17. Məkàyn mə̀ Nyìngòŋ wenə̀ Devìd

Sɔ ə̀ ndìʔ ə mbì fòyn ə̀ Isrèl. Ghə̀ ndìʔ kənjèf kə nges ə̀ wìʔ tà àndə viʔi Isrèl ə nkəŋə. Sɔ ə̀ ndìʔə̀ nges ə̀ fòyn a kənzìtə̀, ə̀ sə laʔtə ghə̀ kwitə ə̀ sə̀ dìʔ noʔə̀ wubyɨfə kèn la ghə̀ bɛ fwànə̀ Nyìngòŋ. Nyìngòŋ tsuʔ wù kəjàŋ ə ghə̀ lu ndìʔ fòyn a kəshi ə̀ Sɔ.

Nyìngòŋ ə̀ ntsuʔ fəmbvòʔ fə wìʔ və dzàŋə̀ nə̀ Devìd ə ghə̀ ə ndìʔ fòyn a kəshi ə̀ Sɔ. Devìd ə̀ ndìʔ ntsɨ̀ŋə̀ byisə mu ghə̀ lù fà Betòlə̀him. Ghə̀ ntsɨ̀ŋə̀ byisə tiʔ ə wen ə̀ zhwi nyàmə̀ kəbo bɛ̀nə̀ nyàmə̀ ntem a mənzhʉ mə̀ kəjàŋ mu nyam ashìsə̀ vì ə ghaʔ byisə wen. Devìd ə̀ ndìʔ noʔə̀ nges ə̀ wìʔ a ghə̀ nchoʔsə Nyìngòŋ bɛ wʉ təsoʔ tə wen.

Devìd ə̀ nkaʔ li ə̀ sə̀ dìʔ noʔə̀ sugèʔ ə to bɛ soʔə viʔi noʔə̀ nkàyn. Devìd ə̀ mbɔ̀ dìʔ tà wanjə̀ ə̀ soyn Gòlayàt. Gòlayàt ə̀ ndìʔ noʔə̀ kəntonto kə sugèʔ, dìʔ noʔə̀ kənjèf kə wìʔ! A lì Nyìngòŋ gyàmtə̀ Devìd ghə̀ zhwi Gòlayàt ə̀ bwòŋsə̀ viʔi Isrèl. Devìd ə̀ ntsuʔ li fa tsu ə̀ zhɨ viʔi kəbàyn ə Isrèl a əghoŋ tà a kədɨ̀ŋ, və sə̀ bwomsə wen noʔə nkàyn.

Sɔ ə̀ nzìtə̀ li ə̀ sə̀ bànə̀ Devìd byi jì a viʔi nkòŋə̀ wen fa tsu. Sɔ ə̀ ntàŋkə̀ li tà aghayn aghayn ə zhwi wen, Devìd mə̀ nyiŋ ə̀ lyòmtə̀ fà Sɔ. Kətsi kətsen, Sɔ bɛ̀ sə̀ kəŋə djʉ̀ nə̀ Devìd ə zhwi. Sɔ jèʔ ə̀ djʉ̀ kwen a əfyə̀ a Devìd ə̀ nlyòmtə̀ tsu, a lì Sɔ ko nyen ə wen. Devìd ə̀ nvi ə̀ li ə̀ boʔsə Sɔ mu ghə̀ nzì ghə̀ zhwi Sɔ a lì ghə̀ kye. Devìd ə̀ mbòŋsə̀ tyin ə əsoŋ ə njisə ə̀ Sɔ ti jìʔ a Sɔ la yi ə ko lu zhwi wen ti ndìʔ fòyn.

Sɔ ə̀ nkaʔ li ə̀ pfɨ a əghoŋ, Devìd sə̀ dìʔ fòyn ə̀ Isrèl. Ghə̀ ndìʔ ə nges ə̀ fòyn, viʔi kòŋə̀ wen. Nyìngòŋ ə̀ mbwaʔsə li wen ə̀ nè ghə̀ soʔ viʔi ə wen a nkàyn. Devìd ə̀ nsoyn li təghoŋ tà a kədɨ̀ŋ Nyìngòŋ gyàmtə̀ wen ghə̀ zhɨ viʔi kəbàyn ə̀ Isrèl. Devìd ə̀ nzhɨ li Jèlusalèm ə̀ nè a sə̀ dìʔ kəchʉ kə əloʔ ə wen. Devìd ə̀ nnèə̀ li Isrèl kiʔi kəjoʔ nə̀ əko.

Devìd ə̀ nkəŋə ə bwom ngə̀ŋ ə̀ Nyìngòŋ a viʔi Isrèl noʔə̀ vətsèm a nkuʔsə Nyìngòŋ tsu. A nsə̀ dìʔ ngwʉ̀ʔsə təghɨ tə kàʔ (400) tà àndə viʔi Isrèl ə nkuʔsə̀ Nyìngòŋ a kəshi kyikə a Musìs ə̀ mbwomə lì.

