19. Leđa ildi lǝɽwata ŋen iŋi ŋiđi aŋela.
Eŋen iŋi ŋǝfo bətaŋəɽan eleđa lisrayil, Rǝmwa rađwaṯo Enabi. Yënǝŋu yafo yano ole igi geṯo i-Rǝmwa nṯia ldërrǝŋeici leđa ole g-Rəmwa
Iliya gafo gaɽo nəbi iliga ŋen Ab gǝɽo eləŋ eŋələŋ ŋəleđa l-Israyil. Ab gafo ŋafo gaɽo eđa geicia igi gamia leđa ṯa alukwuđən̄iṯi rəmwa alo rəŋəɽwen fəŋu Baal. Iliya nəŋeiṯi Ab ṯa, "ŋawa ŋəđənia walla ŋuđi ŋiđi aŋerṯe eŋələŋe ŋəleđa l-Israyil iliga ŋen igiđi n̄elwaɽe ṯia." ŋen iŋi naŋiđi Ab geiciano.
Rǝmwa ndrǝlwaɽəṯi Iliya ṯa aŋǝɽe eđəbarlda ŋen ŋanṯa aŋǝləbǝcənṯi Ab igi gwonaṯa gǝmaɽin̄e. Ilwaldiṯano jaicia ndǝfia ṯanəmarëbǝṯu eđe na ragif. Ab na ṯrui đǝlëɽǝŋu lafo lamaninia. Orn lderṯe lǝmafiđiṯa . ŋawa naŋerṯe ŋəđənia liga lwalano kain̄ nṯia ebarlda niuđano.
Nṯia Iliya nǝŋǝɽe irǝnuŋ gǝleđa lǝɽo ëuwər. Wuji gafo gənəŋ geiyənu na umia gǝllëɽǝŋu irǝnuŋ gakəl ŋəsa ŋafo ŋero ŋenŋanṯa Rǝmwa rafo rero rəđǝnia ŋǝrwaṯa nǝŋëndi alo. Orn lënəŋulu ldrǝmwoṯe Iliya , na Rǝmwa ndrǝlnaice ŋen ŋanṯa ulia egen eŋəmwa na ŋela eŋen aŋerṯe ŋǝməndađia. Lënəŋulu lerṯe ŋəsa iliga pređ ləŋǝrǝwaṯa ŋëndu alo. Iliya naŋəɽaŋe tu nṯəlia nwain̄a .
Ndǝ nṯǝlia nəbəɽo niɽijin na gǝṯǝbëđiano, Rǝmwa ndrǝlwaɽəṯi Iliya ṯa aŋoɽǝbaṯe alo irǝnuŋ g-ŋǝlǝŋe ŋ-Israyil na aŋǝlwaɽəṯi Ab ṯa Rǝmwa riđi arǝđəne tǝŋ. ŋen Ab gǝseicu Iliya nəŋaṯa,"Fǝtu agəfau, ya eđa gǝɽo ađǝna!" Iliya naŋǝmuɽəbeiṯi eŋen nəŋaṯa, "aganəŋa agaɽo eđa gǝkera ŋen! agaṯađo Yawe alo, Rǝmwa irri rǝɽo đeṯəm na ṯǝŋukwuđən̄iṯu Baal alo. Maŋ leđa pređ ləŋǝlǝŋe ŋ-Israyil ŋǝliyeṯa naiyen y-karmel."
Leđa lǝŋǝlǝŋe ŋ-Israyil pređ, na leđa ildi lə-Baal ildi lǝɽo eređa mǝrldwan na ndređia đenǝŋ ŋen ŋanṯa n̄eṯa naiyen ye-karmel. Iliya nǝŋǝlwaɽəṯi leđa ṯa, n̄agarǝkëđia ŋǝṯǝɽa eŋalo ndoŋoɽwa? ndǝ Yawe gǝɽo Rǝmwa, đuɽəđinṯǝmar! Ndǝ Baal gǝɽo Rǝmwa , đuɽəđinṯǝmar!"
Nṯia Iliya nǝŋǝlwaɽəṯi leđa ildi lǝbërrəŋeiđia ŋen iŋi ŋiđi aŋela ildi lǝ-Baal ṯa,"ɽin̄r ŋǝnḏiri na n̄iđi điɽǝđənia, orn n̄erṯe n̄ǝgəurđǝṯia sia. Igënən̄i igiđi n̄iđi ṯia com. Rǝmwa irri roɽəbaico ŋen sia raɽo Rəmwa rə-đeṯəm."Nṯia leđa ləɽo kana lə-Baal lǝṯoɽǝđaṯe điɽǝđənia eđen orn lënəŋulu lderṯe lurǝđiṯa sia .
Nṯia leđa lə-Baal ildi lǝbërrǝŋeiđia ŋen iŋi ŋiđi aŋela ldǝṯurṯi Baal, "naṯǝnde,Baal!" lënəŋulu ldǝṯurṯi rǝmwa eren ađën̄ǝđin̄in na ṯǝldərəjaico ole na ṯǝlǝgǝlnu aŋəno esen bǝɽan ndərldiaŋna, orn đoɽəbacia đero .
ŋen loman lǝɽǝn̄iađaiđo đəge, Iliya naŋǝṯoɽaṯe điɽəđənia đǝ-Rǝmwa. Nṯia nǝŋǝlwaɽəṯi leđa ṯa alɽǝrəjaice ŋawa ŋəmwa ređ na ŋǝɽijan iŋi ŋoɽra ëđuna eđəpe iđiɽǝđənia ŋen nṯia eđe, oṯe na com alo isi ëđuna yəfau naiyəɽeṯe ŋaw đurri.
