45. Isṯəfanus na Filibus

Eđa gafo gənəŋ igi gǝɽo nda ikənisa iđi đǝpənde gibërnia Isṯəfanus. Gënəŋu gafo galəŋeinu na gafo gwunḏəjeinu usilaga gətəɽe na đələŋeṯa ŋen nəsi. Isṯəfanus giđu aŋwara ywain̄a na isi yiŋgiṯia leđa ṯa alëndi ŋen ŋi-Yesu.

Iliga lənəŋ, ŋen Isṯəfanus gafo gǝbërrəŋaiđia ŋen ŋə-yesu, al yawuḏ yəmaṯan isi yero yəbëndia ŋen ŋi-Yesu ldukuɽəbijəđiṯi eŋen Isṯəfanus ŋǝla. Na lënəŋulu ləceiṯiano kaiñ na ləgagəbiṯi leđa alo emajma eŋen ŋisṯəfanus. Lënəŋulu ldaṯa," ñagano fəŋu gaṯa ṯa ŋen ŋə-Musa ŋeicia na ŋen ŋə-Rəmwa ŋeicia!" Nələŋe nǝmajma nëndi Isṯəfanus na ləmaiyeṯe nələŋe nëin̄ua noɽra na nələŋe nəmaṯan nal yawuḏ, alo isi leđa lwain̄a lǝɽwato ŋǝɽəwen eŋen ŋisṯəfanus.

Eləŋ goɽra gəkana naŋeɽəđe Isṯəfanus ṯa," ŋen iŋi pređ ŋaɽo đeṯəm?" Nṯia Isṯəfanus nǝŋǝmuɽǝbiṯi eŋen ŋenŋa iŋi Rəmwa rəfo riđu iliga ildi l-Ibrayim na l-Yesu com, Na fəṯau leđa ɽ-Rəmwa lero lənna ŋen ŋëlǝɽəŋu. Orn gënəŋu naŋaṯa,"Ya leđa ildi leɽeno eŋen na lǝgeiya ŋen ŋusila getəɽe, garno bapanda ildi endalo n̄oman pređ lǝneđo Rəmwa na lǝɽin̄o nabi isi yilëɽǝŋu. Orn n̄ǝŋ n̄agiđu ŋen ŋǝnǝŋ ŋiecia ŋǝmən̄iaṯo ŋen lënəŋulu liđu ! n̄aganǝn̄aŋ n̄agaɽin̄o Almasiya!"

ŋen elkana yǝno ŋen iŋi , yënəŋulu ləceiṯəno ldətërni inënəŋ enen na ṯaɽrəjaico olia pəlelo. Na Ldəmabərldeđeṯe ndëuwər na ldəmaməndaiye ŋwandraŋa ṯa aləmaɽin̄e

ŋen Isṯəfanus gəbaiya, gënəŋu naŋare pəlelo naŋaṯa,"Yesu, aŋənṯu usila gəlëɽən̄i. "Na nəŋwođən̄əṯe ndrina alo na naŋare təŋ pəlelo naŋaṯa," ya eləŋ, ŋerṯe agumëđǝṯa ŋen ŋeicia iŋi lënəŋulu liđu."Nṯia gënəŋu nəŋaiye.

̀Ëđəmwa igi ganṯa sawul ldǝrreiđi ŋen leđala ildi ləɽain̄o Istə̱fanus na ṯalɽrəmoṯwo yar esen ŋen lǝmandaiya Isṯəfanus. Iliga lakəl, leđa lwain̄a lalo Yursalim ildi lananaicia leđa ŋen ŋubwa ildi lëndu ŋen ŋi-Yesu, nṯia lënəŋulu ildi lëndu ŋen ŋi-Yesu ldwobəđaṯe alo yerto. Orn eŋen iŋi pređ, lënəŋulu ldërrǝŋaiđi ŋen ŋi-Yesu alo nano pređ.

Ṯalǝmis i-Yesu isi yǝbërnia Filibus igi gəfo gǝɽo eđa gëndu ŋen alo yursalim iliga ləđənanainia ŋen ŋubwa. Gënəŋu gabǝɽo alo Isameri ekal isi gërrəŋaiđu ŋen ŋi-Yesu na leđa lwain̄a ildi labërnu. Orn iliga lənəŋ, malaiyəka đə-Rəmwa nəđəlwaɽəṯi Filibus ṯa aŋəɽe eđađ iđi đəfo eđən̄wa. ŋen gəbərlda eđađ, gënəŋu naŋənwane maje igi goɽra galo Yiđubiya gabworṯo ṯarəmbil đəlëɽəŋu iđi đemərṯa. Na usila gətəɽe naŋəlwaɽəṯi Filibus ṯa mbu ŋaɽwaɽiṯi maje igi.

ŋen Filibus gəfiđu ṯarəmbil, gënəŋu naŋəne Iđubiya yəbëgria egađam igi gənabi Isaiya gəwërđu. Na maje naŋëgri,"Lënəŋulu lafo liđəma garno đaŋala đëɽənṯu ŋəɽain̄, na garno đaŋala iđi đəbwain̄a ŋəma, gënəŋu naŋerṯe gəlwaɽa ole gənəŋ. Lënəŋulu ləmananaice ŋen ŋəfo mənna na lerṯe ləmanaṯa. Lënəŋulu ləmaɽin̄e."

Filibus naŋeɽəđe Iđubiya ṯa, "aganəŋa agaləŋeṯo ŋen iŋi agəbëgria?" Iđubiya naŋoɽəbaice ole naŋaṯa, "Ndo. Egaber igiđi n̄eləŋeṯe ŋen iŋi illa ndə eđa gənəŋ gan̄əgirṯia ŋenano. Egaŋeɽəđia ṯa ŋela na ŋan̄əɽaŋe eđəɽe. Gaɽe fi Isaiya gəwërđu ŋuŋ bəɽan walla eđa gorto?"

Orn Filibus nəŋgirṯi maje oliano gəɽo Iđubiya ṯa fəŋu Isaiya igi gǝwërđu ŋen ŋi-Yesu. Na Filibus com giđu ŋǝmëɽria ŋađam gətəɽe ŋəɽwate eŋen ŋəmaijən i-Yesu.

ŋen Filibus na maje gəɽo Iđubiya ləbərnda eđađ, lënəŋulu ləɽe alo nano yəŋau. Maje gəɽo Iđubiya naŋaṯa," seiđu! ŋawa ŋëni ëli ŋəmaṯan! Gaɽe igënainia mamuḏiya?" Na gënəŋu naŋəlwaɽəṯi maje gəlandən̄a ṯarəmbil ṯa aŋəđuri.

Nṯia lënǝŋulu ldirəwiṯi eŋau, na Filibus naŋənaice Iđubiya mamuḏiya. Ndə labwoṯo eŋau, orn usila gətǝɽe nəŋabe Filibus alo nëin̄u yerto ṯaŋërrəŋaicu leđa ŋen ŋi-Yesu.

Na maje igi gǝɽo Iđubiya nagabəla egeɽa gəlëɽəŋu, gəŋəra nano ŋen ŋanṯa gënǝŋu galəŋeṯo Yesu.

Đumëđənia egađam: Amal ar rasul 6:8-8:5; 8:26-40