23. ŋen ŋəđələŋənia đə-Yesu.
Mariam gafo gaməđaiđənu emaje gəđurwaṯo eŋen gəbërnia Yusif. ŋen gënəŋu gəno ṯa Mariam gwonḏaico, gënəŋu naŋələŋeṯe ŋen ṯa gerṯa ŋere ŋəllëɽəŋu. Gënəŋu gafo gaber gwonaṯa ṯa Mariam gǝlǝŋini ṯa giđu mǝnna, nṯia gënəŋu naŋəɽi ŋen ṯa gamaneđa ŋamǝɽa. Iliga ŋen gënəŋu gəmulu gəbəđia ṯia, mǝlaiyəka nḏəmeṯa nano iŋuriđ.
Na Məlaiyəka nəŋaṯa,"Yusif, ŋerṯe agiđǝn̄alo ṯa agəma Mariam wasalo gəlëɽəŋa. ŋere iŋi ŋəfo iŋuŋ ŋaɽo Usila gəteɽe. Gënəŋu giđi aŋələŋe ŋere ŋaɽorra. Na ŋamënəci Yesu (ŋen ŋënənu ṯia, 'Yahweh gaɽo đëbəria'), ŋen ŋanṯa gënəŋu giđi aŋëbəri leđa eŋen eŋen ŋeicia."
Nṯia Yusif naŋəme Mariam na naŋəmaiṯe egeɽa garno wasen gəlëɽəŋu, orn gënəŋu naŋerṯe gəmaindra iliga gamǝlu galəŋa.
ŋen liga lǝfo ṯwain̄ ildi ləđələŋa đə-Mariam, eləŋ gə-Roma naŋəlwaɽəṯi leđa pređ ṯa alwërđəni irnuŋ igi gəleđa elden ləpənde ləfo. Yusif na Mariam lədwođe irnuŋ gə-Nasəraṯ na labəṯa alo yi-Beṯlam ŋen ŋanṯa lënǝŋulu laleđa lǝ-Ḏawuḏ igi gəfo irənuŋ galo yi-Beṯlam.
ŋen ɽrəmaṯo alo yi-Beṯlam, lënəŋulu lerṯe lafiđia alo ṯa aluwɽaŋe. Alo isei lëfiđu fəŋu alo isi đwala đwəɽaŋa. ŋere naŋələŋeini tu na laŋgen gəlëɽəŋu nəŋəməndeici ŋere ŋəlëɽəŋu nəŋəndri alo isi đwala đosaṯa, ŋen ŋanṯa lënəŋulu lero ləbərṯa alo lǝwandra. Lënəŋulu ldəmënəci Yesu.
Uləŋgi gakəl, leđa lafo eđən̄wa ɽrəmoṯa yaŋala . Na taltal, malaiyəka đəwađalo nḏələmən̄iṯi alo, na lënəŋulu ldiđǝn̄iṯialo kain̄. Na Malaiyəka nḏəleiṯi ṯa," n̄erṯe n̄agiđin̄alo, ŋen ŋanṯa egerṯo ŋen ŋəmaijən ŋəđəŋəra nano eđalo. al masiya, gaɽ eləŋ, galəŋənṯənde alo yi-Beṯlam!"
Mbǝr n̄apwain̄e ŋere, na n̄agiđi n̄afiđi ŋəməndeinu ereniaga nəŋəndrini alo yəđwala." Na taltal,elo naŋunṯəjeini malaiyəkaya yənanaice Rəmwa đamia, ldaṯa," Rəmwa arnaneini ŋaɽrwa elo na đëuṯaralo ađəfeṯe alo eleđa ildi rënəŋu rəŋërṯəlo nano!"
Na leđa ildi ləsi yaŋala ldeṯa alo isi Yesu gəfau na ləmafiđi alo isi đwala đosaṯa, ŋen ŋarno Mǝlaiyəka đəfo đəlwaɽəṯəlo. Na lënəŋulu lafo laŋəra nano kain̄. Leđa ildi ləsi yaŋala loɽəbaṯe alo isi yaŋala yəfau na lənanaice Rəmwa đamia eŋen pređ iŋi lënəŋulu ləno na ləseicu.
Iliga lǝtëfr, leđa ildi lələŋeṯo ŋen nisi lalo yənəŋ nwaldaŋ ndele ldəseici đopa đerto elorəp elo. Lënəŋulu lələŋeṯe ŋen ṯa eləŋ gəmaijən gal Yauwḏ galəŋəno. Nṯia ldernde egal yəwalano ŋen ŋanṯa alənwane eləŋ. Na ldeṯe irnuŋ gə-Beṯlam na ləfiđi eɽa igi Yesu na eṯenanda ləfau.
ŋen leđa ildi lələŋeṯo ŋen nəsi ləseicu ŋere ləŋgenəga, lënəŋulu ldəraṯe ndrialo na lamukwuđin̄ǝṯialo. Na ldənanaice Yesu đənaica đwain̄a iliano kain̄. Nṯia lënəŋulu ldoɽəbaṯe eneɽa enen.
Đumëiđənia ig-ađam igi : Maṯṯa 1; 1 Luka 2