Nṯia Iliya naŋəbuŋṯi Rəmwa,"Yawe, Rǝmwa irri r-Ibrayim, r-Isag na ri-Yagub nəŋaṯa aŋaicǝnde đən̄iđi ŋen ṯa agaɽo Rǝmwa r-Israyil na ṯa egaɽo ibai gəlaɽəŋa. Uɽəbiṯin̄e ŋen ŋen ŋanṯa leđa aləŋeṯe ŋen ṯa agaɽo Rəmwa rəllëɽən̄i đeṯəm."
Na taltal,sia nayirəwa elambal elo na nayuɽi eđe, oṯe, ŋwandra, na ŋawa iŋi ŋəfo ŋaɽəđaṯo ëđuna eɽo. Ndə leđa ləseicu ŋen iŋi, lënəŋulu ldəmuđən̄iṯi alo ldaṯa,"Yawe gaɽo Rəmwa! Yawe gaɽo Rəmwa!"
Nṯia Iliya nəŋaṯa, n̄erṯe n̄aŋgiṯia eđa gənəŋ eleđa ləŋəɽëuwen ṯa aləmən̄e!" Orn leđa lakëndi nəbi pređ isi yə-Baal na ləɽin̄e.
Na Iliya naŋəlwaɽəṯi eləŋ Ab ṯa,"oɽəbaṯo irənuŋ gəlaɽeŋa taltal,ŋen ŋanṯa ŋawa ŋiđi aŋəđəne."Na taltal lduŋga naŋəđaŋəṯe elo lərəmia, na ŋawa ṯaŋəđəno ŋwain̄a kain̄. ŋen ŋanṯa Yawe gabəɽenḏeṯo ŋen ŋəŋau iŋi ŋəfo ŋero na gënəŋu ŋaŋiđini ŋen ṯa gaɽo Rəmwa irri rəɽo đeṯəm.
Iliga ildi Liliya,Rəmwa ndroṯe eđa gənəŋ gəbërnia Ilisa ṯa aŋəɽeṯe nabi yəlëɽəŋu. Rəmwa riđu aŋwara ywain̄a eŋen ŋi-lisa. Aŋwara yənəŋ isi yiđənṯu Naaman, eđa gənəŋ igi goɽra eleđa lamëcu, igi gerṯo ŋəɽain̄ nano ŋeicia kain̄. Gënəŋu naŋənne ŋen ŋ-Ilisa na naŋeɽəđe Ilisa ṯa aŋəmaiđi. Ilisa naŋeɽəđe Naaman ṯa aŋirəwṯi iŋau ŋoliano n̄oman đenəŋ n̄əɽijan eđəbarlda Đurḏun.
Nṯia Naaman gafo geiciano ananoŋ na gafo gero gwonaṯa ṯa gabəđia ŋen ŋənəŋ ŋen ŋanṯa ŋen iŋi ŋaɽo ŋəɽiṯiani. Orn gënəŋu naŋəmələđi ŋen eŋəṯəɽa ŋəlëɽəŋu na naŋirəwiṯi iŋau ŋoliano n̄oman đenǝŋ na n̄əɽijan eđəbarlda Đurḏun. ŋen gabwoṯo iŋau iliga lənḏurṯu, gënəŋu naŋəfiđiṯi aŋəno yəllëɽəŋu yaiđinu! ŋen ŋanṯa Rəmwa raiđima.
Rəmwa ndrəđwaṯe nabi ywain̄a elorəb. Yënəŋulu naiyəlwaɽəṯi leđa ṯa alerṯe lukwuđən̄iṯia imwalo yəpiano na ṯa alaŋaiđi đəđurwaṯa eŋen na ŋəbaiya eleđa ləmaṯan. Orn nəbi naiyəgərən̄aṯe leđa ṯa ndə lero ləđurwa iđiđia ŋen eŋen ŋeicia na ṯa lađən̄əđəṯa Rəmwa eŋen, nṯia Rəmwa riđi arlakəme eŋen eŋen ŋeicia, na rënəŋu riđi arəlnaice ŋen ŋubwa.
Iŋiga ŋwain̄a, leđa lafo lero ləđin̄əđəṯa Rəmwa eŋen. Lënəŋulu lafo ləbəđia nəbi ŋađəna na iŋiga ŋəmaṯan naləɽin̄e. Iliga lənəŋ nəbi Yirmiya gafo gëɽənu ilbu lonḏoṯo ano na ldəmaṯađe tu ṯa aŋaiye. Na gënəŋu naŋënṯi eŋaico alo ilbu, orn eləŋ naŋerṯe ŋəbaiyano iŋu na naŋəđwaṯe ləbai əllëɽəŋu ṯa aləmabəleđa alo ilbu ŋen gəmulu gəbaiya.
Nabi yafo yaɽwata ŋen ŋə-Rəmwa ŋen ŋarno iliga leđa lələgeiya. Lënəŋulu ldəgərëin̄aṯe leđa ṯa Rəmwa riđi arlakəme ndə lero loɽəbaṯa aŋəno nano. Lënəŋulu ldələŋəđaici leđa eŋen com iŋi Rəmwa rəkaso ṯa Messiya giđi aŋela.
đumëđənia egađam igi :1g-Ndǝlǝŋ 16:18- 2 Ndǝlǝŋ 5; Irmiya 38 .