16. ŋen ŋəđëbria
Ndə Jasua gaiyo đəge,leđa l-Israyil lderṯe ldəđamaice ŋen eŋen iŋi ŋ-Rəmwa orn lderṯe ldǝngiṯi leđa ləmaṯan ildi ləleđa lǝ-kanan walla ṯa lanaṯa alkanun yǝ- Rəmwa.Leđa l-Israyil ṯalukwuđən̄iṯu imwa alo isi yəleđa lə-kanan yəmən̄aṯo Yawe,Rəmwa irri rəɽo đeṯəm. Leđa l-Israyil lero eləŋ,nṯia ṯaliđu ŋen iŋi lënəŋulu lëɽu eŋəṯəɽa eŋen ṯa ŋafo ŋope.
ŋen ŋanṯa leđa l-Israyil lafo lero lənaṯa Rəmwa,rënəŋu ndrələŋgiṯi ṯa leđa ləɽo amëcu egen aldəđame. Leđa ildi lǝɽo amëcu gəleđa l-Israyil lalɽəbəce laŋge,ldəgirṯi laŋge,na ləlǝɽin̄e lwain̄a iŋulu. Ndə liga ləbɽo lwalano đəge iliga ŋen leđa l-Israyil lero lənaṯa Rəmwa,na ləṯërnađainu leđala ildi ləɽo amëcu egen,lënəŋulu loɽəbaṯe aŋəno nano leɽəđe Rəmwa ṯa arələmin̄i eŋəbai eŋen.
Orn Rəmwa ndrəlnaice eđa gənəŋ igi gəɽo đëbria ṯa aŋələmin̄i eŋəbai ŋəleđa ləɽo amëcu egen naṯa aŋəlnaice đëuṯa aralo alo esen. Orn lënəŋulu lajəbayini eŋen təŋ ŋə-Rəmwa eren ṯalukwuđein̄iṯu rəmwa alo rəbal. Nṯia Rəmwa narəŋgiṯi leđa ləmeḏian, ildi ləfo leđa nano ṯwain̄ ləmëcu egen ṯa aldəđame.
Nṯia leđa ləmaḏian ldələmamaṯe laŋge ildi ləlalɽəlo nṯəlia đenəŋ nalo n̄əɽijan.Orn leđa l-Israyil lafo lađən̄ialo kain̄; na lënəŋulu ṯalaldəbəjinu eŋwandr ŋen ŋanṯa leđa lə-meḏian alerəṯe lələfiđiṯia. Nṯia,ldarṯe Rəmwa nano ṯa arəlëbri.
Eloman lənəŋ,maje gafo gəɽo Israyil igi ganəjinu ṯa Jiḏaon gënəŋu ṯaŋəmuruwacu ŋwana eŋaməɽa ŋen ŋanṯa leđa ləmeḏian alerəṯe ləlaldəbaica. Orn Almalaiyəka yi-Yawe naiyeṯa Jiḏaon nano,nayəmeiṯi ṯa,"Rəmwa n̄agafo ldəga,ŋaŋgi agoɽra eđopëḏa. Mbu ŋen ŋanṯa ŋëbri Israyil eđəŋ đəleđa lə-Meḏian."
Eṯen Jiḏaon gafo giđu ađuna yəđukwuđən̄iṯia ŋen alo ŋəpiano. Rəmwa narəlwaɽəṯi Jiḏaon ṯa aŋgere ađuna yakəl. Orn Jiḏaon gafo gəđən̄ia leđa,naŋəḏurṯi liga luləŋgiano. Gënəŋu naŋeɽən̄je ađuna na naŋëpwi ano yərasi. Gënəŋu naŋwađe ađuna yəmaijən yə-Rəmwa orəba nano igi gəfo gəŋen ŋəpiano naŋiṯi Rəmwa điɽəđənia igađuna yakəl.
