8. ŋen Rǝmwa rëbri Yusif na leđa leɽa gəllëɽəŋu.
Ndə nṯǝliaŋ nǝŋgaṯo nwain̄a, Yagub gafo gaɽo eđa goɽra, gënǝŋu naŋǝđwaṯe iđia gəllëɽəŋu igi gubwamaiya, Yuisf, ṯa aŋǝɽe aŋǝfəldaija lorǝba ildi lǝnwana đwala.
Lorǝba lǝ-Yusif lafo lageiyama ŋen ŋanṯa eṯen gubwamaiya kain̄ na Yusif gǝlwaɽǝnṯu iŋuriđ ṯa giđi aŋǝɽeṯe elǝŋ. ŋen Yuisf geṯo lorəba nano əllëɽəŋu, ldǝmalǝbje na ldǝmaṯwe eleđa ildi ləbərldiđia lǝbai.
ŋen lorəba lə-Yuisf ləmulu loɽəbaṯa egeɽa, lënəŋulu ldəgere erenia gə-Yusif ldënci iŋəfən ŋərlɽdo. Nṯia ləŋaici eṯen erenia ṯa aŋəseiđi eŋen ṯa đwala đeđən̄ua đaɽin̄o Yusif. Yagub gafo gaicǝno kain̄.
Wasen geləŋ gǝlëɽǝŋu nəŋirnḏeici Yusif ṯa aldəgəndre, orn Yusif naŋəneđe gǝbǝđia ŋen ŋeicia ŋəgeiya Rəmwa ŋen ŋarno ṯia. Wasen geləŋ naŋeicǝṯano naŋənaice Yusif ŋen ŋəpiano ṯa aŋëndəni na aŋənjini egarra. ŋen gəfo egarra, Yusif nəŋonḏǝcini đwonaṯađa đə-Rəmwa, na Rəmwa ndrəməbuŋṯi.
ŋen nṯəlia nəŋgaṯo nǝɽijan,Yusif gafo garəmađaṯo ṯia egarra, na gafo gero ŋen ŋənəŋ ŋeicia. Na uləŋgi gənəŋ, Fero igi leđa ləmasr ləmaurndəđia ṯa eləŋ, naŋəndre wili gǝɽijan igi gajəbənṯəma kain̄. Eđa gero gənəŋ eleđa lǝmaɽwaɽiṯia ṯa laɽǝwađaṯia lamǝlwaɽǝṯia ŋen ŋəwili.
Rəmwa ndranaice Yusif ŋabəɽa ṯa aŋokoɽəbaice ŋen ŋəwili, oro Fero naŋǝma Yusif egarra na Yusif naŋəmukuɽəbiṯi ŋen ŋəwili nǝŋaṯa , Rəmwa riđi arəđwaṯa đowanḏa đǝŋǝra inṯəlia đenəŋ nǝmǝn̄e nǝɽijan,naṯia ŋərwaṯa ŋiđi aŋəfeṯe."
Fero naŋëndi ŋen ŋə-Yusif đwonḏəṯađa nəŋǝmëɽi ṯa aŋəɽeṯe eđa gǝɽaco orəba gǝɽijan eleđa lalo yi-Masr ildi lwain̄a ŋabǝɽa kain̄!
Yusif nəŋəlwaɽəṯi leđa ṯa alɽrəmwoṯe ŋwana ŋwain̄a inṯəliaŋ đenəŋ nǝɽijan iliga ləđwanḏa đəŋəra. Nṯia Yusif naŋəṯwaice leđa ŋwana inṯəliaŋ đenəŋ nǝɽijan iliga ləŋorwaṯa ṯa alerṯe ŋwana wain̄a ləlǝsa.
ŋorwaṯa ŋafo ŋëndu alo ŋǝđǝcwara kain̄ gerṯa alo yi-Masr pipi, orn alo yə-Kanan com igi Yagub gəfu leđala leɽa gəlëɽəŋu.
Nṯia Yagub naŋəđwaṯe liđia əllëɽəŋu loɽra alo yə-Masr ṯa alirldiđa ŋəsa. lorəba lə-Yusif lafo lero ləmaləŋeṯa, ŋen lënǝŋulu ləđrulda ṯa alirldiđi ŋəsa. Orn Yusif gafo galəŋeṯəlo.
ŋen ginḏeicu lorəba əllëɽəŋu ṯa gaɽe lamǝlađo eŋen eŋen,Yusif naŋəlaiṯi ṯa "egaɽo oralo,Yusif! ñerṯe ñagəđaiñialo. ñaginḏaicu ŋen ṯa ñiđi ŋen ŋeicia ŋen ñiagǝṯweñe garno ibai, Orn Rəmwa riđu ŋen eŋalo ŋeicia ṯa aŋəɽeṯe ŋen ŋǝŋəra! elar na ñafeṯe alo yə-Masr igiđi endǝnaice na leđa legeɽa egalo."
Orn ndə lorəba lə-Yusif loɽəbaṯo eɽa na lënǝŋulu ləlwaɽəṯi eṯen ṯa, Yagub, Yusif gëtu gamṯo məldin, na gënəŋu gafo gaŋəra nano kain̄.
ŋen ŋarno Yagub gafo gaɽo eđa goɽra, gënǝŋu naŋəɽe alo yi-Masr leđala leɽa gəlëɽəŋu pređ, na lënǝŋulu pređ ldəfeṯe tu. ŋen Yagub gəmulu gəbaiya, gënǝŋu nəŋəbuŋṯi ləđia əllëɽəŋu ɽrorra pređ.
Ɖərreiđia eŋen iđi đaɽo đəkasa ŋen iŋi Rəmwa rǝnaico Ibrayim naŋəɽe Isag nano, com Yagub nano, orn n̄ere nano đǝge in̄i n̄əɽo ređ na n̄əɽijan in̄i n̄i-Yagub na leđa nano leneɽa enen. Ɖələŋe iđi nađǝɽeṯe đǝlǝŋe đ-Israyil đəɽo ređ na đəɽijan.
Đumëđinia egađam:gə-Đǝtwođalo 37-50