6. ŋen Rəmwa rənaiđo Esag

ŋen Ibrayim goɽra đəge egaŋəno, iđia gëləɽəŋu, Esag, gënəŋu gafo goɽra com. Nṯia Ibrayim nəŋəđwaṯe ibai gonto eləbate ildi leđa ləfo ǝllëɽəŋu ṯa aloɽǝbaija wasen g-Esag.

Ndǝ lerndo alo ywalano isi ŋǝđurǝba ŋ-Ibrayim ŋǝfau, Rəmwa ndrindi ibai alo isi Riab gǝfau. Gënəŋu igi gǝɽo ŋere ŋiđia gorǝba g-Ibrayim.

Riab naŋaŋənṯi ŋen ṯa aŋəṯađe leđa leɽa gëləɽəŋu na ṯa alɽe ibaiga egeɽa g-Isag. Isag naŋəme ŋere đǝge ŋen ŋënəŋu ŋǝrəmaṯo.

Ndə liga ləbɽo lwalano đəge, Ibrayim naŋaiye na ŋen pređ iŋi gënəŋu gafo ləgaso Rəmwa-ra ṯa ariđi đərreiđia eŋen đi-Isag. Rǝmwa ndrəɽi ŋen Ibrayim-ga ṯa giđi aŋerṯe ñere ñwaiña ñero ñuməđainiya ñǝđaṯanda ləpënde, orn wasen gi-Isag, Riab, gaber giđi aŋerṯe ñere.

Nṯia Isag nəŋəṯurṯi Rəmwa eŋen ŋərebeka, na Rəmwa ndrəmëŋgiṯi ṯa aŋwonḏaice eŋwor. Nṯia ñere ñafo ñabəɽaceiđia iliga ñǝfo Rebeka egare, nṯia Rebeka naŋeɽəđe Rəmwa ṯa ŋen ŋawande iŋi ŋəbëđənia.

Rəmwa ndrəlwaɽəṯi Rebeka ṯa, "Irnuŋ gəɽijan giđi aŋela eñere ñəɽijan ñǝlëɽəŋa.Ñënǝŋulu ñiđi ṯañǝbǝɽeiđo ŋulu bǝɽan na iđia igi goɽra giđi ṯaŋəđuɽǝđǝnṯu iđia igi gəta."

ŋen n̄ere n̄ərebeka n̄ələŋənu đəge, iđia igi goɽra galəŋənu gore na gerṯo wala nano, na lënəŋulu ldəmënaici Isu. Nṯia iđia igi gəta nəŋəməña gëndu loɽe lisu, na lënəŋulu ldəmënaici Yagub.

Đumëđənia eg-ađam gǝđətwođalo :24:1-25:26