ulaldiṯano gomən leđa ldəseici ŋen ṯa eđa gənəŋ iŋulu geɽən̄je ađuna yəŋen ŋəpiano na naŋgere, na lënəŋulu ldəceiṯəno kain̄. Nalɽe egeɽa gə-Jiḏaon ṯa aləmaɽin̄e,orn eṯen gə-Jiḏaon naŋəlaiṯi ṯa,"eđa n̄agwonaṯa ŋen ṯa n̄iagamađaṯa rəmwa eralo irri rəŋəɽwen? ndə rəɽo rəmwa,ŋgiṯr aropəṯe ŋuŋ bəɽa!" Orn ŋen gəlwaɽo ṯia,leđa lderṯe ləɽin̄ia Jiḏaon.
Orn leđa ləmeḏian ləɽe təŋ ṯa alaldəbəjiace leđa l-Israyil. Lënəŋulu lafo lwain̄a lero lumađaiyənia. Jiḏaon naŋundəđaici leđa elɽo l-Israyil ṯa alǝpəđelda. Jiḏaon naŋeɽəđe Rəmwa ṯa arəmaŋeici ŋaməla ŋəɽijan iŋi ŋəbəŋaiđia ŋen đeṯəm ṯa Rəmwa rëmirndia eŋen ṯa aŋëbri leđa l-Israyil.
ŋaməla iŋi ŋəɽənda,Jiḏaon naŋeləce ërrwa alo gəđaŋala naŋeɽəđe Rəmwa ṯa arirəwuia ŋuđi ŋulaldiṯano aŋiɽiṯi nano gerṯa iđuđa. Rəmwa ndriđi ṯia. Ulǝŋgi gomən naŋeɽəđe Rəmwa ṯa,ariđi alo yuđu na ṯa ariđi ërrwa gəɽo ŋawaŋəno aŋəɽeṯe gonḏoṯo. Rəmwa ndriđi ŋen ṯia com. Jiḏaon naŋëndi ŋen ŋəŋaməla iŋi ŋiđənṯəma ŋəɽijan ṯa Rəmwa riđ ariđi ŋəmëɽria iŋu ŋen ŋanṯa aŋëbri leđa l-Israyil erəŋ rəleđa Ləmeḏian.
Ṯuri aləf ndređia niɽijin nalo nəɽijan đǝleđa l-Israyil nǝđǝɽe Jidaon nano,orn Rəmwa nǝrəməlwaɽəṯi ṯa leđa ildi lwain̄a kain̄. Orn Jiḏaon naŋəđwaṯe Ṯuri aləf ndređa nəɽijan nalo nəɽijan iđi điđən̄ia ëpwa. Rəmwa ndrəlwaɽəṯi Jiḏaon ṯa ṯuri đwain̄a kain̄ məldin. Nṯia Jiḏaon naŋəlđwaṯe pređ eneɽa orn naŋəṯaini Ṯrui ndređia eređia giɽijin.
Orn uləŋgi gakəl Rəmwa narəlwaɽəṯi Jiḏaon ṯa,mbu ŋirwuəṯi alo iŋutu ŋəleđa ləmeḏian orn ndə agənno ləɽwata,ŋerṯe agəđən̄ialo."Nṯia uləŋgi gakəl,Jiḏaon naŋəɽe alo yiŋutu ṯaŋənno Ṯrui đəleđa lalo ləmeḏian đəɽwaɽəṯia lorəba ŋen iŋi gënəŋu gəseicu ŋen gəndro. Orn đappa đəmaje naŋəmeiṯi ṯa,"ŋen iŋi ŋəđəndra wili gabaŋaiđia ŋen ṯa leđa li-Jiḏaon liđi aləđame Ṯrua đəleđa ləmeḏian!" ŋen Jiḏaon gənno ŋen ṯia,gënəŋu naŋukwuđən̄iṯi Rəmw alo.
