28. ŋen ŋađəmwa igi gerṯo laŋge lwaiña

Loman lənəŋ, eđa gaɽo eləŋ geṯo Yesu nano nəŋëɽəđe," eđa gaŋəra gǝbarəŋëiđia ŋen, igabəđia ṯau ṯa ñerṯe đəmaṯia đəbəɽəbəṯe?" Yesu naŋəmaiṯi ṯa, " ŋen ŋanṯau agëñurəndǝđia eđa gaŋəra? Eđa gani gonto igi gaŋəra, na fəŋu Rəmwa. Orn ndə agonaṯa ṯa ŋerṯe đəmaṯia đəbəɽəbǝte, rəmoṯo al ganun isi Yǝrəmwa."

" Fuŋ ŋen ŋaŋga iŋi igiđi erəmoṯe?" gënəŋu naŋeɽəđe. Yesu naŋəmuɽəbiṯi eŋen naŋaṯa," ŋerṯe agəɽiñiđia. ŋerṯe ageɽəŋa leđala leɽrto. ŋerṯe agəbëđia ŋəɽoma. ŋerṯe ageɽe wen. bwiṯu eṯaləga na ləŋgaloga, na bwiṯu eđaga igi geɽo euwër elaɽəŋa ŋen ŋarno etam gëləɽeŋa."

Orn eđa ŋəmaiṯi ṯa," igarəmoṯo ŋen iŋi pređ ŋen igeɽo umia. ŋen ŋanṯau iŋi ŋebwañǝnia ñiđi ṯa eməṯe bəɽəbəṯe?" Yesu naŋəmasaici na naŋǝmayǝbwiṯi.

Yesu naŋaṯa," ndə agonaṯa ṯa ŋaɽeṯe agëɽəiñiđiđo, mbu na ŋaṯui laŋge pređ ildi agerṯəlo na ŋənanəci leđa gurus ildi laɽo ŋəbaiyaŋəno, na agiđi ŋerṯe laŋge elo lwaiña, orn ŋela ŋañǝtete."

ŋen eđa gaɽo eləŋ ganno ŋen iŋi Yesu gəlwaɽəṯəma, naŋeiciṯano kaiñ, ŋen ŋanṯa gënǝŋu gwaiña laŋge na gaber gwonaṯa ṯa aŋənanace leđa laŋge pređ ildi gerṯəlo. Orn naŋəređe alo na gabǝla.

̵Orn Yesu naŋəlwaɽəṯi leđa ildi laɽo ređ ṯa," ŋen ŋabəɽaŋəno ṯa leđa ildi lerṯo laŋge lwaiña alënṯi eŋələŋ ŋelo! A, ŋen ŋobaŋəno ṯa ndə đëuri đəbenṯia iđəɽi đalibri ŋamiñaṯo ŋen ŋeđa igi gerṯo laŋge lwaiña aŋənəṯi eŋələŋ ŋərəmwa."

Ndə leđa ildi leɽo ređ lano ŋen iŋi, lurwano kaiñ laṯa, ndə ŋen ŋafo ṯia əsëgi gaɽəwađaṯa gëbərnia?"

Yesu naŋəseici leđa ildi laɽo ređ na naŋaṯa," eŋen ŋəleđa ŋen ŋabəɽaŋəno, orn eŋen ŋərəmwa, laŋge pređ laɽwađəṯia."

Butrus naŋaṯi Yesu ṯa," ñagaŋgiṯu laŋge pređ na nəñaŋəɽateṯe. Wande igi giđi aŋəɽeṯe đəbəɽa eđaiñ?"

Yesu naŋǝmuɽəbiṯi eŋen ṯa, " leđa pređ ildi laṯađo neɽa, lorba, papanda, laŋgen, ñere, walla laŋge ləlëɽəŋu ŋen ŋanṯa ñi, giđi aŋənaini ndređa ređ na giđi aŋənaini đəmaṯia đəbəɽəbəṯe. Orn leđa lwaiña lǝndurṯu liđ alɽeṯe ləneiñwa na lǝnǝñwa liđ aɽeṯe lǝndurṯu."

Đumëđənia ig-ađam: Maṯṯa 19:16-30; Margus 10:17-31; Luka 18:18-30