10. ŋen ŋǝŋǝɽaiñ ređ ŋəđǝpuɽwa
Musa na Aron lǝbɽe Fero nano.Lënǝŋulu ldəmeiṯi ṯa,"fəŋen iŋi Rəmwa r-Israyil rəlwaɽo, 'ŋgiṯu leđa ǝllëɽǝñi alǝbɽe!"" Fero naŋerṯe gǝlnaṯa. Gabanṯaṯa gënəŋu gaŋgiṯia leđa lisrayil aləmǝñe pipi, gënəŋu ṯaŋǝlǝcwari ṯa aliđi ŋəmëɽria ŋəbəɽaŋano kaiñ!
Fero naŋəneđe gəŋgiṯia leđa ṯa aləmǝñe, nṯia Rəmwa ndrəmapuɽi ŋenəŋa ŋǝŋǝɽaiñ iŋi ŋəɽo ređ, Rəmwa ndrǝŋaici Fero ŋen ṯa rënəŋu rerṯo ŋabəɽa ŋoɽra ŋəməñaṯo orəba gəlëɽəŋu na imwa pređ yəlëɽəŋu isi yə-Masr.
Rəmwa ndrǝrriđi ŋawa ŋeđəbarlda đə-Nil naŋəɽeṯe ŋəfəni, orn məldin Fero nəŋerṯe gǝbǝŋënṯia leđa l-Israyil ṯa aləmǝn̄e.
Rəmwa ndrađwaṯe n̄ələu alo pređ yə-Masr. Fero naŋeɽǝđe Musa ŋəbaiyaŋa ṯa aŋgaici n̄ələu. Orn ndǝ ŋen n̄ələu n̄aiyo pređ đəge, Fero naŋiđi ara gəlëɽəŋu gəbəɽaŋəno kain̄ na naŋerṯe gǝbǝŋënṯia ŋen ṯa leđa lisrayil aləmǝn̄e alo yə-Masr.
Nṯia Rəmwa ndrǝđwaṯe lai lǝđǝpɽwa. Nṯia com rënǝŋu ndrǝđwaṯe laŋge larno ñawa. Fero nëŋundǝđi Musa na Aron na nəŋəleiṯi ṯa ndə ñagero ñagəđuria laŋge ildi leɽo đirnḏeica, Israyil yaber yiđi aiyəmǝñe kwai kwai. ŋen Musa geɽəđo Rəmwa,Rënǝŋu ndrəŋgaci lai pređ alo yə-Masr. Na Fero nəŋəbɽeṯe ara aŋəno gəlëɽǝŋu na naŋerṯe gəŋgiṯia leđa ṯa aləmǝñe məɽeməɽeñ.
Eŋen ŋomǝn, Rəmwa ndrəpuɽi đwala pređ iđi đəleđa lə-Masr ṯa ađumeiṯi na ađaiye. Orn ara gə-Fero nəŋəbëɽeṯe aŋəno kaiñ na nǝŋerṯe gǝbǝŋënṯia ŋen ṯa leđa lisrayil aləmǝñe.
Nṯia Rəmwa ndrǝlwaɽəṯi Musa ṯa aŋëwṯi pojia elo eđeber Fero nëiñua. ŋen gënǝŋu giđu ṯia, rëɽi narǝfeṯe rǝbwa naŋǝno yǝ-leđa lǝɽo Masr, orn gerṯa eleđa l-Israyil. Rəmwa ndriđi ara gǝ-Fero gəbǝɽaŋəno, na Fero nǝŋerṯe gǝŋgiṯia leđa l-Israyil ṯa aləmǝñe bipi.
Na ṯia, Rəmwa ndrađwaṯe ŋwotǝđa naŋgere ŋəsa pređ ŋalo yə-Masr na naŋəɽiñe leđa pređ ildi lǝfo ndəwuǝr. Fero nǝŋwundǝđi Musa na Aron naŋəleiṯi ṯa," igiđu ŋen ŋeicia kaiñ. ŋen ŋaŋəra ṯa ñaɽe."Nṯia Musa naŋǝṯurṯi Rəmwa na ŋwotǝđa naŋǝđuri iŋi ŋǝfo ŋǝđǝnia elo.
Orn Fero nəŋiđi ŋen ŋeicia təŋ na nəŋiđi ara gəlëɽǝŋu gəbëɽaŋəno. Nṯia nəŋerṯe gǝŋgiṯia leđa l-Israyil ṯa aləmǝn̄e məɽǝməɽen̄.
Orn Rəmwa ndriđi ǝlɽo li-yama alo nano pređ yə-Masr.Yama isi niyǝse ŋwana pređ iŋi ŋafo ŋəṯënu ŋero ŋgǝria iliga lǝŋwotǝđa ŋǝđǝno.
Nṯia Rəmwa ndrađwaṯe ŋərəmia alo pređ n̄oman n̄ǝɽijin. Alo yafo yaɽo ŋərəm kain̄ orn leđa lə-Masr lderṯe lǝɽuwađəṯia lǝmən̄a eneɽa enen. Orn arrerre gafo gafo alo isi leđa l-Israyil lǝfau.
Iliga ildi com ləŋəɽain̄ ŋǝđǝpuɽwa iŋi ŋǝɽo đenǝŋ na mwarldwan,Fero nǝŋǝneđe mǝldin gəbǝŋënṯia leđa l-Israyil ṯa aləmǝn̄e məɽəmǝɽen̄. ŋen ŋarno Fero gəneđo gənna, Rəmwa ndrëɽi ŋen ṯa arəđwaṯe đǝpuɽwa đǝnḏurṯu. ŋen iŋi ŋiđi aŋəməlađi ŋəṯǝɽa ŋə-Fero.
Đumëđənia egađam: gəđəmaiña 5-10