3.ŋawa iŋi ŋərrarređa alo
Ndə liga ləbɽo lwalano đǝge, leđa ldəfeṯe alo lwaiña.Lënǝŋulu lafo lëpia eŋen na lagera ŋen kaiñ.ŋen naŋeiciṯi Rəmwa nano rënəŋu naŋëɽi ŋen ṯa arəməndađe ləbate pređ ŋauŋa iŋi ŋwaiña ŋərrarređa alo
Orn Noa gǝfiđǝnu gəđərwaṯu eŋen Rəmwa nëiñua. Gënəŋu gafo gaɽo eđa gəteɽe, gəfo eleđa lëbia eŋen. Rəmwa ndrəlwaɽəṯi Noa eŋau iŋi rëɽu ŋen ṯa riđi arəđwaṯa. Rënəŋu ndrəlwaɽəṯi Noa ṯa aŋabəđe đəpundri đəbrano.
Rǝmwa ndrəlwaɽəṯi Noa ṯa aŋiđi đəpundria đwalano đarno ñəlwa 140, na đəbərano đarno ñəlwa 23, na đwala đarno ñəlwa 13.5 Noa gafo ganainu ŋen ṯa aŋabəđe đəpundri upəndrga na ṯa aŋiđi alo ëṯriya giɽijin, eŋəna ywaiña, iuwǝr yəra yəđəber. Na đǝpundri điđi ađərəmoṯe Noa, eɽia gəlëɽəŋu, na laŋge ləŋǝlɽwa pređ ŋəđwala đalo ṯa aləfeṯe ŋope iliga ildi ŋau ŋiđi aŋerrarređe alo.
Noa naŋənaṯe Rəmwa. Gënəŋu naŋabəđe đəpundri liđiala liɽijin əllëɽəŋu ŋen ŋarno Rəmwa rəlwaɽəṯəlo.Na đəpundri nađəme nṯəlia nwaiña iliga lađəbəđa, ŋen ŋanṯa đënəŋu đafo đoɽra kaiñ. Noa naŋəlwaɽəṯi leđa ŋenǝŋa ŋonṯoṯo iŋau iŋi ŋiđ aŋela ŋərrarređa alo na naŋəlwaɽəṯi ṯa aloɽəbaṯe Rəmwa nano, orn lënəŋulu lerṯe laməndəcia ŋen.
Rəmwa ndrəlwaɽəṯi Noa na eɽa gëləɽəŋu com ṯa alëkəɽəđi ŋəsa ŋwain̄a eŋen na ŋəđwala eđen com. Ndə laŋge pređ ləfo ŋope đəge, Rəmwa ndreiṯi Noa ṯa fǝliga ildi əllëɽəŋu, Wasen , ləđia liɽijin na lwasenanda elden ṯa alënṯi iđəpundr -leđa lafo laɽo đeneŋ nalo liɽijin pređ.
Nṯia Rəmwa ndrəđwaṯe đwala ŋoɽa pređ đərrwa na đəlɽda ndəfia ṯa aɽe iđəpundr Noa nano na ṯa alëbǝrǝni iliga ildi lǝŋau ŋǝđǝrrarređa alo. Rəmwa ndrəđwaṯe đwala ŋoɽa đeneŋ nǝŋǝmǝñe ŋǝɽejian iđi điđi ađiđini điɽəđənia.Iliga ŋen lënəŋulu ləfo iđəpundr pređ, Nṯia Rəmwa pəɽan ndrəlanḏe iwuǝr.
Nṯia ŋau ṯaŋəđəno, ṯaŋəđəno na ṯaŋəđəno. ŋawa naŋəđəne iđën̄ina ndređia marldwan na uləŋgi ndređia marldwan ŋero ŋəđrwa! ŋau naŋətari alo. ŋawa naŋǝdari laŋge pređ ildi ləfo alo, na eyien com isi yǝđaŋǝṯa elo.
