20. Đəmən̄ia na đoɽəbeđia
ŋələŋe ŋ-Israyil na ŋal-yawuḏiya ndəm ŋiđu ŋen ŋeicia ŋegeiya Rəmwa. Lënəŋulu lagero đərreiđia eŋen iđi liđu Rəmwara alo yi-Sina. Rəmwa ndrəđwaṯe Nəbi yəllëɽəŋu đəgərëin̄aṯađa ṯa alṯađe ŋen eŋen ŋeicia na ṯa alukwuđǝn̄iṯi Rəmwa alo təŋ, orn lënəŋulu lerṯe ləđin̄əđəṯa eŋen.
Nṯia Rəmwa ndrənaice ŋələŋe ŋen ŋubwa na rënəŋu ndrəŋgiṯi leđa ildi ləɽo ëmcu egen ṯa aləməndađe. Orn eŋələŋe ŋəleđa Ləsuriya, igi gerṯo ŋabəɽa na gero ŋəbaiyano, nəŋəmandəđe ŋələŋe ŋ-Israyil. Na Leđa lə-Siriya ləɽin̄e leđa lwain̄a eŋələŋe ŋ-Israyil, ldarəpe laŋge ildi lwain̄a iliyano pređ, na lënəŋulu lwuɽi alo yoɽra irnuŋ gakəl .
Leđa lə-Siriya ɽərreiđi leđa pređ ildi ləɽo ŋoɽwa, na ildi ləɽo nələŋ na leđa ildi lerṯo đələŋeṯa na ldələmamaṯe alo Yi-Siriya. Orn leđa ildi ləɽo ŋabəyiaŋəno ildi lero ləɽin̄ənia ləṯëđəni eŋələŋe ŋalo Y-Israyil.
Nṯia leđa Lǝsiriya ldəmame leđa ildi lajəbaṯo ṯa aləfeṯe irnuŋ igi ŋələŋe ŋ-Israyil ŋəfo ŋəfau. Leđa ildi lajəbaṯo ləbəjeđe irənuŋ igi gəfo gǝgro na ləmame liji lisrayil ildi lafo ləṯađənu alo. Orn đələŋe đi-Israyil iđi đəmaməđo leđala lajəbaṯo nəđanəjini ṯa leđa lə-Samariya.
Leđa ləŋələŋe ŋal yawuḏ ldəseici ŋen ŋubwa iŋi leđa ləŋələŋe ŋi-Israyil ləneinu ŋen lero ləbëndia ŋen na lənaṯa Rəmwa. Orn məldin ṯalukwuđən̄iṯu imwa alo isi yəpiano, na com imwa yeleđa Ləkanan. Rəmwa ndrəđwaṯe Nəbi ṯa aŋgərin̄aṯe leđa, orn lënəŋulu lerṯe lənna.
Ndə nṯəlia nəbɽo ndređia ređ iliga ildi leđa L-Asiriya ləməndađo ŋələŋe ŋi-Israyil, Rəmwa ndrəđwaṯe Nabukəṯənasr, eləŋ galo yə-Babilon, ṯa aŋëndi ŋələŋe ŋalo Yawuḏiya. Orn Babilon gafo gerṯo ŋabəɽa ŋoɽra kain̄. Eləŋ galo Yawuḏiya naŋaŋənṯi ŋen ṯa aŋəɽeṯe ibai gə-Nabukəṯənasr na ṯa ṯaŋəmabəɽo Algurus ywain̄a inṯəlia pređ.
Orn inṯəlia nətëfr, eləŋ galo Yawuḏiya ŋətođe gəgeicia Babilon eŋen. Nṯia, leđa lə-Babilon ldela na lëndi ŋələŋe ŋalo Yawuḏiya. Lënəŋulu lëndi irnuŋ Gursalim, laməndađe al yəkal, na ldarəpe laŋge pređ ildi lafo inəmuđun nirnuŋ na lal yakəl.
Eləŋ galo Yauwḏiya aŋənaini ŋen ŋubwa eŋen iŋi gətuđu, ṯrui Đənabugəṯənasr nəđəɽin̄e lëmmia əllëɽəŋu ŋuŋ nëin̄ua na ldəmiđi gərəmëṯu. Nṯia đəge,lënəŋulu ləŋgaici eləŋ ṯa aŋəɽe aŋaiyəṯe egarəŋ alo Yəbabilon.
Nabugəđənasir na ṯrui đəlëɽəŋu ldəməme leđa pređ eŋələŋe ŋalo Yawuḏiya alo Yəbabilon, ləṯađe leđa ildi ləɽo ŋəbaiyaŋəno nḏurṯu ṯa aliđi ŋəmëɽria inii. Iliga ildi ŋen leđa ɽ-Rəmwa ləṯərnəđëinu eŋen ṯa alṯađe alo yəđəgasa ŋen yəbërnia alo yəđəmən̄a.
Orn ṯia com ndə Rəmwa rənaico leđa ŋen ŋubwa əllëɽəŋu ŋen ŋanṯa ŋeicia eŋen ndrələđwaṯe eđëñwa, rənëŋu ndrerṯe rəluwajəbainia na đəgasa ŋen đəlëɽəŋu. Rəmwa ṯərërəmoṯo leđa əllëɽəŋu na ṯarəldwaɽiṯu anəbia. Gënəŋu naŋgase ŋen ṯa, ndə nṯəlia nəŋgaṯo ndređia đənəŋ na nəɽijan, lënəŋulu liđi aloɽəbaṯe alo isi Rəmwa rəlwaɽəṯəlau təŋ.
Garno nṯəlia ndređia đenəŋ na nəɽijan, eləŋ gəleđa lalo Yaperisia, naŋəđəme leđa Ləbabilon, nṯia ŋələŋe ŋeleđa Ləparsiyia ldəmaləđaiđe eŋələŋ ŋəleđa Ləbabilon. Leđa Lisrayil lënəcini Alyawuḏ na lënəŋulu lafo lwain̄a eđəməṯia eđen alo Yǝbabilon. Orn leđa ləməṯan lal yawuḏ ildi loɽra inṯəlia ṯaləldəŋəđeinu alo yawuḏiya.
ŋələŋe ŋəleđa Ləpasia ŋafo ŋwonḏəṯo orn ŋerṯo ŋəbaiyano eleđa ildi ləgëndənu eđəbwain̄əđia. Iliga lobəlano ŋen Sirus gaɽo eləŋ galo Yəpasia, gënəŋu ŋənaiđe olia ṯa ndə Alyawuḏ yənəŋ ywonaṯa ṯa yoɽəbaṯa alo yawuḏiya aŋəṯađe alo yəpasia aŋəɽe. Nṯia com gënəŋu ŋəlnaice algurus ṯa alwađe al yəkal təŋ! Nṯia, ndə nṯəlia nəbəɽo ndređia đenəŋ na nəɽijan, leđa lətëfr ildi ləɽo Alyawuḏ loɽəbaṯe irnuŋ Gursalim alo Yawuḏiya.
ŋen leđa ldrəmaṯo alo Yursalim, lënəŋulu lwađe al yakəl təŋ na laɽəđaṯe uṯaga eɽo. Lënəŋulu lafo labərlda ŋələŋeŋa ŋəleđa lomən, na com lënəŋulu ləfeṯe alo isi Rəmwa rəɽəṯǝlo na ṯələbuŋṯu Rəmwa egal yakəl.
Đumëđənia eg-ađam: 2 Gənələŋ 17;24-25;2 Lawain 36;Esra 1-10; Nemaiya 1-13