21. ŋen Rəmwa rəkaso ŋen ŋə-Messaiya
Ananoŋ Rəmwa rëɽu ŋen ṯa arəđwaṯe Messiya. Ɖəkasa ŋen ŋananoŋ ŋə-Messiya ŋeṯo an Ađəm na Awa. Rəmwa ndrəkase ŋen ṯa eđələŋe đawa eđa giđi aŋələŋəni gənəŋ igi giđi aŋəpuɽi rəmwa reicia ŋəsia nda. Rəmwa reicia ŋəsia irri rəgəbṯu Awa alo fəŋu Seṯan. Ɖəkasa ŋen ŋaɽo ŋen ṯa Messsiya giđi aŋəđame ŋabəɽa ŋə-Seṯan đurri.
Rəmwa ndrəkase ŋen Ibraimga ṯa ŋoɽwa ŋəleđa pređ lalo liđi aləme đəbuŋṯia iŋuŋ. Ɖəbuŋṯia iđi điđi ađunḏəjaini ndə Messiya giđi aŋela iliga ildi liđi alela. Gënəŋu giđi aŋiđi ŋen ŋərəciađaṯo eleđa ləŋəɽwa ɽetəɽeteo ṯa alëbərni.
Rəmwa ndrəkase ŋen Musaga ṯa iliga ildi liđi alela rənëŋu riđi artuđi eđa igi gəɽwata eŋen iŋi ŋiđi aŋela garno Musa. Fəŋen ŋomən ŋəđəkasa ŋen ŋal Masyia iŋi ŋiđi aŋela iliga lətafər.
Rəmwa ndrəkase ŋen eləŋ Ḏauḏga ṯa eđa gənəŋ eđələŋe đəlaɽəŋu giđi aŋirldi leđa ŋen ŋarno eləŋ gəleđa lɽ-Rəmwa bəɽəbəte. ŋenŋanṯa Messiya giđi aŋəɽeṯe eđa gənəŋ eđələŋe đə-Ḏauḏ.
Eŋen ŋə-nabi Irmiya, Rəmwa ndrəkase ŋen ṯa riđi ariđi đərreiđia eŋen đəmaijən, orn gerṯa ŋen ŋarno đərreiđia eŋen iđi Rəmwa riđu leđala Lisrayil alo yi-Sina. Iđərreiđia eŋen đəmaijən, Rəmwa riđi arəwërđi alganun yiləɽəŋu enare nəleđa, orn leđa liđi aləŋeṯe Rəmwa ŋulu bəɽan,lënəŋulu liđi alɽeṯe leđa əllëɽəŋu, na Rəmwa riđi arələŋgađeici ŋen eŋen ŋeicia. Messiya giđi aŋətođe ŋenəŋa ŋəđərreiđia eŋen ŋəmaijən.
Inabi yi-Rəmwa nayaṯa ṯa com Messaiya giđi aŋəɽeṯe Nabi, alkana na eləŋ. Anabi fəŋu eđa igi gǝnna olia gə-Rəmwa na ṯəŋërrəŋaicu leđa. Messaiya igi Rəmwa rəkaso ŋen iŋu ṯa riđi arəmađwaṯe gəɽo Nabi yeɽin̄ađaiđo.
Elkana ye ̵ leđa Lisrayil ldiṯi Rəmwa điɽəđənia ŋenŋanṯa ađəraṯe eŋen ŋubwa ŋeicia iŋi lënəŋulu ləneinu. Elkana ldəṯurṯia Rəmwa com eŋen ŋəleđa. Messaiya giđi aŋəɽeṯe alkana yəđǝrwëṯo isi yiđi ayənaiđe etam gəlëɽəŋu garno điɽəđənia đǝ-Rmwa đəɽən̄ađeinu.
Eləŋ fuŋu eđa igi gəbərldia ŋələŋe na ṯaŋakəme leđa. Messaiya giđi aŋəɽeṯe eləŋ gərəjiađaṯo igi giđi aŋəɽaŋe nalkursi yeṯen gǝpende Ḏauḏ. Gënəŋuŋ giđi aŋəkəme alo pređ bəɽəbəte, na giđi aŋakəmeđe ŋenŋa ŋǝđeṯəm na giđi aŋiđi ŋen ŋəđərwaṯu.