Na laŋge pređ ildi lafo alo yonḏəṯo ldaiye, illi leđa na đwala iđi đəfo iđəpundr. Na đəpundri ṯađəlalo nəŋau na đənəŋu nǝđərǝmwoṯe laŋge pređ ildi ləfo iđəpundr ṯa ŋau aŋerṯe ŋələmǝndađa.
ŋen ŋau ŋəđru đəge iŋi ŋəfo ŋəđənia, đəpundri nǝđəlale nəŋau nubwa đenəŋ, na iliga lakǝl ŋau ṯaŋuruwëiđu. Orn lomanǝŋ đəpundri nḏəmëñəniano aiyen eđəpe, Orn ŋawa ŋafo ŋatëru alo məldin. Ndə nubwa naɽəjaiđo egorǝb niɽijin təŋ, aiyen ṯaiyəsëinu ŋəɽwa.
Ndə ñoman ñaɽəjaiđo egorǝb ndređa marldwan, Noa naŋəđwaṯe uɽəfia gəbarnia labəɽiluŋ ṯa aŋənwanəđe gaɽe ŋawa ŋurwëiđu. Na labǝɽiluŋ ṯalakandaco lǝpwaiña alo yuđu, orn lderṯe ləfiđiṯia.
Natǝŋ Noa nǝŋǝđwaṯe uɽəfia gəbërnia bəldugur. Yënǝŋu naiyerṯe yǝfiđiṯa alo yonḏoṯo kwai kwai, nṯia naiyoɽəbaṯe Noa nano. Ndə ñoman ñəbɽo đeneŋ nǝñeɽijan gënəŋu naŋəđwaṯe bəldugur təŋ, na yënəŋu nəyoɽəbəđia yapo đǝṯëi nëiñua đuɽi gə-Seiṯun! ŋawa ŋafo ŋuruwaiđia na ŋaiña ŋafo ŋobəđa təŋ!
Orn Noah naŋǝḏurṯi təŋ ñoman đenəŋ nalo n̄əɽijna naŋəđwaṯe bəldugur eñoman iñi ñǝɽaca lorəba liɽijin. Eloman ildi, lënǝŋu nǝləfiđiṯi alo nəluməñiniano na lerṯe loɽǝbǝđia. ŋawa ŋafo ŋabaiya!
Ndə nubwa nəbɽo nəɽijan Rəmwa ndreiṯi Noa ṯa," məño leđala leɽa gəlaɽəŋa na đwalađa pređ ṯa ñaṯađe yəđəpundri alo. Erṯər ñere ñwaiña na ñere ñəlorba na ñonḏəjaice lǝbate." Nṯia Noa na eɽa gëləɽəŋu ldəməñe iđəpundr.
ŋen Noa gəmən̄o iđəpundr,gënəŋu nəŋabəđe ađuna na nəŋiđi điɽəđənia đəŋoɽa ɽetǝɽeteo ŋəđwala iđi đəđəɽəđənia. Rəmwa rafo raŋərṯo điɽəđənia nano na nəŋabuŋṯi Noa na leđa leɽa gǝlëɽǝŋu.
Rəmwa ndraṯa, "igalwaɽo đaṯəm ṯa egaber igiđi ñabuŋe ləbate təŋ ŋenŋa ŋeicia iŋi leđa liđu, walla ñegere ləbate ŋauŋa iŋi ŋəraređa alo, garno leđa lǝfo leicia iliga ŋen lënǝŋulu laɽo n̄ere n̄əra."
Nṯia Rəmwa ndrëɽi đərndelia đəbaŋaiđia ŋen ŋanṯa ŋaməla ŋəđərreiđia ŋen. N̄oman pređ đərndelia đaŋənu elambala, Rəmwa nǝrǝlǝŋəđeini eŋen iŋi rënəŋu rəgaso na eleđa əllëɽəŋu com.
Ɖumëđǝnia eg-ađam gəđətođalo 6-8