A lì Nyìngòŋ tɨmə nshə̀tə̀ ə̀ wen ə Natàn à Devìd nə̀ ntɨm yèn, “Byì àndə wù dìʔ wìʔ a ghə̀ soynə təghoŋ, wù ə ko a bwom əngə̀ŋ Nyìngòŋ ayì. A lu bwom wayn ə wù. A lì mà ə bwaʔsə wu noʔə̀ nkàyn. Wù ngwàʔ ə̀ wù ə tsen ə lu soʔ viʔi ə vwomə a nə̀ fòyn ə djʉ ə zaʔə a kəmyètə̀ kəmbyi!” Wù ngwàʔ Devìd ayì ndìʔ Mèzayà. Mèzayà ndìʔ wìʔ a Nyìngòŋ ə̀ ntsuʔə̀, ə ghə̀ bwoŋsə viʔi mbyi venə fa mbyɨ.

Devìd ə̀ nzhʉ li a lì ə̀ ku kəzòŋ ə̀ kuʔsə Nyìngòŋ byì jì a Nyìngòŋ ə̀ ngàʔə̀ la yì a bwaʔsə wen fa tsu. Devìd ə̀ nko kɨ la Nyìngòŋ a nè ənyʉ̀ avenə zenə lɔ. A lì kə mə̀ sə̀ dìʔ ta lì byì àndə viʔi Isrèl nkə̀ʔtə̀ li ə̀ kə̀ʔtə̀ ə̀ sə̀ kwensə̀ djʉ̀ ngwùʔ ə̀ nkam (1,000) mimbu Mèzayà ayì vì.

Devìd ə̀ nsoʔ li ngwʉ̀ʔsə tà a kədɨ̀ŋ noʔə̀ nkàyn, Nyìngòŋ bwaʔsə wen. A lì ghə̀ sə mboʔsə pfɨ ə nè mbyɨ a Nyìngòŋ.

Ə̀tsʉʔ ə tsenə ghə, vəsugèʔ və Devìd və ndìʔ a ətoʔ soynə əghoŋ, ghə̀ kiʔi fa wenə ntuʔ ə̀ yen ə nges ə̀ wùwì ətsen ghə̀ shʉ̀ə̀ əwen ə wen. Əzhiʔ ə wen ə ndìʔ Batshebà.

Devìd ə̀ ntùʔtə̀ li ə̀ lyeə noʔə̀ nkàyn, ə̀ tɨ̀m wìʔ la ghə̀ djʉ̀ ə̀ vì nə̀ wùwì ayì a yì. Ghə̀ ntsi li wenə̀ wen ə̀ gàʔ ghə̀ bwìnə̀ pfwoə. A nsə laʔtə Batshebà tɨm ə ntɨm a Devìd la yì gùfə̀.

Lɨm ə̀ Batshebà, və dzàŋə̀ nə̀ Uliyà, ndìʔ noʔə̀ nges ə̀ sugèʔ ə̀ Devìd. Devìd ə̀ mbwìnsə̀ li ə̀ dzàŋ Uliyà fa ətoʔ əghoŋ ə̀ gàʔ a wen la ghə̀ djʉ̀ ə̀ ndìʔ wenə̀ wì ə wen. Uliyà ə̀ nchen li la yì ə ko zì yì pfwo à yì əngə̀ŋ ə̀ kye vəsugèʔ vətsenə və a ətoʔ əghoŋ. Kə ghoʔ Devìd ghə̀ bwìnsə̀ tɨm Uliyà a ətoʔ əghoŋ ə̀ gàʔ à kəchʉ kə vəsugèʔ la ghə̀ tɨm Uliyà a əchʉ̀ əghoŋ ə to ghə ti və zhwi ə wen.

Və nzhwi li Uliyà, Devìd lam Batshebà. Ghə̀ ə mbwi li wayn ə wùlɨm a Devìd. Tin ə Nyìngòŋ ə̀ mfwi li noʔə̀ nànto byì kənyʉ̀ a Devìd ə nnèə̀. Nyìngòŋ mə̀ tɨmə nshə̀ʔtə̀ wen ə Natàn la ghə̀ shə̀ʔtə̀ à Devìd la mbyɨ ə wen ə byɨfə noʔə̀ nànto. Devìd ə̀ nkwitə li ə̀ lòyn mə̀ lyèsə̀ ku fa Nyìngòŋ ghə̀ lyèsə̀ ə̀ kuə wen. Devìd ə nwʉ li təsoʔ tə Nyìngòŋ, tɛ̀ a əzhʉ a ənyʉ̀ nto, ə̀ kaʔ ə̀ pfɨ.

Nyìngòŋ ə̀ ndzàŋə̀ wàyn ə wùlɨm ə̀ Devìd yì byì mbyɨ ə wen ayì. Viʔi ngwàʔ ə̀ Devìd ə̀ mfaŋ li tà nə̀ təsoyn tə, kəjoʔ kə Devìd kə bwaʔ noʔə̀ nànto. Tɛ̀ àndə Devìd nko wʉ təsoʔ tə Nyìngòŋ, Nyìngòŋ ə̀ nko kwitə ətyim ə wen byì məkàyn mə̀ wenə̀ Devìd. Devìd wenə̀ Batshebà mbɛ kyiʔi wàyn ə wùlɨm ətsen ə̀ chʉ əzhiʔ ə wen nə̀ Sòlomòn.

Fətitì fa nwàʔlə̀ ə̀ Nyìngòŋ//: 1 Samwə̀l 10; 15-19; 24; 31; 2 Samwə̀l 5; 7; 11-12//