́14. ŋen ŋəđacəbənṯia alo eđən̄wa
Ndə Rəmwa rəlwaɽəṯo leđa lisrayil ṯa rënəŋu ralwonaṯa ṯa alənne ŋen ŋəđernda đəđeṯəm ŋen ŋarno đərreiđia eŋen ŋonto ŋululda,lënəŋulu naləṯađaṯe aiyen yisina. Rəmwa ṯaŋəlirndi alo nano yəđəgas ŋen,isi yəbërnia Kanan. alo is yəbarnia Kanan. Đaba đafo đabərldalo nëiñwəŋ đəmiñia alo yəkanan na ṯaɽəteṯo.
Rəmwa ndrəgase ŋen Ibraiym, Isag na Yagob ŋen ṯa riđi arəmanaice alo ṯa đələŋa đëləɽəŋu ađofeṯe, orn leđa lwaiña ŋoɽa alo isi . Lënəŋulu labərenia kananiyen. Kananiyen yaber yəbuŋəṯia na yero yeđəñəđatia rəmwa eŋen. Yënəŋulu yabuŋəṯia imwa yeicia na yabəđia ŋen ŋwaiña ŋeicia.
Rəmwa ndrəlwëɽeṯe leđa lisrayil," ŋgəicur leđa ildi lə-cananiyian alo isi igẽnəjənda. Ñerṯe ñagəbëđialda đawuətaralo na eđa aŋerṯe gəmađia iŋulu gənəŋ. ŋen ŋarəjađəṯo ta ñagere imwa yeicia esën pređ.Ndə ñagəber ñəgəna ŋen ŋələɽiñi, ñagiđi ñabuŋəṯe imwa yeicia orn gerṯa ñi."
̇ŋen leđa lisrayil lerəmaṯo nṯəɽiŋ đəkanan, Musa nəŋwoṯe ləmmia ređ nələɽijan, eleđa lonto lonto iswuər yəleđa pređ lisraiyil. na nəŋələnaice ŋen ṯa aɽe alənwana alo gaɽe yaɽo ṯau. Labɽo com ṯa alənwane gaɽe leđa ləkanan lwonḏoṯo walla lopano .
ləmmia ildi leɽ ređ nəlɽijan lerldo alo yəkanan ndređia marldwan na loɽəbëđia. lënəŋulu ldaṯi leđa ṯa," alo yaɽo alo yələŋa kaiñ na laŋge pređ lobəđa alo!" Orn leđa ildi ləɽo ređ nəlaṯa," irnuŋ gonṯəṯo na leđa loɽa aŋəno! ndə đəbəwañiđia đəfo liđ aləndəbëlađar na aləndəɽəñar!"
Na taltal Galeb na Jasua, leđa lëɽəjan leŋamɽa, ldaṯa," ŋen ŋafo đəṯam leđa ləkanan lwala na lonṯəṯo, orn ləgiđir aldəđamər , ŋen ŋanṯa Rəmwa riđi arndəbəđeiđr!"
Orn leđa lerṯe lənaṯa Galeb na Jasua . Nəṯia lënəŋulu ldiceiṯi Musa na Aron ano na laṯa," ŋen ŋənṯau iŋi n̄agəmamiṯənde alo isi yeica? ŋen ŋafo ŋarəjađəṯo ṯa n̄aɽəŋe alo yi-Masr ŋəmən̄iaṯo ŋen ṯa n̄aiyeṯe eđəpwən̄iđia na ləwasan̄anda na n̄ere n̄agiđənu n̄agəɽo lëbai."Na leđa ṯalwonaṯo ṯa alwoṯe eđa gərto gəɽənda təŋ ŋenŋanṯa aŋəloɽəbaice alo yi-masr.
Rəmwa rafo reicəno na naŋeṯa alo iŋutu iŋi ŋəđərərreiđia.Rəmwa ndraṯa, ŋen ŋanṯa agatwođo agəgiyein̄e," ŋen ŋiđi aŋəjəbənṯi leđa pređ alo isi eđëin̄wa .Orn gerṯa Jasua na Galeb, na leđa pređ ildi lerṯo nəṯəlaŋ eređia gəɽijan na loɽra liđi alaiyeṯe tu na laber liđi alënṯi eləbate ildi ləđəkasa ŋen."
