23. Və bwi Yesù

Mèri ndìʔ ə lam Jòsəf à dìʔ wìʔ a ghə̀ mfwàyn ə̀ Nyìngòŋ. Ghə̀ nzhʉ li la Mèri ndìʔ nə̀ əbə̀mə ghə̀ kɨ la a ko kuə wen. Ghə̀ nkəŋə dzɨ̀m Mèri tà à chì a chi byì tà àndə ghə̀ ə nko kòŋə jìʔsə̀ kəchʉ kə wen. Tà àndə ghə̀ nkwòʔtə̀, ntsɨ̀ŋ ə̀ əngə̀ŋ ə̀ Nyìngòŋ vì gàʔ a wen a jòm.

Ntsɨ̀ŋ ə̀ əngə̀ŋ ə̀ Nyìngòŋ gàʔ, “Jòsəf, kə a fwàyn ə lam Mèri. Wàyn yì a ghə̀ ə gùfə̀ lì lù fà Kəzhwì kə̀ nwoʔə kə. Ghə̀ a bwi wàyn ə wùlɨm. chʉ əzhiʔ ə wen nə̀ Yesù (à dìʔ la, ‘Yahwè ə bwòŋsə̀’), byì a ghə̀ a bwòŋsə̀ viʔi fa vəwenə mbyɨsə.”

Jòsəf ə̀ mbyɨmə li ə̀ lam Mèri, a lə̀ kèn la ghə̀ ə tsi li wenə̀ wen ə zaʔə fa əzhʉ a ghə̀ mbwiə.

Əzhʉ mboʔsə li a Mèri ndìʔə bwi, gumə̀nàŋ ə viʔi Romàyn gàʔ la noʔə̀ ndə̀ bwìnə̀ ə̀ djʉ̀ a wenə əloʔ və taŋ viʔi. Jòsəf wenə̀ Mèri ndìʔə jèʔ kəghaf fa Nazarèt ə djʉ̀ a Betòlòhim byì a vətìʔ və vəwenə a nə̀ Dèvid ə̀ nlù fa Betòlòhim.

Vəwenə zàʔa a Betòlòhim ko kəshi kə ndìʔ ə vəwenə tsi tsu. Vəwenə nkaʔ li ə̀ yen əngə̀ŋ ə̀ nyamsə tsen ə tsi tsu. Mèri mbwi li tsu vəwenə nyə̀ŋsə wàyn ayì a chì ə nchʉʔ ə nyamsə byì àndə kukwenə nko dìʔ. Vəwenə nchʉ li əzhiʔ ə wen la Yesù.

Ntsɨ̀ŋsə byisə tsensə ndìʔ a ətoʔ nə̀nchʉʔə ayì tsɨ̀ŋə̀ byisə vəwenə. Ə sə bvɨ̀tə̀, ntsɨ̀ŋ ə̀ əngə̀ŋ ə̀ Nyìngòŋ ə̀ tsen fɨfə la bɨɨ vì à vəwenə, vəwenə sə̀ fwàynə̀. Ntsɨ̀ŋ ə̀ əngə̀ŋ ə̀ Nyìngòŋ ayì gàʔ, “Kə ghə̀ŋ fwàyn, mà vì nə̀ ntɨm ə jùŋə à ghə̀ŋ. Və bwi li Mèsayà, fòyn, a Betòlòhim!”

“Ghə̀ŋ djʉ̀ ə̀ kəŋ wàyn ayì. Ghə̀ŋ a yenə wen a təsòʔ tə njisə a chi ə nchʉʔ ə nyamsə.” Ə sə bvɨ̀tə̀, ntsɨ̀ŋsə əngə̀ŋ ə̀ Nyìngòŋ sə lwin a əkaŋ ə sə̀ kuʔsə Nyìngòŋ, gàʔə̀, “Əghoʔsə a Nyìngòŋ à əkaŋ, mbwaʔmə̀ a viʔi mbyi a ghə̀ kòŋə̀!”

Ntsɨ̀ŋsə byisə ashìsə njèʔə li ə̀ djʉ̀ kwen a kəshi a Yesù ndìʔ tsu. Vəwenə nyen li wen a nchʉʔ ə nyamsə ayì tà àndə ntsɨ̀ŋ ə̀ əngə̀ŋ ə̀ Nyìngòŋ yì nshə̀ʔtə̀. Vəwenə nsaŋlə li noʔə̀ nànto. Ntsɨ̀ŋsə byisə ashìsə mbwìnə̀ li ə djʉ̀ a vəwenə ətoʔ ə byisə, kuʔsə Nyìngòŋ a kənyʉ̀ a vəwenə yì zhʉ mbɛ nyen.

A nsə laʔtə, viʔi və tofə vətsenə və la vətaʔ a əloʔə kəghaf və yen fədzɨ̀ŋ fətsen a əkaŋ. Vəwenə nkɨ li la və bwi li fòyn ə Vəju ə fi. Vəwenə nlù ə jèʔ kəghaf ə djʉ̀ ə yen fòyn ayì. Vəwenə nvìə̀ li a Betòlòhim ə̀ kəŋ ə̀ yen kəshi a Yesù ndìʔ tsu wenə̀ vətìʔ və wen.

Viʔi və tofə və avyi nyen Yesù wenə̀ lì ə̀ wen ə̀ bwìnə̀ wen ə̀ kuʔsə ə wen. Vəwenə nkú li əfo əko a Yesù mimbu bwìnə̀ ə pfwoə.

Fətitì fa nwàʔlə̀ ə̀ Nyìngòŋ//: Machò 1; Luk 2//