9. ŋen Rəmwa rundəđu Musa
Ndə Yusif gaiyo, leđa pređ liŋǝṯurəba lǝɽaŋe alo Yi-Masr. Lënǝŋulu na đələŋia đəlëɽəŋu alǝmǝn̄iađaṯe nëin̄ua ṯa alëfeṯe tu nṯəliaŋ nwain̄a na ṯa alerṯe n̄ere n̄wain̄a. Lënǝŋulu lënəjəni ṯa leđa l-Israyil
Ndə nṯəliaŋ nəbɽo ndređia ređ, leđa l-Israyil ṯaləməñiano lwaiña kaiñ. Leđa ləmasr lderṯe leləldëŋəđainia eŋen ŋǝnŋ iŋi Yusəf giṯǝlo eđamađaṯa eđen. Lǝnëŋulu lafo lëđiñia leđa lisrayil ŋen ŋanṯa lafo lwaiña kaiñ. Nṯia Fero igi gəfo gəbërndia leđa alo Yə-Masr iliga nəgiđu leđa l-Israyil ləɽo ləbai eleđa lə-Masr.
Nṯia leđa lə-Masr lǝcwari leđa lisrayil ṯa alabǝđe neɽia nwaiña na irənuŋ goɽra. Điđia ŋəmëɽria eŋen iŋi ŋəbəɽaŋəno naŋiđi đəməṯia eđen đopano, Orn Rəmwa ndrəlǝbuŋṯi pređ, na lənëŋulu lerṯe ñere ñwaiña.
ŋen Fero gəseicu ŋen ṯa leđa l-Israyil lafo lerṯo ñere ñwaiña, nṯia gënəŋu naŋənaiyəđe ŋen eleđa əllëɽəŋu ṯa aləɽaiñe ñere pređ ñəleđa l-Israyil iñi ñərrwa ṯa aldaruṯi eđəbərnda đə-Nil.
Wuji gənəŋ eleđa l-Israyil naŋələŋe iđia gəɽorrwa. Gënǝŋu lobǝce ŋere iliga lwalano ŋen ŋarno liđu ebaŋgenga gǝlëɽǝŋu.
Ndǝ leđa lerṯo ŋere lero ləɽwađaṯa eŋen ṯa alobəce ummia mǝldin, lënəŋulu ləmëɽi ejakəṯaiya yǝlala nəŋau eŋaiña alo đəbarnda nano đə-Nil ṯa aŋerṯe gəɽiñǝnia. Orn orəba gəlëɽəŋu igi gəɽo ubwa gafo gasecia ṯa ŋen ŋiđi aŋəfeṯe ṯau iŋu.
ŋere ŋə-Fero nǝŋǝseici jakəṯaiya na naŋwonanəđe. Gënǝŋu nəŋənwane ŋere ŋǝɽorrwa naŋabe na naŋiđi ŋəlëɽəŋu.ŋënǝŋu naŋəmanace wuji gəɽo Israyil ṯa aŋəmađuɽi ŋen gënəŋu gero gələŋeinia nano ṯa ləŋgen gëləɽəŋu. ŋen ummia goɽra đəge gënəŋu naŋerṯe gwonaṯa ŋan ŋələŋgen təŋ ṯa aŋəđoɽe, gënəŋu naŋoɽəbaṯe ŋere nano ŋə-Fero, iŋi ŋanəjima ṯa Musa.
Iliga ildi Musa goɽra đəge, gënəŋu naŋənwane eđa gəɽo Masr gəpwa Israyil isi yəɽo ibai. Na Musa nëŋinṯǝci ŋen ṯa aŋëbri orəba igi gəɽo Israyil.
ŋen Musa gəseicu ŋen ṯa eđa gero gənəŋ gəmǝseicia, gënəŋu nǝŋəɽin̄e maje gəɽo Masr na naŋagađaṯe aŋəno yəlëɽəŋu. Orn eđa gafo gənəŋ gəseicu Musa eŋen iŋi gënǝŋu gǝfo giđu.
ŋen Fero gəno ŋen iŋi Musa giđu, gënəŋu naŋinṯǝci ŋen ṯa aŋəmaɽin̄e. Musa nǝŋobəđe alo yi-Masr nǝŋǝɽe eđən̄ua alo isi ṯuri đə-Fero đereṯaṯu.
Musa naŋəɽeṯe eđa gəsiya yaŋala eđəñwa nowaldaŋ alo yə-Minḏian. Oro gënǝŋu naŋəmǝđe na naŋələŋaṯe ñere tu ñǝrrwa ñəɽijan.
Elomǝn lənəŋ ŋen Musa gəfo gərəmwoṯa yaŋala yəlëɽəŋu, gënəŋu nǝŋǝnwane đojia đwoɽa sianano. Orn đojia đero đəpëndia sia. ŋen Musa gəseicu ŋen iŋi nəŋǝmajəbinṯi. ŋen gəbɽo ṯwaiñ ṯa aŋəseici ŋen iŋi,gënǝŋu nǝŋəne ole geləŋ Rəmwa igi gaṯa, Musa, miñeinu nḏəbina erǝmanǝŋ rǝlaɽǝŋa.Aganǝŋa agǝđǝṯrua alo yatəɽe."
Rəmwa ndraṯa,"igǝseicu ŋen ŋubwa ŋəleđa əllëɽəñi. Igiđi eŋađwaṯe Fero nano ŋen ŋanṯa ŋəmǝñia Israyil isi yǝɽo ləbai alo yə-Masr. Igiđi elnace alo e-Kanan, alo isi igəlwaɽəṯo Ibrayim, Isag, na Yagub."
Musa naŋeɽǝđe ṯa,"Ndə leđa lwonaṯa ṯa laləŋeṯa fəsëgi gəđuwaṯəñe, igiđi elwaɽe ṯau?" Rəmwa ndrəmalwaɽəṯi ṯa, "FƎÑI ƎSËGI FƎÑI. Lwaɽəṯalo ṯa,'FƎÑI gəđwaṯeiñe ŋa nano. 'Na com lwaɽəṯalo fəñi Yawe, 'Rəmwa irri rəbapanda Ibrayim, Isag, na Yagob. 'Fəŋu irəŋ igi gəlëɽəñi bəɽəbəte."'
Musa gafo gađəñialo na gero gwonaṯa ṯa gabəla Fero nano na gënǝŋu gafo gǝseicia ŋen ṯa gaber giđ aŋəɽwate ŋopia, Orn Rəmwa rađwaṯe orəba gəlëɽəŋu Aron, ṯa aŋəmamađaṯe. Rəmwa rəgërəñiaṯe Musa na Aron ṯa Fero giđi aŋinṯëini.
Đumëđənia ig-ađam :gəđəmaiña 1-4