ŋen leđa ləno ŋen iŋi,lënəŋulu loɽəbaṯe aŋəno nano kain̄ ŋen ŋanṯa liđu ŋen ŋeicia. Na lënəŋulu ldabe laŋge ləđəpwain̄əđa na ləɽe ṯa aləpwain̄iđe leđala lalo yəkanan. Musa naŋəleiṯi ṯa alerəṯe lapəla ŋen ŋanṯa Rəmwa rero rəfialda, orn lënəŋulu lderṯe lənna ŋen ŋəlëɽəŋu
Na Rəmwa ndrerəṯe rabəla ŋululda eđəpwain̄əđia, naṯia lënəŋulu ləđaməni na ldaiye lwain̄a iŋulu. Nṯia leđa lisrayil loɽəbaṯe alo yəkanan na lerəlde eđən̄wəŋ nṯəla ndređia marldwan.
Inṯəla ndređia marldwan ŋen leđa lisrayil ləfo eđëin̄wa iđiruwano eđen, Rəmwa narəlnaice.Rënəŋu naŋəlnaice aicəba geṯo elo, gəbërnia," manna" na ndrəlnaice n̄əwara com lən̄əwara ( in̄i n̄əɽəwaṯo aŋəno) ekəl iligano isi lënəŋulu ləfau ṯa alerəṯe eđe aləse. Iŋiga ŋakəl pređ, Rəmwa ndrərəmwoṯe ndrenia enen na nḏəbina ṯa anerəṯe nəgria.
Rəmwa ndrəlnaice ŋawa ŋenŋa ŋəɽo aŋwar elwandr. Orn eŋen pređ iŋi, leđa Lisrayil ṯalumëđənu na ṯaɽwaɽaiđo eŋen ŋgeiya Rəmwa na Musa.Nṯia,Rəmwa rafo rerṯo đwonaṯa məldin eŋen iŋi rënəŋu rəfo rəgaso eŋen ŋ-Ibrayim,Isag,na Yagub.
Na iliga lomən təŋ ŋen leđa lero ŋawa, Rəmwa ndrəlwaɽəṯi Musa, "lwaɽəṯu lwandra, na liđi aŋəmən̄ia ŋawa ano." Orn Musa nəŋreṯe gəđin̄əđəṯa Rəmwa eŋen leđa nëin̄uaŋ pređ naŋəpuɽi lwandra n̄oman n̄əɽijan lafərala gabənṯa ṯa gëlwəɽəṯia. ŋawa nəŋəmən̄a elwandr ṯa leđa pređ ëlṯi, orn Rəmwa ndreicəṯi Musa ano na ndraṯa, "agaber agiđi ŋënṯi alo isi yəđəkasa ŋen.
ŋen leđa lisrayil lerldo eđəin̄wa nṯəlaŋ ndređia marldwan, lënəŋulu pređ ildi ləfo ləbəđia ŋen ŋgeiya Rəmwa ldaiye. Nṯia Rəmwa ndrəpurkađaici leđa đəɽe nano iđi rënəŋu rəkaso ŋen iŋulu ṯa alofeṯe. Na Musa gafo goɽra kain̄, na Rəmwa ndrwoṯe Jasua ṯa aŋəmamađaṯe ṯa aŋirldi leđa. Rəmwa com ndrəlwaɽəṯi Musa ṯa iliga lənəŋ, riđi arəđwaṯe Nəbi yomən yarno ŋu.
Na Rəmwa ndreiṯi Musa ṯa aŋəpoṯe naiyen eđəpe ṯa aŋənwane alo isi yəfo yəđəkasa ŋen iŋu. Musa naŋənwan alo orn Rəmwa ndrerṯe rəmaŋgiṯia aŋuwënṯi. Orn ṯia Musa nəŋaiye na leđa lisrayil ldəmiṯi đwana n̄oman ndređia niɽijin. Orn Jasua nəŋəɽeṯe eđa gəmaijən gəɽənda tǝŋ . Jasua gafo gaɽo eləŋ gəŋəra gənainia eŋen na gənaṯa Rəmwa.
Ađam gi-đuməđinia: đəməñia 16:-17