15. Əloʔ ə Məkàyn

Əzhʉ ə nvì li ə̀ kwʉ̀ʔ ə vunə Isrèl ə kwen a Kanàn. Joshwà ntɨm li viʔi vəbò ə və djʉ̀ yen Jèrikò a ghə̀ dìʔ a əloʔ ə Kanàn mu və bwom li noʔə̀ mbàyn ə to ə kentə fa viʔi kəbàyn. Njèʔtə̀ ətsen və dzàŋə̀ nə̀ Lahàb ə ngyàmtə̀ li ə̀ lyòmtə̀ viʔ vyi vəbò kə viʔi Jèrikò ə ghaʔ vəwenə ə̀ nè vəwenə nyɨŋ ə bwìnə̀ pfwoə. Ghə̀ ə ngyàmtə̀ vəwenə fambu a ghə̀ mbyɨmə li a Nyìngòŋ. Viʔ avyi ngàʔə̀ li a Lahàb la vəwenə lu gyàmtə̀ ə wen nə̀ ngwàʔ ə̀ wen a əzhʉ a viʔi Isrèl sàstə̀ Jèrikò.

Vunə Isrèl ə ndìʔ ə tɨm muʔu mə̀ Jodàn ə mə kwen a Kanàn. Nyìngòŋ gàʔ a Joshwà, “Nèə̀ nshə̀ʔtə̀ sə tɨm a mbì.” Nshə̀ʔtə̀sə ne nzì ə tɨm muʔu mə̀ Jodàn tyinə ə̀ tɨmə fa gə̀ ə̀ kwì viʔ vətsenə və vyi mə̀ tɨm a nse ə zɨm.

Vəwenə ntɨm li ə̀ mè, Nyìngòŋ shə̀ʔtə̀ jì à Joshwà a vəwenə a soyn kəntonto kə Jèrikò kyì fa tsu. Vunə Isrèl ə zhʉ li kənyʉ̀ a Nyìngòŋ ə̀ ngàʔə̀. Vəsugèʔ nə nshə̀ʔtə̀sə ə̀ njèʔə̀ kaʔsə Jèrikò ə̀ ghàyn ə̀ mùʔ a kətsi, tà a lì mənsti ntʉ̀fə.

A nsə ndìʔ a məntsi sòmbo, viʔi Isrèl ə jèʔ ə̀ kaʔ aghayn ə̀ sòmbo. A nsə ndìʔ a əzhʉ ə bàm vəsugèʔ ə sə̀ zɨmə nshə̀ʔtə̀sə toŋə təsoŋ.

Tà a lì mbàynsə Jèrikò shì sə fəŋkə! Vunə Isrèl ə byɨfsə noʔə̀ əfò ətsèm a Jèrikò tà a jì a Nyìngòŋ ə̀ ngàʔə̀. Vəwenə nkye tà Lahàb nə̀ ngwàʔ ə̀ wen, vəwenə kaʔkə ə̀ sə̀ dìʔ viʔi Isrèl. Viʔ vətsenə və a və tsi a Kanàn ə nzhʉ la viʔi Isrèl ə zhɨ li viʔi Jèrikò vəwenə zìtə̀ sə̀ fwàynə̀ la viʔi Isrèl a soyn vəwenə.

Nyìngòŋ ə̀ ngàʔə̀ li la kə vunə Isrèl lù byɨmə ə kiʔi mbwaʔmə̀ wenə̀ viʔi a və nsti a Kanàn. Viʔi Kanàn vətsenə və, və dzàŋə̀ nə̀ viʔi Jibòn, ə nlobtə li Joshwà la vəwenə ko dìʔ viʔi Kanàn, ə̀ mə̀ gàʔ à Joshwà la ghə̀ nè mbwaʔmə̀ wenə̀ vəwenə. Joshwà wenə̀ vunə Isrèl ə nko bə̀m à Nyìngòŋ la viʔi Jibòn ə lù fa fenə lɔ. Joshwà chò ə̀ nè mbwaʔmə̀ wenə̀ vəwenə.

Tin ə̀ vunə Isrèl ə mfwi li a əzhʉ a vəwenə nkɨə la viʔi Jibòn ə nlobtə vəwenə lobtə, a lì vəwenə wʉ mbwaʔmə̀ ayì byì tàndə vəwenə mbyɨmə a əshɨ ə̀ Nyìngòŋ. Kə ntsitə li təfoyn tə təloʔ tə Amolàt ə̀ nzhʉ la viʔi Jibòn ə̀ nèə̀ li mbwaʔmə̀ wenə̀ viʔi Isrèl, vəwenə tsèntə̀ vəsugèʔ və vəwenə ə̀ djʉ̀ ə soyn viʔi Jibòn. viʔi Jibòn ə ntɨm li ntɨm a Joshwà la ghə̀ gyàmtə̀ vəwenə lɔ.

Joshwà tsèntə̀ vəsugèʔ və Isrèl vəwenə jèʔ nə̀nchʉʔə mpfen ə djʉ̀ ə kwetə viʔi Jibòn. Əchʉʔ ə̀ nsə layn vəwenə kɨmsə vəsugèʔ və Amolàt ə̀ soyn vəwenə.

Nyìngòŋ ə̀ nsoyn li à Isrèl zòyn ayì. Ghə̀ ə nnèə̀ viʔi Amolàt ə lè tətof tə vəwenə, ghə̀ tɨm awoŋ ə ghoʔkə ghə ghə zhwilə və Amolàt tà a kədɨ̀ŋ.

Nyìngòŋ ə̀ mbɛ nè chwìchwì sè tà kəshi kə mùʔ ti vəsugèʔ və Isrèl ə kiʔi əzhʉ ə zhɨ viʔi Amolàt avyi noʔə̀ nkàyn. A kətsi ayì, Nyìngòŋ ə̀ nzhɨ li noʔə̀ əghoŋ ə to ghə a vunə Isrèl.

Və ntsuʔ li fa tsu, vəsugèʔ və təloʔ tə Kanàn tà a kədɨ̀ŋ tsèntə̀ ə vì ə soyn Isrèl. Joshwà wenə̀ vunə Isrèl ə nsoyn li ə̀ zhɨ vəwenə noʔə̀ vətsèm.

Əghoŋ ayi mmèə̀ li Nyìngòŋ gə̀tə̀ əloʔ yi a ghə̀ ngàʔə̀ la yì ə lu ku a vunə Isrèl lì. Ghə̀ ngə̀tə̀ li ə̀ ku noʔə̀ ghə wàyn ə̀ Isrèl ko. Nyìngòŋ mə̀ ku mbwaʔmə̀ a təghomə ə̀ Isrèl.

Joshwà ə nto li, ə̀ dzàŋ viʔi Isrèl noʔə̀ vətsèm ə̀ pfʉtə. Joshwà mə̀ dzɨ̀ŋtə̀ à vəwenə byì məkàyn mə̀ Nyìngòŋ nə̀ təsoʔ tyì a ghə̀ nku à vəwenə a pfèn ə̀ Sanà. Viʔi Isrèl nwʉ li la vəwenə a nzhʉ Nyìngòŋ, dzɨ̀mtə̀ təsoʔ təwen.

Fətitì fa nwàʔlə̀ ə̀ Nyìngòŋ//: Joshwà 1-24//