Đərreiđia eŋen đəmaijən iđi đə-Rəmwa
Na Malaiyəka nḏeiṯi ŋere iŋi ŋajiba eđa gəɽorra ŋabërnia Mariam ṯa ŋiđi aŋələŋe iđia gə-Rəmwa. Iliga ŋen gënəŋu gajiba eđa gəɽorra kwai kwai usila gətəɽe naŋirǝwuṯi nano na naŋwonḏaice. Gënəŋu naŋələŋe ŋere na nəŋënǝci Yesu. ŋen ŋarno ṯia, Yesu gaɽo Rəmwa na aŋəno.
Yesu giđu aŋwara ywaiña isi yibaŋeiđia ŋen ṯa gënǝŋu gaɽo Rəmwa. Gënəŋu gerldo nəŋau, naŋǝđuri đəbera, naŋageiđi leđa lwaiña lwuma, nǝŋəməñaci leđa nusila nano neicia, nəŋətuđi leđa laiyo ləmǝṯo, na nəŋiđi ragifi đenəŋ na lǝmme lǝɽijan ləɽeṯe aciəba kwaiña eleđa ndređe alǝf đenəŋ.
Yesu gafo gaɽo eđa goɽra com gəbërrəŋaiđia ŋen, na gënəŋu gaɽwata ŋələŋeŋa ŋen ŋanṯa gënəŋu gaɽo iđia gə-Rəmwa. Gënəŋu gërrəŋaiđu ŋen ṯa ñabwiṯi leđala ŋen ŋarno ñagubwa ntəmna enalo.
Gënəŋu nəŋërrəŋaiđi ŋen com ṯa ñabwiṯi Rəmwara ñagəmañaiji laŋge pređ, garno đwala eđalo.
Yesu gaṯa ṯa ŋələŋe ŋə-Rəmwa ŋaɽo ŋaiyo-aŋəno ŋəməñaṯo laŋge pređ ildi ləfo alo ləŋəra. ŋen ŋame ṯa leđa pređ alɽaŋađaṯe ŋələŋe nano ŋə-Rəmwa. Ṯa ŋënṯi eŋələŋe ŋə-Rəmwa, ŋen ŋanainiaŋa ṯa ŋəbərni eŋen ŋëləɽəŋa ŋeicia.
Yesu gërrəŋaiđu ŋen ṯa leđa ləmaṯan liđi alməŋənṯi na alëbərni, orn ləmaṯan laber liđi alëbərni. Gënəŋu gaṯa ṯa leđa ləmaṯan larno đuđa iđi đəŋəra. Lënəŋulu ləŋənṯu ŋen ŋǝŋǝra ŋəmajen ŋə-Yesu na ldabərni. leđa ləmaṯan larno đuđa đəpɽaŋəno đəfo eđađ, alo isi ŋəlwa ŋole gə-Rəmwa gero gəlofia na gero ŋəlwa ŋəđwanṯa. Leđa ildi ləneđo ole gəṯwainu eŋen ŋi-Yesu na gaber giđi aŋënṯi eŋələŋe ŋǝlëɽəŋu.
Yesu gërrəŋaiđu ŋen ṯa Rəmwa rabwa leđala ildi leicia kaiñ. Rënəŋu rwonaṯa ṯa arəldəŋgađeici ŋen ŋeicia na arliđi ñere ñəlëɽəŋu.
Yesu galwaɽəṯəndr com ṯa Rəmwa rageiye ŋen ŋeicia. ŋen Ađǝm na Awa liđu ŋen ŋeicia, ŋen nəŋənṯi eđələŋe pređ eđen. Garno ŋen ŋiđeinu ṯia, leđa pređ liđu ŋen ŋeicia na ndəlađini ano Rəmwara. Nṯia, leđa pređ laɽo ëməcu gə-Rəmwa.
Orn ŋen ŋanṯa Rəmwa rabwa leđala lalo pređ kaiñ rënəŋu ndrənaiđe iđia gëləɽəŋu gonto ŋen ŋanṯa eđa gənəŋ igi gëndu ŋen ŋə-Yesu gaber giđ aŋəneini ŋen ŋubwa ŋeicia, orn liđi aləfeṯe Rəmwara bəɽəbəte.
ŋen ŋanṯa ŋen ŋeicia ŋǝllëɽəŋa, agadrənu nano na nëŋarəjađaṯe eŋen ṯa ŋaiye. Rəmwa riđi arəŋǝceiṯiano, orn rënəŋu ndrərace đëceiano i-yesu gabanṯa ṯa fǝŋa .Iliga ŋen Yesu gaiyo iđuɽi, gënǝŋu gamo ŋen ŋəbuwa ŋǝlǝɽəŋa.
