2. ŋen ŋeicia ŋënṯu alo

Ađǝm na wasen gëləɽəŋu lafo laŋəra nano kaiñ eđəmaṯia eđen igrri gəŋəra ŋaiyo igi Rəmwa riṯəlo. Eđa gero gənəŋ iŋulu ganəjinu ndrenia nano, orn ŋen iŋi ŋero ŋəliđia lǝđən̄isa đən̄wo nano, ŋen ŋanṯa ŋen ŋeicia ŋafo ŋero eləbate. Lënəŋulu lafo labərnda igrri jaica na ṯalɽwaɽaiđo Rəmwara.

Orn rəmwa rafo reicia igrri irri rǝləŋeṯo ŋaməɽa. Ndreɽəđe wuji ṯa," ŋen ŋafo đeṯam iŋi Rəmwa rəlwaɽəṯiŋa ṯa ŋerəṯe agəsa ləđia luɽi gənəŋ elorǝb alo igrria?"

Wuji naŋoɽəbace ole ṯa, "Rəmwa ralwaɽǝṯinde ṯa n̄əse ləđia lənuɽi pređ illa uɽi gəđələŋeṯa ŋen ŋəŋəra na ŋeicia. Rəmwa ralwaɽǝṯinde ṯa, 'ndə n̄agəso iđia gakəl, walla ndə n̄agəbro, n̄agiđi n̄aiye."'

Orn rəmwa reicia ndruɽəbiṯi wuji eŋen ṯa, "ŋen ŋero ŋəfia đeṯam! Agaber agiđi ŋaiye. Rəmwa raləŋeṯo ŋen ṯa ndə agəso uɽi gakǝl agiđi ŋarneṯe na agiđi ŋaləŋeṯe ŋen ŋaŋəra na ŋeicia garno ŋen rënəŋu rəbiđia."

Wuji naŋəseici ŋen ṯa iđia guɽi gakəl gafo gaŋəra ŋaiyo na gəsëina game kain̄. Na gënəŋu gafo gwonaṯa com gələŋeṯa ŋen nisi, naṯia gënəŋu naŋəme iđia gənəŋ elorəb luɽi na naŋəse. Nṯia gënəŋu naŋənaice ebaŋgen gəmaṯan, igi lafo ldəga, na gënəŋu naŋǝse, com.

Na taltal, siano esen nigəgiđəni, na lënəŋulu lələŋini nano ṯa lafo məɽəməɽen̄ ndrenia nerəlo nano. Na lënəŋulu linṯəji ŋen ṯa alṯərni raṯaira rənuɽi niđənu ndrenia.

Nṯia aḏam na wuji gëlǝɽǝŋu ləne ole gə-Rəmwa rəbərnda igrri, lënəŋulu ldələbijǝnṯi Rəmwa. Nṯia Rəmwa ndrundəđi aḏam ndrǝmeiṯi ṯa," agafo ŋga?" Aḏamm naŋoɽəbace ole naŋaṯa, egano agəbərnda igrri nṯia egafo igađən̄ialo, ŋen ŋanṯa egafo məɽəməɽen̄ ndrenia nero n̄i nano. Nṯia niləbəcini."

Orn Rəmwa ndrəleɽəđe ṯa," fəsëgi gəlwaɽəṯənde ṯa n̄agafo məɽəməɽen̄ ndrenia nerənde nano? N̄agənən̄aŋ n̄agaso uɽi igi igəlwaɽəṯǝnde ṯa n̄erṯe n̄agəsa? Orn aḏam nəŋǝmuɽəbiṯi eŋen ṯa, wuji igi agənajən̄e, gënəŋu ganajən̄e uɽi." Na Rəmwa ndreɽəđe wuji ṯa," agiđu ŋen ŋanṯau?" Na wuji naŋǝmuɽəbiṯi eŋen ṯa," rəmwa reicia riđin̄i ŋađəna."

Rəmwa ndreiṯi rəmwa reicia ṯa," agabuŋənu! Agiđi ṯəŋaraɽo aragalo gəlëɽəŋa na agiđi ṯəŋaso abəɽtua. Ñagiđi ñageđaiđe eŋen wujiga, ñere ñəlëɽəŋa na ñəllëɽəŋu ñiđi añəgeđaiđe eŋen, com. Ɖələŋe đwuji điđi ađeŋabuɽi nda əllëɽəŋa, na agiđi ŋase lwaṯəɽe əllëɽəŋu."

Nṯia Rəmwa ndrəlwaɽəṯi wuji ṯa," agiđi ṯəŋaləŋo n̄ere ŋenəŋa ŋubwa kain̄. Na agiđi ṯəŋabwan̄o ebaŋgalo, na gënəŋu giđi ṯaŋirǝndi."

Rəmwa ndreiṯi aḏam ṯa," aganaṯo wuji gəlëɽəŋa neŋerəṯe agəñǝnaṯa. Điñiđi alo yabǝŋənu, na agiđi ŋiđi ŋəmëɽria ŋəbəɽaŋəno ṯa ŋase ŋəsa. Na agiđi ŋaiye, na aŋəno yəlëɽəŋa yiđi ayoɽəbaṯe iđuđa." Orn aḏam naŋënci wasen gəlëɽəŋu ṯa Awa, ŋen ŋanṯa ṯa" đənaiđia -đaməṯia," ŋen ŋanṯa gënǝŋu giđi aŋəɽeṯe ləŋgen gǝleđa təmtəm. Na Rəmwa ndrënji Ađǝm na Awa ndrenia nano nǝnërua nəđwala.

Nṯia Rəmwa ndraṯa, "ŋen ŋanṯa điñiđi leđa ildi larnëndr eđələŋeṯa ŋen ŋǝŋəra na ŋeicia, lënəŋulu laber liđi aləŋgini ṯa aləse iđia guɽi gəđəmṯia na aləmṯe bəɽəbəte." Nṯia Rəmwa ndrəđwaṯe Aḏam na Awa igrri ndëwuǝr igi gaŋəra kaiñ Gaḏan. Rəmwa ndrəɽi məlaiyəka eləbe laḏan ṯa ayərəmwoṯe irria ṯa eđa gənəŋ aŋerəṯe gəsa iđia guɽi igi gəđəmṯia.

Ɖumëđənia eg-ađam: gəđətođalo 3