50. Ɖoɽəbəđia đi-Yesu
Garno nṯǝlia ndređia ređia giɽijan, leđa lafo lwaiña ildi lǝnna ŋen ŋǝmaijǝn ŋǝ-Yesu al masiya alo nano pređ. Kǝnisa đafo đamǝñađaṯa nëiñua. Yesu gaṯa ṯa gënǝŋu giđi aŋoɽǝbǝđia iliga lǝnḏurṯu alo. garno ŋen gënǝŋu gero goɽǝbǝđo mǝldin, gënǝŋu giđi aŋiđi ŋen ŋarno gǝɽu.
ŋen ŋarno ləgəḏurṯiar Yesu ṯa aŋoɽəbəđia, Rəmwa rwonaṯa ṯa aɽəŋr eŋen ŋəŋəra na iŋi ŋəmiđia gəŋəra nano. Gënəŋu com gwonaṯa ṯa alwǝɽǝṯr leđa eŋen ŋəŋələŋe ŋǝlëɽəŋu. ŋen Yesu gafo alo gënəŋu gaṯa," Ṯaləmis əllëɽəñi yiđi ayërrǝŋeiđi ŋen ŋəŋəra ŋəŋələŋe ŋə-Rəmwa eleđa pređ lalo təmətəm, Orn na ṯia liga lənḏurṯu liđi alela."
Leđa lwaiña məldin ildi lero lənna ŋen ŋə-Yesu. ŋen gënəŋu gəmulu goɽəbaṯa elo, Yesu naŋǝlwaɽəṯi Ṯalǝmis ilëɽəŋu ṯa ayërrəŋeiđi ŋen ŋəmaijən eleđa ildi lero lənna ŋen ŋǝlëɽəŋu kwai kwai. Gënəŋu nǝŋaṯa," mbər na ñiđi ṯaləmis ŋoɽwa ŋəleđa pređ!" na," nii nore nwonaṯa ṯa anwanḏəni!"
Yesu naŋaṯa com ṯa, "Ebai gero goɽra gamǝñaṯo elǝŋ gëlǝɽǝŋu. Garno ŋǝlǝŋ ŋalo ŋǝggeiñe, lënǝŋulu liđ alndǝniace ŋen ŋubwa na alndǝɽǝñe ŋen ŋanṯa ñi. Orn ṯia eŋen ŋalo isi ñagiđi ñafeṯe eŋen ŋubwa kaiñ, bǝɽeṯr nano ŋen ŋanṯa egađǝmo seṯan, isi yǝbǝrndiya alo. Ndǝ ñagerṯo đwonaṯa iñi ñoman pređ, nṯia Rǝmwa riđi arndǝberi!"
Yesu nǝŋəlwaɽiṯi Ṯaləmis ilëɽəŋu đumëđəniađa ṯa ayilwaɽǝṯi leđa eŋen ŋǝliga ildi lǝđamǝndađa alo. Gënəŋu nǝŋaṯa," maje gəwađo ŋwana ŋəŋəra igii gəlëɽəŋu. ŋen gǝfo iŋuriđ, eđa gəgeiyema nəŋela na nəŋəwađe ṯoɽwar eŋwana , na gënəŋu gabəla."
" Ndə ŋaiña ŋobəđo, ləbai ləmaje ldela ldəmalwaɽəṯi ṯa,'ya eləŋ, gerṯa agawađo ŋwola ŋəŋəra igii. Orn ṯoɽwar đeṯo ŋga?' eləŋ naŋuɽəbiṯi eŋen ṯa, 'eđa igi gəgeiyeiñe gəwađalo.'''
"Ləbai luɽəbiṯi eləŋ eŋen ṯa,' agwonaṯa ṯa ñəcəđaṯe ṯoɽwar alo?' Ndo. Ndə ñagiđu ṯia, ñagiđi ñaləcəđaṯe alo ŋwanaŋa com. Đərur liga alela ildi ləđwanḏa na ṯia igiđi ireiđi ṯoɽwar alo ñakase ṯa ađuɽəni, Orn mər ŋwana ñalëɽi eđwarra đəlëɽəñi.'''
Orn ṯaləmis niyərǝṯe yələŋeṯa ŋen ŋəđumëđənia, nṯia yënǝŋulu niyeɽəđe Yesu ṯa aŋələkirṯi ŋenano. Yesu nǝŋaṯa," eđa igi gwađo ŋwana ŋaŋəra gënəŋu garno almasiya. Gii gaɽo alo. ŋwana ŋaŋəra ŋaɽo liđia ləŋələŋe ŋə-Rəmwa."