Yesu gero gəbiđia ŋen ŋǝnǝŋ ŋeicia, orn gënǝŋu gëŋənəṯu ŋen ŋəbuwa na naŋaiye ŋen ŋanṯa aŋəɽeṯe điɽəđənia đəđǝŋgaica ŋen ŋeicia ŋəlëɽəŋa na ŋeicia ŋǝleđa pređ ildi lǝfo alo,ŋen ŋanṯa Yesu ganaiđo aŋəno yǝlëɽəŋu, Rəmwa rəŋgaica ŋen ŋeicia pređ, na ŋen ŋeicia iŋi ŋǝđeiñinu com.
ŋəmaɽria iŋi ŋəŋəra ŋaber ŋiđi aŋəbri. ŋen ŋero ŋənəŋ ṯa agiđi ŋiđi ŋen ŋanṯa ñerṯe đërraiđia eŋen Rəmwara .Yesu bǝɽan giđ aŋwasace ŋeicia ŋǝlëɽəŋa. Aganəŋa ëndu ŋen ṯa Yesu gaɽo iđia gə-Rəmwa, ŋen ŋanṯa gënəŋu gaiyo iđuɽi eŋen ŋǝlëɽəŋa, na ṯia Rəmwa ndrəmatuđi eŋəɽaiñ təŋ gəmṯo.
Rǝmwa riđi arǝberi leđa pređ ildi lǝfo egal masiya na ildi laŋǝnṯǝma ṯa gaɽo elǝŋ egen. Orn gënǝŋu gaber giđi aŋaberi eđa igi gero gǝbëndia ŋen ŋǝlëɽǝŋu. Gerṯa ṯa agwaiña laŋge walla agaɽo ŋǝbaiyaŋəno, ummia walla ŋere, agoɽra walla agǝta walla alo isi agǝfau. Rǝmwa rabwaŋaiya na ronaṯa ṯa ŋëndi ŋen ŋǝyesu ŋen ŋanṯa gǝnëŋu alerṯe đërreiđia eŋen ṯwaiñ ŋu lǝga.
Yesu gëwendǝđǝndǝr ṯa alëndr ŋen ŋǝlëɽǝŋu na ṯa alanini mamuḏiya. Ñagëndu ŋen đeṯǝm ṯa yesu gaɽo al masiya, igi gaɽo iđia gǝrǝmwa gonto? Ñagëndu ŋen đeṯǝm ṯa ñagiđu ŋen ŋeicia na ñagonaṯa rǝmwa ṯa arǝndakǝme? Ñagëndu ŋen ṯa yesu gaiyo iđuɽi ŋen ŋanṯa aŋgeici ŋen ŋeicia eŋalo?
Ndǝ ñagëndu ŋen ŋǝ-yesu na ŋen iŋi gënǝŋu giṯənde , ñaŋ ñagaɽo leđa ildi lëndu ŋen ŋal masiya! Rǝmwa ramaŋa iŋǝrǝm ŋǝŋǝlǝŋ ŋǝseṯan na ŋǝndǝɽr egarrerre gǝŋǝlǝŋ ŋǝrǝmwa. Rǝmwa ramo ŋen ŋǝbǝtǝŋǝɽan, ŋeicia iŋi ñagǝbǝđia na ndrǝŋanaice ŋen ŋǝmaijǝn ŋǝđiđia ŋen ŋǝtǝɽe.
Ndǝ ñagëndu ŋen ŋal masiya, Rǝmwa rǝŋgađeicinde ŋen ŋeicia eŋalo ŋen ŋanṯa ŋen iŋi Yesu giđu. Đǝñiđi, Rǝmwa raŋënṯiŋa ṯa ŋaɽeṯe đappa ṯwaiñ gerṯa ëmǝcu.
Ndə aganǝŋa agəɽo đappa đǝ-Rəmwa na ibai gə-Yesu igi gəɽo eləŋ, agiđi ŋwonaṯe ŋen ṯa ŋëndi ŋen iŋi Yesu gəbërrəŋaiđia. Ndə ñagëndu ŋen ŋaləmasiya, ñagiđi ñirnḏeini. Orn Rəmwa raɽo đwonaṯa eŋen na raṯaṯa ndə agəlwaɽo ëiñwaya eŋen ŋeicia ŋǝlëɽəŋa, rënəŋu riđi arəŋaŋgađeici ŋen ŋeicia ŋǝlëɽəŋa. Rënəŋu riđi arəŋabǝɽe ano ṯa ñabwaiñǝđe ŋenŋa ŋeicia.
Rəmwa rəlwaɽəṯənde ṯa ñaṯurṯi, na n̄ërrǝŋaini ŋen ŋǝlëɽəŋu, na ṯa aləmukwuđəñiṯir alo leđala ildi lëndu ŋen ŋǝ-Ləmasiya, na ñalwaɽiṯi leđa ŋen rënəŋu riṯinde. ŋen iŋi pređ ŋandəmađaṯa ṯa alerṯər đërreiđia eŋen đurri ŋu ləga.
Đumëđənia ig-njil: Rumiya 3:21-26, 5:1-11; Yuanna 3:16; Margus 16:16; Kolosi 1:13-14; 2 kərunđus 5:17-21; 1 Yuanna 1:5-10