7. ŋen Rəmwa rëbuŋǝṯu Yagub.
ŋen ləmia loɽra egaŋəno, Yagub gafo gaɽəŋa egeɽa, orn Isu gafo gabərndeṯa eŋapo. Riab gabuwa Yagubga, na Isag gabuwa Isuga.
Iliga lənəŋ, ŋen Isu goɽǝbǝđo eŋapo, gënǝŋu gafo gǝcoin̄a kain̄. Isu nəŋəlwaɽəṯi Yagub ṯa, "naicən̄e aicəba gəmən igi agiđu."Yagub nəŋəmuɽəbiṯi eŋen ṯa, ananoŋ, naicǝn̄e ŋen iŋi ŋəbəŋaiđia ṯa agoɽra." Nṯia Isu naŋanaice Yagub ŋen ŋarno gënəŋu gəlwaɽo. Orn Yagub nəŋəmanaice aicəba.
Isag gafo gwonaṯa ṯa aŋanaice Isu đəbuŋṯia đəlëɽəŋu. ŋen gəmulu gǝbǝđia ṯia, Rebeka na Yagub ndëmiđi ŋǝməɽa na Yagub nǝŋiđǝni garno Isag. Isag gafo gaɽo uṯëɽi na gaber gǝseiđia ŋopia. Nṯia Yagub nəŋëɽǝni erenia nano g-Isu,na nǝŋëɽǝni ërwa nano gǝrlɽdo netam na ndrəŋ rǝlëɽəŋu .
Yagub geṯo Isag nano naŋəmeiṯi ṯa ," fin̄i Isu . Egeṯo ṯa ŋan̄əbuŋṯi" . Orn ŋen nəŋiđi Isag egaŋəno ŋarno wala gorəlɽdo na nəŋǝmuwǝjini erenia, gënǝŋu nǝŋëɽi ŋen ṯa Isugi na nǝŋǝmǝbuŋṯi .
Isu naŋgeiye Yagub ŋen ŋanṯa Yagub galǝbjo ŋen ŋǝđurwaṯo garno umia goɽra na đǝbuŋṯia đǝlëɽǝŋu. Na gënǝŋu nǝŋëɽi ŋen ṯa aŋǝɽin̄e orǝba iliga ŋen eṯen gaiyo.
Orn iliga Rebeka gəno iđǝgëɽia ŋen ŋ-Isu. Nṯia gënǝŋu lǝđwaṯe Yagub irǝnuŋ nəwaldaŋ ṯa aŋǝɽǝŋe tu iŋǝđurəba ŋəlëɽəŋu.
Yagub ŋǝɽaŋe iŋǝđurǝba ŋǝ-Rebeka nṯǝliaŋ nwain̄a. Iliga lakǝl gënǝŋu nǝŋǝmǝđe na nǝŋǝlǝŋe lamia ređ na lǝɽijan na ŋere ŋǝɽo ubwa. Rəmwa ndrəmiđi gwain̄a đawala kain̄.
ŋen Yagub gǝɽin̄ađaṯo nṯǝlia eređia gǝɽijan irǝnuŋ galo-yǝkanan, gënəŋu nǝŋoɽəbaṯe irənuŋ eɽaga gəlëɽəŋu, ləbaila ǝllëɽəŋu, na đwalađa pređ đǝlëɽǝŋu.
Yagub gafo gađǝn̄əlo na gafo gëɽu ŋen ṯa Isu gwonaṯa gǝmǝɽin̄a məldin . Oro gënǝŋu naŋǝṯwađiṯi Isu đwala đwain̄a garno đǝnaica: lǝbai ildi ldəmame đwala ndeiṯi Isu ṯa,"ibai gǝlëɽǝŋa yagub, gǝnaciaŋa đwala iđi .Gënǝŋu gëtu geṯo."
Orn Isu gafo gǝŋgǝđǝcu Yagub ŋen ŋǝlëɽǝŋu ŋeicia, na lafo lafo laŋǝra nano ṯa alǝseiđi tǝŋ. Nṯia Yagub nǝŋǝɽǝŋe irǝnuŋ gǝ-kanan iđëuṯaralo. Nṯia Isag nǝŋaiye, na Yagub na Isu ldǝmuri. Nṯia đǝrreiđia eŋen iđi Rəmwa rëɽǝṯu Ibrayim nǝđǝŋgaṯe Isag nano na nađǝbɽe Yagub nano.
Đumëđənia egađam gəđətwođalo 25:27-33:20