"Ṯoɽwar đaɽo leđa ildi lə-seṯan. Eđa gǝgeiñe igi gwađo ŋwana garno seṯan. Đwanḏa đarno liga lađəməndëđənia đənḏurṯu alo, na leđa ildi lwanḏa larno Məlaiyəka yə-Rəmwa."
"Ndə alo yaməndëđǝnu đǝge, Malaiyəka yiđi ayərrarreiđi leđa pređ ildi ləseṯan na yiđ aiyǝlawuṯi isia yibwa, alo isi lënəŋu liđi alarre na aləsaṯe eŋađ eŋen ŋubwa kaiñ. Orn leđa ildi lǝđurwaṯo eŋen liđi alawađialo larno ëđəñina eŋələŋ ŋǝ-ḏaṯa Rəmwa."
Yesu nǝŋaṯa com ṯa gënǝŋu giđi aŋoɽəbaṯa alo ŋen liga alo yǝmulu yamǝndëđǝnia. Gënəŋu giđi aŋoɽəbǝđe ŋen ŋarno gënǝŋu gǝfo gabeinu elo,nṯia, aŋəno ilëɽǝŋu yiđi aiyəseini na aŋela isǝbwëɽua elo. Iliga ildi Yesu giđi aŋoɽəbəđia, leđa pređ ildi lëndu ŋen ŋǝ-Rǝmwa na laiyo iŋu liđi altwođe eŋəɽaiñ na alopəđaiđelda isǝbwëɽua.
Nṯia leđa ildi lëndu ŋen ŋal-Masiya liđi altwođe na aɽrraiđe leđala ildi lǝfo ekǝl Masiya ildi ltwođo eŋəɽaiñ. Lënəŋulu pređ liđ alǝfeṯe Yesu ŋəla. Nṯia đəge, Yesu giđi aŋǝfeṯe leđala ǝllëɽəŋu iđëuṯaralo na iđərreiđia ŋen bəɽəbəte.
Yesu gëɽu ŋen ṯa giđi aŋanaice leđa pređ ṯaj ildi lëndu ŋen ŋǝlëɽǝŋu. Lënǝŋulu liđ alǝfeṯe Rəmwara na aɽəŋe iđëuṯaralo bəɽəbəte.
Orn Rǝmwa riđi arakǝme leđa pređ ildi lero lǝbëndia ŋen ŋi-Yesu. Rënǝŋu riđi arǝlawuṯi egǝṯa igi goɽra goliano, alo isi liđ ṯalaro na ṯalǝsaṯo eŋađ eŋen ŋubwa bǝɽǝbǝte. Sia isi yaber yabǝiṯia yiđi ṯayǝluɽu, na luđua laber liđ alǝŋgiṯi kwai kwai.
Ndə Yesu goɽəbaṯo alo, gënəŋu giđi aŋəmǝndëđe Seṯan na ŋələŋe ŋǝlëɽəŋu. Gënəŋu giđi aŋǝwuṯi seṯan egəṯa goliano igi gerṯo isiano isi ywoɽa bəɽəbəte, leđala pređ ildi laŋənṯu ŋen ṯa ləteṯa na lero lǝđiñiađaṯa Rəmwa eŋen.
ŋen ŋanṯa Ađǝm na Awa lero lađañəđəṯia Rəmwa eŋen na lǝmaṯa ŋen ŋeicia alo, Rəmwa ndrəlaboŋe na ndrǝɽi ŋen ṯa araləmǝndađe. Orn iliga lənǝŋ Rəmwa riđi ariđi elo gəmaijǝn na alo yəmaijǝn isi yiđi ayərəjađaṯe.
Yesu na leđa əllëɽəŋu liđi aləfeṯe alo yəmaijǝn, na gënəŋu giđi aŋirldi ŋələŋe bəɽəbəte elaŋge pređ ildi ləmǝṯia. Na gënəŋu giđi aŋalteđeṯe ŋwal isi na ŋen ŋubwa, đəciano, đara, ŋen ŋeicia, ŋen ŋeɽeno walla ŋəɽaiñ laber liđi aləfeṯe mǝldin. Yesu giđi aŋirldi ŋələŋe ŋǝlëɽǝŋu iđëuṯaralo na eđəɽwaiciđia,na gënəŋu giđi aləfeṯe leđala əllëɽəŋu bəɽəbəte.
Đumëđənia iga-ñjil: Maṯṯa 24:14; 28:18; Yuanna 15:20, 16:33; Ruiya 2:10; Maṯṯa 13:24-30, 36-42; 1Ṯasəluniki 4:13-5:11; Yagub 1:12; Maṯṯa 22:13; Ruiya 20:10, 21:1-22:21