30. ŋen Yesu gəsi leđa ndređia eređia ređ.
Yesu nəŋəđwaṯe leđa lǝɽëŋu ildi ləđweinu ṯa alërəŋaicəđi irəŋ Gərəmwa na alərëŋaice leđa lwaiña irnuŋ ɽetəɽeteo. ŋen loɽəbaṯo Yesu nano, na ldəmalwaɽəṯi ŋen iŋi lənëŋulu liđu. Na Yesu nəŋələme ldabəṯe alo yəneŋ yero ŋəɽëlia ano ṯa aluëməñiniano iliga lətəfr. Nṯia lënṯi iđəpundr na ləwëɽəđaṯi nëṯənḏaŋ gəđəbrlda.
Orn leđa lafo lwaiña ildi lesaicu Yesu na ṯalǝmis lefəlda iđəpundr. Na leđa ildi ṯaləldaləño đəbarlda nano ŋen ŋanṯa aləbrugwađaṯe nəñwa. ŋen Yesu na ṯalǝmis ldrëmaṯo, ldǝfiđeṯe leđa lwaiña ŋoɽa kaiñ ildi lerəmaṯo, leləṯaṯurəṯia.
Leđa lafo lwaiña leməñaṯo ndređia eređia ređ ildi loɽorra, lerṯe lumaṯa leđa ɽrlda na ñere com. Orn Yesu gafo gerṯo ŋəpaino eleđa. I-Yesu, leđa lafo larno yaŋala isi yero ummia nano. Nṯia nəŋəlarəŋaice na neŋəiđi leđa lefo eŋulu lwuma.
Na erregano eloman, ṯalǝmis nayaṯi Yesu ṯa," erregano gaɽo na irnuŋ gero gefo ṯwaiñ. Đwaṯo leđa alɽe ṯa alpwañe laŋge ləmǝn ṯa aldəse.
Na Yesu nəŋuɽəbiṯi ṯalǝmis eŋen ṯa," ñaganəñaŋ naicərldo laŋge ləmǝn ṯa aldəse!" lënǝŋulu ləmuɽəbiṯi eŋen ṯa,"ñagiđ ñiđi ṯia ṯau? ñagerṯo ragif đenəŋ na ləmme lǝɽijan ikərəŋ."
Na Yesu nəŋəlwaɽəṯi ṯalǝmis əllëɽǝŋu ṯa ayǝlwaɽəṯi leđa ṯa alɽaŋe alo eŋaña, eŋəɽo eređia đenəŋ.
Na Yesu nəŋape ragif đenəŋ na lǝmme lǝɽijan, nəŋənwanəđe elo, na nǝŋerṯi Rəmwa nano ŋanṯa aicəba.
Nṯia Yesu nəŋgere ragif na lǝmme ano ɽrasi. Gënǝŋu nəŋənaice ṯalǝmis ṯa ayelnanaice leđa. Nṯia ṯalǝmis talənanaico leđa aicəba, na aicəba nəŋerṯe gəməndađa! Leđa pređ laso na ldəbeṯe.
Nṯia đəge, Ṯalǝmis nirarreiđi ŋəsa iŋi ŋero ŋəsnia na ŋafo ŋwaiña ṯa aŋunḏəjaice ŋuməra ređ nǝŋǝmǝñe ŋǝɽijan! ŋəsa pređ ŋeṯo iragif đenəŋ na ləmme ləɽijan.
Đumëđənia ig-ñjil: Maṯṯa 14:13-21; Margus 6:31-44; Luka 9:10-17; Yuanna 6:5-15