24. ŋen Yuanna gənaico Yesu mamuḏiya

Yuanna, iđia gə-Sakariya na Ilisabađ, naŋoɽreṯe na naŋəɽeṯe Nabi. Gënəŋu gafo gaɽəŋa eđən̄wa ṯaŋaso lai na yama, gënəŋu gëɽǝnu erenia nano igi giđənu walaga gəđëuri.

Leđa lwain̄a ildi leṯo Yuanna nano eđən̄wa ṯa aləmanəṯe. Gënəŋu ŋalërrəŋaici ŋen, na nəŋaṯa," ṯađor ŋen eŋalo ŋeicia, ŋen ŋanṯa ŋələŋe ŋelo ŋafo ṯwain̄!"

ŋen leđa ləno ole gə-Yuanna, lwain̄a iŋulu ildi ləṯađo ŋen eŋen ŋeicia, na Yuanna naŋəlnaice mamuḏiya, orn nələŋ nwain̄a ini nəɽo ŋoɽwa nǝkanisa neṯo ŋen ŋanṯa Yuanna aŋəlnanaice mamuḏiya cum, orn lënəŋulu lero ləṯađa ŋen eŋen ŋeicia.

Orn Yuanna naŋəlwaɽəṯi nələŋ nal-Yawuḏ ṯa," ya n̄ere n̄imwa yeicia! ŋgiṯr ŋen eŋalo ŋeicia na min̄r ŋen iŋi ŋəbërrəŋeiđia ṯa n̄agaṯađo ŋen ŋeicia. Nuɽi pređ ini naber nələŋa liđia laŋəra niđi anǝriđəni na niđi anəwujəni isia." Yuanna gabəɽenṯeṯo ŋen iŋi ŋafo ŋəlwaɽəno pənde," sëiđu, igəndəđwaiṯia eđa nëin̄ua, igi giđi aŋəndëṯuɽəđiṯi đađ."

Leđa ləmaṯan lal Yawuḏ leɽəđe Yuanna ndə gënəŋu gaɽ al masiya. Yuanna nəŋəluɽəbiṯi eŋen ṯa," igënən̄i egero egəɽia al masiya, orn eđa gëni geṯo n̄i nḏurṯu. Gënəŋu gerṯo ŋabəɽa ŋoɽra ŋəmən̄aṯən̄e egero igarəjađaṯa eŋen ṯa imamin̄eici nḏəbina erəmanəŋ rəlëɽəŋu."

Iliga lomən, Yesu geṯo ṯa Yuanna aŋəmanaice mamuḏiya. Nṯia ŋen Yuanna gəseicəma, nəŋaṯa," seiđur! fəŋu ɽruma ildi ɽrəmwa ildi liđ aləŋgaici ŋen ŋeicia pređ ŋalo."

Yuanna nəŋəlwaɽəṯi Yesu ṯa," egero igarəjađaṯa eŋen ṯa eŋanaice mamuḏiya. Gabanṯa ṯa fəŋa again̄ənaica mamuḏiya." Orn Yesu nəŋaṯa," ŋen ŋaŋəra ṯa ŋan̄ənaice mamuḏiya, ŋen ŋanṯa fəŋu ŋen iŋi ŋəđǝrwaṯo ṯa ŋiđi." Nṯia Yuanna naŋəmanaice mamuḏiya, ŋen ŋarno gero gəbəđia ŋeicia.

ŋen Yesu gəmən̄o eŋau liga gəneinu mamuḏiya đəge, usila gərəmwa girəwuṯəma nano garno bəldugur. Na iliga ildəi đurri, ole gə-Rəmwa nəŋela elo nəŋaṯa," agaɽo iđia gəlëɽən̄i igi gubwaniya, na igaŋërəṯiŋa nano kain̄."

Orn rəmwa ndrəlwëɽəṯi Yuanna ṯa," usila gətëɽe giđ aŋerwa na aŋəɽëŋe egeđa igi agəmanaica mamuḏiya. Eđa igëia giđ aŋǝɽeṯe iđia gərəmwa." Rəmwa raɽo ronto. Orn ŋen Yuanna gənaico Yesu mamuḏiya, naŋəne rəmwa papa gəɽwata, na naŋənwane iđia gǝrǝmwa, fǝŋu yesu, na gënǝŋuŋ naŋǝnwane usila gətëɽe com.

Đumëđənia igajil: Maṯṯa ;3 Margus 1:9-11; Luka 3:1-23