1. ŋen ŋəđiđia
Fəṯia ŋen ŋananoŋ iŋi ŋəđiđia laŋge pređ ŋəfo ŋaɽo. Rəmwa riđu elo na alo na laŋge pređ ildi ləfau en̄oman đenəŋ lonto. ŋen Rǝmwa riđu ləbate alo yafo yaɽo ŋərəm na yapiano, na waŋge gafo gero gənəŋ giđənau kwai kwai. Orn usila gə-Rəmwa gafo gura nǝŋau.
Nṯia Rəmwa ndraṯa, "ŋgiṯr arrerre aŋəfeṯe!" na arrerre naŋəfeṯe. Rəmwa ndrəseici ŋen ṯa arrerre gafo gaŋəra na ndrënəci ṯa "ëđən̄in. " rënəŋu ndrëndəđe ano ŋərəmiaŋa, ndrënəci ṯa "uləŋgi". Rəmwa riđu arrerre eloman ləɽənda iđiđia alo.
Eloman ləɽaico orəba gəɽijan iđiđia alo, Rəmwa ralwaɽo na ndriđi lambala ləfo labate eđəpe. Rënəŋu ndriđi lambala elo na ndrëndəđe ano ŋawaŋa iŋi ŋafo elo na alo.
Eloman ildi ləɽaico orəba giɽijin, Rəmwa ralwaɽo na ndrëndəđe ŋawano aloyia ywonḏəṯo. Rënəŋu ndrënəci alo ywonḏəṯo ṯa "labate," na rënəŋu ndrënəci ŋawa ṯa "đəmbrwa." Rəmwa ndrəseici ŋen ṯa laŋge ildi rënəŋu riđəlo lafo laŋəra.
Orn Rəmwa ndraṯa, "ŋgiṯu ləbate aləŋe nuɽi na ŋañiya ŋəɽwa pređ". Na fəŋen iŋi ŋəfo ŋiđənu. Rəmwa ndrəseici ŋen iŋi rënəŋu riđu ṯa ŋafo ŋaŋəra.
Eloman ildi ləɽaico orəba marldwan iđiđia alo, Rəmwa ralwaɽo na ndriđi ëđən̄ina, ubwa na ropa. Rəmwa ndrliđi ṯa alnaiđe arrerre alo na ṯa alaŋaiđi ëđən̄in na uləŋgi, ŋiga na nṯəlia. Rəmwa ndrəsëici ŋen iŋi rënəŋu riđu ṯa ŋafo ŋaŋəra.
Eloman ildi ləɽaico orəba đenəŋ, Rəmwa ralwaɽo na ndriđi laŋge pređ ildi ləlala nǝŋau na ndəfia pređ. Rəmwa ndrəsëici ŋen iŋi rënəŋu riđu ṯa ŋafo ŋaŋəra, na rënəŋu ndrələbuŋṯi.
Eloman ildi leɽaico orəba đenəŋ na lonto iđiđia alo, Rəmwa raṯa,"ŋgiṯr ŋǝɽwa pređ ŋəđwala đalo aŋəfeṯe!" Na ŋen naŋəfeṯe ŋen ŋarno Rəmwa rəlwaɽo. Đwala đəmaṯan đafo đeneɽa, na đəmaṯan đəraɽa alo iđuđa, na đəmaṯan đafo đeđən̄ua. Na Rəmwa ndrəsëici ŋen iŋi ṯa ŋafo ŋaŋəra.
Orn Rəmwa ndraṯa, "aliđər leđa larnəndr ŋaiyo. ŋen ŋanṯa lënəŋulu liđ alerṯe ŋələŋe eləbate na eđwala pređ đalo."
Nṯia Rəmwa ndrəme đuđa đəmaṯan,na ndriđi eđa gɽorrwa,na narəmaujəđi ubwuđano gəđəməṯia.Maje igi gafo gəbërnia Ađəm. Rəmwa ndrəwađe grii alo isi Ađəm giđi aŋofeṯe,na ndrəmawëɽi ṯa aŋərəmoṯwe.
Alo igrii iligano, Rəmwa ndrəwađe nuɽi nəɽijan nəfo aləsoŋ-uɽi gəđəməṯia na uɽi gəđələŋeṯa ŋen ŋəŋəra na ŋeicia. Rəmwa ndrəlwaɽəṯi Ađəm ṯa aŋəse nuɽi pređ alo igrii illa uɽi gəđələŋeṯa ŋen ŋəŋəra na ŋeicia. Ndə gënəŋu gəso iguɽi gakəl,gënəŋu giđi aŋaiye.
Nṯia Rəmwa ndraṯa, "ŋen ŋero ŋəŋəra ṯa maje aŋəfeṯe gonto."Orn waŋgero gənəŋ eđwala ṯa giđi aŋəɽeṯe đamađaṯa đ-Ađəm
Orn Rəmwa ndrëɽi Aḏəm iŋuriđ ŋəfo pəlalo. Nṯia Rəmwa ndrəme rəme rənəŋ elorəb l-Ađəm na rënəŋu ndrəmiṯi wuji gəɽubwa na ndrəmanaice.
Ndə Ađǝm gənwano eđa igi gəɽubwa, nəŋaṯa, "ŋen ŋaŋəra đəge! Eđa igi garnən̄e! ŋgiṯəma aŋënǝjǝni wuji gəɽubwa, ŋen ŋanṯa gënəŋu gafo giđənu egeđa gəɽorra." fəŋen iŋi ṯa eđa gəɽorra giđi aŋəṯađe eṯen na ləŋgen na lënəŋulu liđi aləɽeṯe aŋəno yonto wasenga gëləɽəŋu.
Rǝmwa ndriđi eđa gəɽorra na gəɽubwa larno ŋaiyo ŋëləɽəŋu. Rënəŋu ndrəlabuŋṯi na ndrǝleiṯi ṯa, "alələŋe n̄ere n̄wain̄a na n̄ere n̄əlorəba elden na ṯa alonṯəjiace ləbate!" Na Rəmwa ndrəseici ŋen ṯa laŋge pređ ildi ndriđəlo lafo laŋəra kain̄, na rënəŋu rəfo raŋərəṯəlo nano pređ. ŋen iŋi pređ ŋafo ŋiđənu eloman ildi ləɽaico lorəba đenəŋ lonto iđiđia alo.
Ndə loman ɽrəmaṯo ildi ləɽaico lorəba đenəŋ na gəɽijan, Rəmwa ndrəɽən̄iađaṯe ŋəmëɽria ŋəlëɽəŋu. Orn Rəmwa ndrəmin̄iniano eŋen pređ iŋi rəfo rəbəđia. Rënəŋu ndrəbuŋṯi lomǝn ildi lǝɽaico lorəba đenəŋ na gəɽijan na ndriđi lǝtəɽe, ŋen ŋanṯa loman ildi rënəŋu rafo raməñinau ano iŋǝmëɽria ŋǝlëɽǝŋu. Fəṯia ŋen iŋi Rəmwa riđu elo na alo na laŋge pređ ildi ləfau.
Ɖumëđənia eg-ađam: gəđətođalo 1-2