11. Aicəba gəđaburniya nano

Rəmwa ndrəbəɽe Fero nano ṯa ndə gero gəŋgiṯia leđa l-Israyil ṯa aləmən̄e, Rënǝŋu riđi arəɽin̄e n̄ere pređ n̄ərrwa in̄i n̄əɽo ŋəɽwa n̄əleđa li-Masr na đwala. ŋen Fero gənno ŋen iŋi gënǝŋu naŋerṯe gǝbëndia ŋen ṯa aŋənaṯe Rəmwa.

Rǝmwa ndrənaiyəđe ŋen ṯa arëbǝri n̄ere pređ in̄i n̄əɽo ŋəɽwa eleđa ildi lëndu ŋen ŋəlëɽəŋu. Leđa lǝneɽa pređ liđi alǝɽin̄e n̄ruma n̄ero amərtǝđia nano.

Rəmwa ndrəlwaɽəṯi leđa l-Israyil ṯa alǝfǝrijǝđi ŋəfəniŋa ŋən̄ruma inëuwǝr pređ yəneɽia enen, na ṯa aluɽi eđe na aləse taltal, aicəbaga igi giđənu gero uḏəɽiano. Na rënǝŋu naŋəlaiṯi ṯa alṯuɽǝđaini ŋenŋanṯa liđi alṯađe alo yi-Masr ndə lënǝŋulu ləso.

Leđa l-Israyil liđu ŋen pređ ŋen ŋarno Rəmwa rəlwaɽəṯəlo ṯa aliđi. Uləŋgiano gakəl, Rəmwa narəmən̄iađaṯe leđa nano li-Masr ṯarəɽin̄o n̄ere pređ n̄ərrwa in̄i n̄əɽo ŋəɽwa.

Neɽia pređ nəleđa ildi l-Israyil nafo nerṯo ŋəfəni nano inëuwǝr enen, nṯia Rǝmwa ndrəṯađaṯe neɽia enen. Leđa pređ ildi ləfo eneɽa lëbǝrni. Lënǝŋulu lafo lëbərnu ŋen ŋanṯa ŋəfəni ŋən̄ruma.

Orn leđa lə-Masr lerṯe ləbǝŋënṯia ŋen ŋə-Rǝmwa walla ṯa lađən̄ëđëṯa eŋen iŋi rënǝŋu rəlwaɽəṯəlo. Orn Rǝmwa ndrerṯe rəṯađaṯa neɽia enen. Rǝmwa ndrəɽin̄e n̄ere pređ n̄ərrwa in̄i n̄əɽo ŋǝɽwa eleđa li-Masr.

N̄ere pređ n̄ərrwa in̄i n̄əɽo ŋəɽwa eleđa li-Masr laiye, ŋere ŋəɽnda naŋaiye ananoŋ ŋəmaje igi gafo gafo egarra, naŋərmaṯe ŋere nano ŋəɽənda ŋə-Fero. Ɖara na đwana nađǝfeṯe eleđa lwain̄a lə-Masr ŋen ŋanṯa đeicǝno eđen.

Uləŋgi gakəl đurri, Fero naŋundəđi Musa na Aron naŋəlaiṯi ṯa, "mǝr leđa l-Israyil na n̄ǝmin̄e alo yi-Masr taltal!" Leđa li-Masr ṯalukuɽǝbijǝđəṯu eŋen leđala Lisrayil ṯa aləmǝn̄e taltal.

Ɖumëđənia egađam: gə-đəmn̄ia 11:1-12:32