayà, sətsèn və bòŋsə̀ zhwìə wen. Luwèn kyìʔi vyi ngàʔ la ghə̀ ə lù li fa əpfɨ. Vəwenə nko mbɛ̀ kɨ kənyʉ̀ ə kwòʔtə̀.

Yesù kwetə vəwenə ə̀ sə̀ jèʔə̀ djʉ̀ə̀ wenə̀ vəwenə, a lì vəwenə nko kɨ la à dìʔə̀ wen. Ghə̀ bə̀m la vəwenə gàʔə̀ byì ghɔ̀ lɔ, vəwenə shə̀ʔtə̀ ənyʉ̀ ə̀ kanə vyi noʔə̀ ətsèm a və fʉ̀ a Yesù a məntsi amyì. Vəwenə nkwòʔə̀ la vəwenə ngàʔə̀ à wùghayn a ghə̀ ə nko kɨ ənyʉ̀ a və nchòə̀ a Jèlusalèm.

Yesù shìtə̀ shə̀ʔtə̀ kənyʉ̀ a vəwenə a kə dìʔ a əgàʔ ə̀ Nyìngòŋ byì Mèzayà. Ghə̀ dzɨ̀ŋtə̀ vəwenə la nshə̀ʔtə̀ ə̀ Nyìngòŋ ə ngàʔə̀ li la Mèzayà ə lu yen ə ngəʔ ə və zhwiə wen, ghə̀ lù fa əpfɨ a bàm ə məntsi ə̀ ntaʔ. Vəwenə sə kwen a ntə̀ʔ yì a vəwenə ndjʉ̀ tsu mu əchʉʔ ə jɨ li.

Lyʉmə vyi vəbò gàʔ la Yesù vì ə̀ tsi à vəwenə ə̀əngə̀ŋ. Ghə̀ djʉ̀. Vəwenə sə nzhɨ əfozhɨvə mpfwomə, Yesù lyè kebayn kə mənkalə̀, ə̀ ku kəzòŋ kə Nyìngòŋ, ə̀ tin. Vəwenə mə̀ kɨ la à yì ndìʔ Yesù. Tà a əzhʉ ayì, ghə̀ lè fà vəwenə əshɨ.

Lyʉmə avyi vəbò və gàʔ, “A yì ndìʔ Yesù lì! A yì nè kənyʉ̀ əkyikə tətyɨm tə yuwù tə sə lɨ̀mə̀ a əzhʉ a ghə̀ yì nshə̀ʔtə̀ byì əgàʔ ə Nyìngòŋ a yuwù!” Tà a əzhʉ ayì, vəwenə bwìnə̀ djʉ̀ a Jèlusalèm. Vəwenə zaʔə tà zaʔə, ə̀ shə̀ʔtə̀ à ndzɨ̀mtə̀sə Yesù, “Yesù ə lù li fa əpfɨ! Yès ə yen li wen!”

Tà àndə ndzɨ̀mtə̀sə Yesù sə ngàʔə̀, Yesù bvɨ̀tə̀ fʉ̀ a əngə̀ŋ ayì ə̀ gàʔ, “Mbwaʔmə̀ ndìʔ à ghə̀ŋ!” ndzɨ̀mtə̀sə wen sə sə̀ kwòʔə̀ la ghə̀ dìʔ mpfɨ ə nse. Yesù bə̀m, “Ghə̀ŋ ə fwànə̀ ghɔ̀ bɛ momə a? Ghə̀ŋ yen avu əghomə nə̀ afwin aghomə a. Vəmpfɨ və nse ko kiʔ təwen tà àndə mà kiʔ lə̀.” Ə jìʔ à vəwenə la ghə̀ ə ko dìʔ mpfɨ ə nse, ghə̀ bə̀m kəfo ə zhɨ. Vəwenə ku kəshi kə shʉ̀ ə pfèə a wen, ghə̀ pfɨʔ.

Yesù gàʔ, “Mà ə ngàʔ li à ghə̀ŋ la noʔə̀ ghɔ̀ a və nyòʔə̀ byì mò a nwàʔlə̀ ə̀ Nyìngòŋ ə lu fʉ̀.” Ghə̀ bòʔtə̀ təchɨm tə vəwenə ti vəwenə zhʉ əgàʔ ə Nyìngòŋ a nkàyn. Ghə̀ gàʔ, “Kə dìʔ a nwàʔlə̀ ə̀ Nyìngòŋ la Mèzayà ə lu yenə ngəʔ, ə pfɨ, ə lù fa əpfɨ a bàmə məntsi ə ntaʔ.”

“Kə dìʔ a nwàʔlə̀ ə̀ Nyìngòŋ la ndzɨ̀mtə̀ shomsə lu shə̀ʔtə̀ a viʔi la noʔə̀ ndə̀ byɨmə ə̀ kwitə ti bwòŋ fa wenə mbyɨsə. Vəwenə a zìtə̀ a Jèlusalèm, ə djʉ̀ a chì mbyi yèn noʔə̀ ətsèm. Ghə̀ŋ ə yen li ənyʉ̀ vənə.”

A chì məntsi məwum ə̀ nkàʔ, Yesù vì à ndzɨ̀mtə̀sə wen aghayn tà a kədɨ̀ŋ. Ghə̀ ə nvì a viʔi təghɨ tətàyn (500) tà əzhʉ əmùʔ kətsi kətsen! Ghə̀ ə njìʔə̀ li a ndzɨ̀mtə̀sə wen la ghə̀ ə lù li fa əpfɨ, ə̀ bɛ̀ gàʔ à vəwenə byì kəshi kə fòyn ə Nyìngòŋ.

Yesù gàʔ a ndzɨ̀mtə̀sə wen, “Nyìngòŋ ə ku li noʔə̀ kəjoʔ kətsèm a əkaŋ bɛ̀nə̀ a nse à mò. Ghə̀ŋ djʉ̀, ə̀ nè viʔi byɨmə à mò, ghə̀ŋ ku muʔu à vəwenə a əzhiʔ ə̀ Tìʔ, ə̀ Wàyn, nə̀ Kəzhwì kə nwoʔə kə, ə̀ jìʔsə̀ ənyʉ̀ à vəwenə noʔə̀ ətsèm a mà jìʔsə̀ à ghə̀ŋ. Ghə̀ŋ kɨ la mà a dìʔ vəghəŋ noʔə̀ mənzhʉ əntsèm.”

Məntsi nchòə̀ li məwum ə̀ nkàʔ fà kətsi a Yesù nlù fa əpfɨ, ghə̀ gàʔ à ndzɨ̀mtə̀sə wen, “Ghə̀ŋ sè tà a Jèlusalèm ə̀ zaʔə fa əchʉʔ a Tìʔ ə̀ ghom ə lu ku kəjoʔ à ghə̀ŋ a əzhʉ a Kəzhwì kə nwoʔə kə lu vì à ghə̀ŋ.” Yesù kuʔ a əkaŋ, mbòʔ chiʔtə wen fà vəwenə. Yesù nwʉʔmə a əkwoŋ ə̀ to ghə ə̀ Nyìngòŋ ə soʔ mbyi yèn noʔə̀ ətsèm.

Fətitì fa nwàʔlə̀ ə̀ Nyìngòŋ//: Machò 28:16-20; Mak 16:12-20; Luk 24:13-53; Jon 20:19-23; Acts 1:1-11//