18. Đarnəđia đəŋələŋe
Ndə nṯəliaŋ nəbəɽo nwain̄ia, Ḏauḏ nəŋaiye, iđia gəlëɽəŋu seleman naŋətođe gəbərndia leđa lisrayil. Rəmwa ndrəlwaɽəṯi seleman na ndrəmeɽǝđe ṯa ŋen ŋawənde iŋi agwonaṯa kain̄ đurri. ŋen seleman geɽəđo đələŋaṯa ŋen nəsi, Rəmwa ndrəmaŋirṯi nano na ndrəmiđi gəɽo eđa gələŋeṯo ŋen nəsi alo nano təmtəm. Seleman naŋələŋeṯe ŋen ŋwain̄a ŋəɽeṯe eđa gələŋeṯo ŋen nəsi eđakəmia. Rəmwa ndrəmiđi gerṯo đwala đwain̄a.
Alo Yursalim, Seleman naŋwađe alyakəl isi eṯen gëləɽəŋu Ḏauḏ gəfo gəɽəṯu ŋen na nəŋərərreiđi laŋge ildi ləŋəmëɽria. Na leđa ṯalukwuđən̄iṯu Rəmwa alo na ṯaliṯu điɽəđənia ekaləyakel gerṯa iləṯu ildi leđərareiđia. Rəmwa ndrela na ndrəfeṯe egal yakəl, na rënəŋu ndrəfeṯe tu leđala əllëɽəŋu.
Nṯia Seleman ṯaŋəbwain̄o wuji gəfo irnuŋ gərto. nəŋerṯe gəđin̄ia Rəmwa eŋen na naŋəme liji lwain̄a, larno ndređia eredia ređ! Liji lwain̄a iŋulu ildi leṯo irnuŋ gərto na leṯo imwaiya esen na ṯələmən̄iađaṯo nëin̄ua iđukwuđən̄iṯialo eđen. ŋen Sileman goɽra inṯəliaŋ, gënəŋu gafo kukwuđən̄iṯia imwa alo esen com.
Rəmwa rafo reiciano eŋen ŋ-Seleman na, ŋen ŋarno rənaicəma ŋen ŋubwa ŋen ŋanṯa gënəŋu gero đwonaṯa, rënəŋu ndrəgase ŋen ṯa riđi arakarnəđe irnuŋano gəɽijan eŋələŋe ŋ-Israyil iliga ləŋəɽain̄ ŋ-Seleman.
ŋen Seleman gaiyo đəge, iđia gəlëɽəŋu, Reboam, nəŋəɽeṯe eləŋ. Reboam gafo gaɽo iɽəṯiano. Leđa pređ lalo yirənuŋ g-Israyil ldela loɽo ṯa aləmiđi garno eləŋ. Lënǝŋulu ldǝlwaɽəṯi Reboam ṯa Seleman giđilo ŋǝmëɽria ŋwain̄a ŋabɽwaŋəno na ṯən̄anaicəđo laŋge lwain̄a lətəmeiciainu.
Reboam nǝŋǝluɽəbiṯi eŋen ŋenəŋa ŋəŋiɽəṯiano naŋaṯa,"N̄əgëɽu ŋen eŋəṯəɽa ṯa papa gǝlëɽəni Seleman giđinde ŋǝmëɽria ŋǝbɽwaŋəno, Orn igiđi indiđi ŋǝmëɽria ŋǝbɽwaŋəno ŋǝmǝn̄iaṯo orǝba ŋen gënəŋu giđu, Na igiđi endǝnanaice ŋen ŋubwa ŋeicia ŋǝmǝn̄iaṯo orǝba ŋen gënuŋu giđu."
đǝlǝŋe ređ eleđa lirǝnuŋ g-Israyil nəđətuđi ŋen ŋegeiya Reboam. Orn đǝlǝŋe nađəṯađəni đǝɽijan igərəŋ iđi đwonaṯa ŋen ŋəlëɽəŋu. Đǝlǝŋe iđi đəɽijan nađǝɽeṯe leđa lǝŋǝlǝŋe ŋalo yawuḏiya .
đəlǝŋe ređ egorəb girǝnuŋ g-Israyil iđi đǝneđo ŋen ŋǝ- Reboam nǝlǝwaṯe maje gǝbërnia Jeroboam ŋen ŋanṯa aŋǝɽǝṯe elǝŋe egen. Lënǝŋulu lwađe ŋǝlǝŋe eŋen nḏəɽe alo ndeliya na lënəŋulu lënəci ŋǝlǝŋe ŋ-Israyil.
Reboam naŋiđi ŋen ŋəgeiya Rǝmwa na ŋiđi leđa ŋen ŋeicia. Gënəŋu naŋwađe ŋǝmborađa ŋǝɽijan ŋəleđa ṯa alukwuđən̄iṯi alo ŋəmǝn̄aṯo ŋen ṯa alukwuđən̄iṯi Rǝmwa alo egalyakəl eŋǝlǝŋe ŋi-yuwḏiya
ŋǝlǝŋe ŋi-Yuwḏiya na ŋalo y-Israyil naŋəɽeṯe ëməcu na ṯaŋəbwain̄əđo bəɽan jaicia jaicia.
Orn eŋələŋ ŋəmaijən ŋəleđa lisrayil, nələŋ pređ nafo nabəđia ŋen ŋeicia. Nələŋe nwain̄a iŋulu ini nafo nəɽin̄inu eleđa lisrayil ildi lwonaṯa ṯa aɽeṯe nələŋ ekal esen.
Nələŋ pređ na leđa ləmaṯan ləŋələŋe ŋ-Israyil lukwuđən̄iṯi ñəmborwađ alo. Laŋge ildi ləlukwuđən̄iṯia alo fəŋulu ŋen iŋi ŋətaŋa ŋwain̄a ŋoɽwa na đənaiđa ŋere iđiɽəđənia.
Nələŋe nalo Yuwḏiya naɽo đələŋe đə-Ḏauḏ. Ləmaṯan iŋulu lafo ləđurwaṯo eŋen ŋəđirldia leđa na iđukwuđən̄iṯia Rəmwa alo. Orn nələŋe nwain̄a nalo Yuwḏiya nafo neicia na nagera ŋen na ṯanukwuđən̄iṯu ŋəmborwađ alo. Nəmaṯan iŋulu ṯaniđu điɽəđənia n̄eren̄a en̄en ismwa isi yəpiano. Eleđa lwain̄a com li-yawuḏiya lətwođe ləgeiya ŋen ŋ-Rəmwa na ṯalukwuđən̄iṯo imwalo emaṯan.
Đumëđənia eg-ađam : 1 G-ənələŋ 1-6; 11-12