Vlach Western Arli: Open Bible Stories

Updated ? hours ago # views See on DCS

1. Ćeriba

Frame 01-01

Ače sar ulo o početko oto sa. O Devel šove divenđe ćerđa o svemir hem sa soi ano leste. Palo adava so o Devel ćerđa i Phuv, i Phuv inele ani tomina hem čuči, hem ništa upro late na inele oblikujime. A o Duho e Devlesoro inele upro pani.

Frame 01-02

Tegani o Devel phenđa: "Nek ovel svetlost!" I ulo svetlost. O Devel dikhlja dai o svetlost šukar i dinđa le anav "dive". Odvojinđa le e tominatar, sava vičinđa "rat". O Devel ćerđa o svetlost ko prvo dive oto ćeriba.

Frame 01-03

Ko dujto dive oto ćeriba, o Devel vaćerindoj ćerđa o nebo upri phuv. Ćerđa o nebo ađahar so odvojinđa o upruno pani e telune panjestar.

Frame 01-04

Ko trito dive, o Devel vaćerindoj odvojinđa o pani e šuke thanestar. O šuko than vičinđa "phuv", a o pani vičinđa "morija". O Devel dikhlja dai adava so ćerđa šukar.

Frame 01-05

Tegani o Devel phenđa: "Tari phuv nek ikljon sa o vrste oto kašta hem oto biljke." I ađahar ulo. O Devel dikhlja dai adava so ćerđa šukar.

Frame 01-06

Ko štarto dive oto ćeriba, o Devel vaćerindoj ćerđa o Kham, o Masek hem o čerenja. O Devel ćerđa len te den svetlost e Phuvjaće hem te označinen o dive hem i rat, o štar sezone ano berš hem o berša. O Devel dikhlja dai sa adava so ćerđa šukar.

Frame 01-07

Ko pandžto dive, o Devel vaćerindoj ćerđa sa so plivini ano pani hem sa e čirikljen. O Devel dikhlja dai sa šukar hem blagoslovinđa len.

Frame 01-08

Ko šofto dive oto ćeriba, o Devel phenđa: "Nek oven oto sa o vrste životinje save džana phuvjaja!" I ulo ađahar sar so phenđa o Devel. Nesave životinje inele domaća, nesave lazinde upri phuv, a nesave inele divlja. I o Devel dikhlja dai sa adava šukar.

Frame 01-09

Tegani o Devel phenđa: "Ana amen te ćera manušen ki amari slika te oven slična amenđe. On ka vladinen e phuvjaja hem sa e životinjencar."

Frame 01-10

I ađahar, o Devel lelja xari phuv, oblikujinđa la ano manuš hem phudinđa životi ano leste. Adale manušesoro anav inele Adam. O Devel sadinđa vrt kote o Adam šaj ine te živini, hem čhivđa le adari te brinini pe zako vrt.

Frame 01-11

Ano maškar e vrtesoro o Devel sadinđa duj posebna kašta—kaš savo dela dživdipe hem kaš savo dela sposobnost te pendžari pe o šukar hem o bišukar. O Devel phenđa e Adamese da šaj te xal bilo save kaštestar ano vrt sem e kaštestar savo dela sposobnost te pendžari pe o šukar hem o bišukar. Te xalja o Adam adale kaštestar, ka merel.

Frame 01-12

Tegani o Devel phenđa: "Nane šukar o manuš te ovel korkoro." Ali nijek životinja našti ine te ovel e Adamesoro pomoćniko.

Frame 01-13

I ađahar, o Devel muklja upro Adam zoralo sojba. Tegani lelja lestar jekh rebro savestar ćerđa đuvlja hem anđa la koro leste.

Frame 01-14

Ked dikhlja la o Adam, phenđa: "Napokon! Akajai sar mande! Nek vičini pe 'Đuvli', adalese soi ćerdi e Muršestar." Adalese o murš ačhaj pe dade hem pe daja hem ovela jekh pe romnjaja.

Frame 01-15

O Devel ćerđa e murše hem e đuvlja ki pli slika. Blagoslovinđa len hem phenđa lenđe: "Te ovel tumen but čhave hem unuci hem te pheren i Phuv." Tegani o Devel dikhlja da sa so ćerđa inele but šukar hem inele but zadovoljno adaleja so ćerđa. Adava sa ulo ko šofto dive oto ćeriba.

Frame 01-16

Ked alo o eftato dive, o Devel završinđa e ćeribnaja. I ađahar, o Devel odmorinđa pe oto sa so ćerđa. Blagoslovinđa o eftato dive hem ćerđa le te ovel sveto, adalese so ko adava dive odmorinđa pe pla bućatar. I ađahar o Devel ćerđa o svemir hem sa soi ano leste.

E biblijakiri paramiz taro 1. lil e Mojsijasoro 1-2