35. Fətitì fə Tìʔ ə̀ Wàyn a Ghə̀ Nkusə Nshinsə

Əchʉʔ ə tsenə ghə, Yesù ngàʔə̀ a viʔi əshiə əko ə gumə̀nà vətsenə və nə̀ viʔ a və nèə̀ mbyɨ a və nvì tsèntə̀ a wen ə ben.

Njìʔsə̀ sə əngə̀ŋ ə̀ Nyìngòŋ sətsen sə a sə ndìʔ tsu sə yen Yesù gàʔə̀ wenə̀ viʔi avyi tà sə a dìʔ viʔ vəjuŋə və, a lì à dìʔ viʔi a və nèə̀ mbyɨ. Vəwenə nzìtə̀ li ə̀ sə̀ gàʔlə̀ byì wen a vəwenə ntìntìn. Yesù mə̀ shə̀ʔtə̀ fətitì à vəwenə.

“Wutsen ə̀ nkyìʔ vunə lyʉmə vəbò. Wàyn ə wùlɨm ə chetə ə wen gàʔ, ‘Tìʔ ə ghom, mà kòŋ la wù ku ə vwomə əfo luwèn!’ Wuto ayì gə̀tə̀ əfo ə wen a vunə lyʉmə ə wen avyì vəbò.”

“A sə laʔtə wàyn ə chetə yì tsèntə̀ əko ə wen noʔə̀ ətsèm ə̀ djʉ̀ noʔə̀ kəghaf ə̀ sàs, ə̀ nè ənyʉ̀ ə̀ byɨvə tà a kədɨ̀ŋ.”

“Əko ə wenə ne mmè jɨ̀ŋ ku a əloʔ ayì a ghə̀ ndìʔ tsu, ghə̀ sə̀ ghoʔə noʔə̀ tà kəfo kə zhɨkə. Ghə̀ kəŋ əshyèʔ, və ku əshyèʔ a wen la ghə̀ ə nzhisə vənkʉnyàm. Jɨ̀ŋ ə̀ nzafə wen a jì a ghə̀ nsonə nzhɨə əfozhɨvə ə̀ vənkʉnyàm vyi.”

“Ghə̀ bə̀m, ‘Mà nè ghɔ̀ a shə̀ a? Viʔi ə əshyèʔ ə̀ tìʔ ə ghom kiʔi əfozhɨvə tà a kədɨ̀ŋ mà dìʔ à shə̀ pfɨə jɨ̀ŋ. Mà a bwìn ə djʉ̀ à tìʔ ə ghom ə sensə wen la ghə̀ lyɨ mò mà a nshyèʔə̀ a wen.’”

“Wàyn ayì lù ə̀ sə̀ bwìnə̀ djʉ̀ə̀ à gə̀ ə̀ tìʔ ə wen. Ghə̀ mbu tà kəghaf tìʔ ə wen yenə wen ə̀ kusə nshinsə a wen. Ghə̀ nyɨŋ ə̀ djʉ̀ ə̀ shisə ə wen.”

“Wàyn ayì gàʔ, ‘Tìʔ ə ghom, Mà ə nèə̀ li mbyɨ à Nyìngòŋ bɛ̀nə̀ à wù. Mà ə ko kwʉ̀ʔ ə ndìʔ wàyn ə̀ wù.’”

“Tìʔ ə wen bòŋsə̀ gàʔ à wùshyèʔ ə wen ətsen, ‘Zàŋsə̀ djʉ̀ ə̀ vì nə̀ nges ə njisə ə̀ mòʔ a əwen ə̀ wàyn ə̀ ghom yèn! Wye mfɨŋ à wenə kəvu ə̀ wyesə gwʉsə a wenə awʉ. Ghaʔ noʔə̀ nges ə̀ wàyn ə̀ nyàm ə̀ zhwi vəghəŋ pfiʔ ə̀ saŋlə, byì tà àndə wàyn ə̀ ghomə ti pfɨ, luwèn ghə̀ mbɛ nlù fa əpfɨ! Ghə̀ ə tə̀ lè, luwèn mà ə mbɛ nyen ə wen!’”

“Vəwenə zìtə̀ sə̀ nànə̀ saŋlə. A sə laʔtə wàyn ə wùlɨm ə to yì bwìnə̀ pfwoə fa əsɨm. Ghə zhʉ tà àndə və bɨʔə kəbòʔ benə ə̀ sə̀ kanə la à chòə̀ ghɔ̀ lɔ.”

“A ndìʔ a əzhʉ a wàyn ə wùlɨm ə to yì zhʉ la və nsaŋlə byì tà àndə lə̀mə̀ wen ə bwìnə̀ li nvì kənyʉ̀ ə kyikə zaf ə wen ghə̀ chen la yì ə ko a kwen a əngə̀ŋ. Tìʔ ə wen fʉ̀ vì ə̀ sensə wen la ghə̀ kwen wenə̀ vəwenə nsaŋlə, ghə̀ chen.”

“Wàyn ə wùlɨm ə to yì gàʔ à tìʔ ə wen, ‘Mà ə shyèʔə̀ li à wù ngwʉ̀ʔ sèn tà a kədɨ̀ŋ! Mà ə nko tɨm ə̀ to kəchʉ à wù, a li wù ə nko tɨmə̀ ku tɛ̀ fəndəʔ fə byi la mà pfiʔ ə̀ saŋlə yuwù viʔi ndoŋsə ə̀ mò. A lì wàyn ə byɨ ə̀ wù yèn a ghə̀ ə sàsə̀ li ə̀ko ə̀ wù a jì ə byɨ ə̀ mbwìnə̀ vì, wù ə nshə nges ə̀ nyàm a wen!’”

“Tìʔ ə wen bwìnsə̀, ‘Wàyn ə̀ ghom, wù dìʔ yuwù mə nzhʉ əntsèm, əfo a mà kyiʔ noʔə̀ ətsèm à dìʔ ə̀ vyə. Vəghəŋ saŋlə byì tà àndə lə̀mə̀ wù yènə ti pfɨ, luwèn ghə̀ mbɛ nlù fa əpfɨ! Ghə̀ ə tə̀ lì, luwèn yuwù mbɛ nyen ə wen!’”

Fətitì fa nwàʔlə̀ ə̀ Nyìngòŋ//: Luk 15:11-32//