Inabiya yi-Rəmwa yaɽwato eŋen ŋwain̄a ŋə-Masiya. Nabiya Malaki gaɽwato ṯa Nabiya yoɽra yiđi ayela ananoŋ ŋen Messaiya gǝmulu geṯo. Nabi Isaiya gaɽwato ṯa Messaiya giđi aŋələŋəni eŋere ŋaijəba eđa gaɽorrwa kwai kwai. Nabiya Mega gaṯa ṯa gënəŋu giđi aŋələŋeini Irnuŋ galo yi-Biṯilam.
Anabi Isaiya gaṯa Messaiya giđi aŋəfeṯe alo Ijalil,ŋen ŋanṯa aŋəbəɽe leđano ildi ləgro enare, na aŋəlwaɽəṯi eŋen ŋəđəmən̄ia eŋəbai na ṯa aŋəmin̄i leđa lëndənu enarra. Gënəŋu gaɽwato eŋen com ṯa Messaiya giđi aŋaiđi leđa luma na ildi ləber lənna, na lero ləseiđia, na ildi ləjəba ləɽwata, walla ləbərlda.
Nabi Isaiya gaɽwato eŋen com ṯa Messaiya giđi aŋgeiyini pipi na aŋəniđini. Nabi yǝmaṯan yaɽwato eŋen ṯa leđa ildi lǝɽin̄o Messaiya lakarnəđe erenia na đappa đǝlëɽǝŋu điđi ađəmabəlaice. Nabi Sakariya gəlwaɽo eŋen ṯa đappa điđi aŋənaini faḏḏa eređia giɽijin garno ilia yəđabəlaica Messaiya.
Inabia yaɽwato eŋen com ŋəŋəɽain̄ ŋǝ-Messaiya. Isaiya gaɽwato eŋen ṯa leđa liđi aləmađaṯabəṯe nano, almađəmaice eŋen na alməwëpi. Lënəŋulu liđi almađowe na gënəŋu giđi aŋaiye ŋenŋa ŋubwa na ŋəbəɽaŋəno kain̄, orn gënəŋu gafo gero gəbəđia ŋen ŋənəŋ ŋəfo mənna.
Inabiya yaṯa com ṯa Messaiya giđi aŋəɽeṯe gəɽin̄ađaiđo, gero ŋen ŋeicia. Gënəŋu giđi aŋaiye ṯa aŋəme ŋen ŋubwa ŋəleđa lomən. ŋen ŋubwa ŋəlëɽəŋu ŋiđi aŋəma đëuṯaralo i-Rəmwa na eleđa. Nṯia ŋenəŋa iŋi, fəđəŋënṯiađa ŋen đə- Rəmwa ṯa arəpuɽi Messaiya.
Inabia yaɽwato ṯa Messaiya giđi aŋaiye naṯia Rəmwa riđi arëmatuđi eŋəɽain̄. eŋəɽain̄ ŋə-Messaiya na đətwođađa eŋəɽain̄ ŋəlëɽəŋu, Rəmwa riđi arəɽin̄ađaṯe ŋen iŋi rënəŋu rëɽu ṯa arëbəri leđa leicia na ṯa arëɽi đǝrreiđia eŋen đǝmaijǝn.
̵Rǝmwa ndrǝŋaici nabia ŋen ŋwain̄a eŋen ŋə-Messaiya, orn Messaiya naŋerṯe geṯo iliga ildəi Linabiya. Inṯǝliaŋ nəmən̄aṯo orǝba ndređia eređia marldwan eŋen ŋǝnḏurṯu iŋi inabiya yəɽwato, iliga lakəl đurri, Rǝmwa riđi arǝđwaṯa Messaiya alo.
Ɖumađənia enađam ini nətəɽe nəđərreiđia eŋen đəram: Ađam gəđətođalo 3:15; 12:1-3; Ađam gəđələləŋəđainia eŋen 18:15; 2 Samwel 7; Irmaiya 31; Isaiya 59:16; Ṯaniel 7; Malake 4:5; Isaiya 7:14; Meka 5:2; Isaiya 9:1-7; 35:3-5; 61;53; Masmur 22:18; 35:19;69:4;41:9; Sakariya 11:12-13; Isaiya 50:6; Masmur 16:10-11