48. Yesu gaɽo Almasiya igi ŋen ŋəfo ŋəlwaɽənu iŋu
ŋen Rəmwa riđu alo, laŋge pređ lafo laŋǝra.ŋen ŋeicia ŋafo ŋero. Ađǝm na Awa lafo labwuđiya, na lënəŋulu lafo lǝbwa Rəmwara com. Đwuma đafo đero kwai kwai walla ŋəɽaiñ. Fəŋen iŋi Rəmwa rǝfo rwonaṯa alo ṯa aiyofeṯe.
Orn seṯan naiyəɽwaɽaṯe irəmwa reicia alo igrii ŋen ŋanṯa ayəgibṯi Awa alo.Orn lënəŋulu ntəm Ađəmga lafo liđu ŋen ŋeicia ŋgeiya Rəmwa.ŋenŋanṯa lënəŋulu lafo liđu ŋen ŋeicia,naṯia leđa pređ lalo ṯalwukumu na ṯalaiyo
ŋenŋanṯa Ađəm na Awa liđu ŋen ŋeicia,naṯia mǝldin ŋen ŋeicia ŋwaiña naŋǝlɽruđaiđi.Lënəŋulu lǝɽeṯe amëcu gǝ-Rəmwa. Garno ŋen ŋiđinu ṯia,leđa pređ liđi ṯaləŋəđo ŋeiciaŋa nano na com ṯa alɽeṯe amëcu gə-Rəmwa.Đǝrreiđia eŋen eđen Rəmwara đafo đəkirnu ŋenŋa ŋeicia.Orn Rəmwa rëɽu ŋen məldin ṯa aroɽəbaje đərreiđia eŋen eđen.
Orn Rəmwa ndrəkase ŋen ṯa eđa gənəŋ eleđa ləbapanda l-Awa liđ aləpwuɽi Seṯan nda,na Seṯan yiđi ayəmase əlɽwe.ŋen ŋanṯa Seṯan yiđi ayəɽaiñe Aləmasiya,orn Rəmwa riđi arəmaduđi təŋ gəməṯo,naṯia Masiya giđ aŋəđame ŋabɽa ŋə-seṯan bəɽəbəte.Ndə nṯəlia nəbɽo nwaiña đəge,Rəmwa nǝrrǝŋaiđi Yesu ṯa gaɽo Aləmasiya.
ŋen Rəmwa rəməndađo alo pređ ŋawŋa iŋi ŋəređa alo,Rënəŋu ndrənaiđe đəpundri ṯa ađəbri leđa ildi lëndu ŋen ŋəlëɽəŋu,na məldin ŋen ŋafo ŋunainia leđa nano ṯa aləməndëđəni ŋen ŋanṯa ŋeicia eŋen,orn Rəmwa narəneiđe Yesu ṯa aŋəbri leđa pređ ildi lëndu ŋen ŋəlëɽəŋu.
Garno nṯəlia ndređia ređ, Ilkana ṯaliṯu Rǝmwa đəɽəđənia mǝldin eŋen ŋǝleđa ṯa aŋaŋeiđi đakəme iđi lënəŋulu ləfo lwonaṯa iŋeicia eŋen. Orn đǝɽəđǝnia iđi đǝber điđi ađəŋgeici ŋen ŋeicia. Yesu gaɽo eđa goɽra eŋen ŋaləkanun,gënəŋu ganaiđo đǝɽəđənia ŋu bɽǝn ŋen ŋanṯa aŋgeici ŋen pređ ŋəleđa lalo. Yesu gafo gaɽo irrəŋaiđi gəŋəra ŋen ŋanṯa gënəŋu gamo ŋen ŋeicia pređ iŋi leđa ləfo liđu.
Rəmwa ndreiṯi Ibrayim ṯa,"Leđa pređ lalo liđi aləbuŋənṯi ŋen ŋanṯa ŋa."Yesu gafo gaɽo đələŋe đəleđa l-Ibrayim. Leđa pređ lalo labuŋənṯu iŋu, lënəŋulu pređ ildi lëndu ŋen ŋə-Rəmwa liđ alëbərni i-ŋeicia eŋen, na lënəŋulu lǝɽeṯe usila gəliđia l-Ibrayim.