Nṯia Jiḏaon naŋoɽəbaṯe Ṯrui nano na naŋəlnanaice rəl,ŋəɽi,na arrerre gələmaŋgara.Lënǝŋulu laɽəđaṯe ŋutu elɽo alo isi Ṯrui đəleđa lalo Meḏian ləfo luwəndra. Ṯrui đə-Gabiniṯ đafo đaɽo ndređia eređia giɽijin larəpo arrerre en̄aŋgara iŋəɽi nṯia leđa ləmeḏian lerṯe ləseicia arrerre gən̄əmaŋgara.
Nṯia, Ṯrui đə-Jiḏaon nađəgereiyəđe ŋəɽi nano,nataltal sia nayaŋəni en̄əmaŋgara. Lënəŋulu ldəri rəl na lɽrəjaice olia,"đoperre đə-Yawe na đə-Jiḏaon!"
Rəmwa ndruđaiđi leđa nano lə-Meḏian,ŋen ŋanṯa aləpuđi na aləɽin̄əđe bəɽan,na taltal,leđa ləmaṯan l-Israyil luntiđəni eneɽa enen ṯa alela alamaṯaiyəđe eŋen ṯa alaldən̄i leđa lə-Meḏian. Lënəŋulu ldəpwi na ləldin̄i alo yəleđa l-Israyil. Leđa ləmeḏian ldaiye eloman lakəl garno ëləf ndređia ređ nalo ndređia nəɽijan.Nṯia Rəmwa ndrëbri Israyil.
Orn leđa lafo lwonaṯa labəđia Jiḏaon gəɽo eləŋ egen. Orn Jiḏaon naŋerəṯe gələŋgiṯia ṯa aliđi ṯia,gënəŋu naŋeɽəđe leđa ṯa aləmananaice ŋəpɽe ŋənən̄oman iŋi ŋiđənu ŋwain̄a iliano ŋəleđa ləmiṯiya. Lënəŋulu nalnanaice Jiḏaon ŋwandra ŋwain̄a iŋi ŋwain̄a iliano.
Orn Jiḏaon naŋəṯoɽaṯe alo yarno erenia yeđa goɽra gəɽo kana gəbərin̄cənia. Orn leđa Lisrayil ṯalukwuđən̄iṯu alo garno rəmwa eren rəpiano.Nṯia Rəmwa ndrənaice leđa lisrayil ŋen ŋubwa təŋ ŋen ŋanṯa lënəŋulu lafo lukwuđən̄iṯia rəmwalo irri rəpiano. Orn Rəmwa ndrəŋgiṯi amëcu egen ṯa aŋəlđame. Lënəŋulu leɽəđe Rəmwa ṯa aŋəlɽrəmwoṯe təŋ,na Rəmwa naŋəlṯwađiṯi eđa gənəŋ igi gəɽo đëbria eđen.
ŋen iŋi ŋafo ŋukuɽəbajinəu iŋiga ŋwain̄ia:Ndə leđa l-Israyil liđu ŋen ŋeicia,Rəmwa riđ narəlnaice ŋen ŋubwa,na lënəŋulu naloɽəbaje eŋen,na Rəmwa naŋəlṯwađiṯi eđa egen gəɽo đëbria. Ndə nṯəliaŋ nəbɽo nwain̄a,Rəmwa narəđwaṯe leđa lwain̄a ildi ləɽo đëbria đəleđa l-Israyil eleđa ləɽo amëcu.
Nṯia đəge,leđa leɽəđe Rəmwa ṯa lwonaṯa eləŋ ŋen ŋarno irənuŋ gəmaṯan.Lënəŋulu lafo lwonaṯa ṯa eləŋ gwala na gonḏoṯo,na gënəŋu igi giđi aləbwain̄əđe leđala. Rəmwa raber rwonaṯa ŋen iŋi lënəŋulu leɽəđo,orn rënəŋu ndrəlnaice eləŋ ŋen ŋarno lënəŋulu leɽəđo.
Đumëđinia egađam:Gə-đagəmia 1-3;6-8