ŋen Rəmwa rəlwaɽəṯu Ibrayim ṯa aŋənaiđe iđia gëləɽəŋu, Isag, iđəɽəđənia, Rəmwa ndrənaiđe lɽruma lëđəɽəđənia ṯa aŋəraṯe eŋen ŋiđia gëləɽəŋu, Isag. ŋen ŋarəjiađaṯo ṯa lǝntr pređ alaiyr eŋen ŋeicia iŋëndr! Orn Rəmwa drǝnajđe Yesu, igi gəɽo lɽruma ɽ-Rəmwa ŋen ŋanṯa aŋiđi đəɽəđənia na ṯa aŋaiye eŋen iŋëndr.
ŋen Rəmwa rəđwaṯo ŋəɽaiñ ŋəđəpɽwa ŋǝnḏurṯu alo Yəmasir, Rënəŋu ndreiṯi leđa Lisrayil ṯa aləɽiñe lɽruma lero amrta nano na ṯa aləkëɽi ŋǝfǝni isëuwǝr. Ndə Rəmwa rǝseicu ŋǝfǝni,rënəŋu arṯađaṯe eɽa gakəl na raber riđ arəɽiñe ñere ñǝɽo ŋəɽwa iñi ñərrwa. ŋen iŋi ŋarno ṯia ëmđia gəđəburnia nano.
Yesu gaɽo ɽruma lëmuđia gəđəburnia nano igëndr. Gënəŋu gafo gəđurwaṯo eŋen na gero ŋen nano ŋeicia na gënəŋu naŋəɽiñini iliga ildi lëməđia gəđəŋəra nano gǝđǝburnia nano.Ndə eđa gənəŋ gëndu ŋen ŋi-Yesu, ŋəfǝni ŋëlǝɽǝŋu ŋapəɽəma i-ŋeicia, na đakəme đ-Rəmwa đerəma nano.
Rǝmwa riđu đǝrrëiđia eŋen leđala l-israyil, ildi lǝfo alǝsoŋ. Orn rënǝŋu đǝñiđi riđu đǝrrëiđia eŋen đǝmaijən iđi đǝleđa pređ. ŋen ŋanṯa đǝrrëiđia eŋen iđi đǝmaijǝn, eđa gǝnǝŋ eleđa lǝŋǝɽwa pređ giđ aŋǝɽeṯe aŋǝno yǝleđa ildi lëndu ŋen ŋǝrǝmwa i-Yesu.
Musa gafo gaɽo nëbi yoɽra isi yəɽwato eŋen ŋə-Rəmwa. Orn Yesu gënəŋu gaməñaṯəlo pređ. Gënəŋu gaɽo Rəmwa, ŋen pređ gënǝŋu giđu na gəlɽwato ŋaɽo ŋəmaɽria na ole gə-Rəmwa. Naṯia Yesu gaɽo ole gə-Rəmwa.
Rəmwa ndrəgase ŋen elǝŋ Ḏauḏga ṯa eđa gǝnǝŋ eđǝlǝŋe đëlǝɽǝŋu giđi aŋirndi ŋələŋe eleđa ɽ-Rəmwa bəɽəbəte. ŋen ŋanṯa Yesu gaɽo iđia gə-Rəmwa na Masiya, gënəŋu igi gafo aləsoŋ eleđa leɽa gə-Ḏauḏ giđi aŋirndi leđa bəɽəbəte.
Ḏauḏ gafo gaɽo eləŋ g-Israyil, orn Yesu gaɽo eləŋ gelo na galo pređ! Gënəŋu giđi aŋoɽəbəđia təŋ na aŋǝkəme ŋələŋe pređ ŋəlëɽəŋu đəṯruwaṯađa eŋen na đëuṯađaralo, bəɽəbəte.
Đumëđənia egađam:Gəđətwođalo 1-3,6,14;Gəđəməñia 12,20;2 Samuel 7; Ibranin 3:1-6,4:14-5:10,7:1-8:13,9:11-10:18;Ruiya 21