Vlach Western Arli: Open Bible Stories

Updated ? hours ago # views See on DCS

15. I Obećime phuv

Frame 15-01

I alo o vreme o Izraelci te đerdinen ano Hanaan, ani Obećime phuv. O Isus Navin bičhalđa duje muršen te dikhen savi e hanaanesiri diz Jerihon, savi inele zaštitime ađahar so inele okružime zorale duvarencar. Ani adaja diz živinđa jekh prostitutka palo anav Raava, savi garavđa e duje muršen hem kasnije pomožinđa lenđe te našen. Ćerđa adava adalese so verujinđa ano Devel. O duj murša obećinđe da ka zaštitinen e Raava hem lakere porodica ked o Izraelci ka uništinen o Jerihon.

Frame 15-02

O Izraelci valjanđe te nakhen i len Jordan te šaj đerdinen ani Obećime phuv. O Devel phenđa e Isus Navinese: "O sveštenici nek džan prva." Ked o sveštenici čhivđe pumare pre ani len Jordan, o pani ačhilo te thavdel sar te šaj o Izraelci nakhen ki aver strana upri šuki phuv.

Frame 15-03

Ked o manuša nakhle i len Jordan, o Devel sikavđa e Isus Navine sar te napadini i zorali diz Jerihon. O narodo šunđa e Devle. O vojnici hem o sveštenici šov dive phirindoj okolinđe i diz Jerihon jekhvar ko dive, sar so phenđa lenđe o Devel te ćeren.

Frame 15-04

I ko eftato dive, o Izraelci phirindoj okolinđe i diz pana efta puti. Sar ine okolinena i diz zadnjo puti, o vojnici vičinđe, a o sveštenici phudinđe ano trube.

Frame 15-05

Tegani e Jerihonesere duvarija pele! O Izraelci sa uništinđe ani diz sar so phenđa lenđe o Devel. Samo na dirinđe e Raava hem lakere porodica, kola pridružisale e Izraelconenđe. Ked avera nacije save živinđe ano Hanaan šunđe so o Izraelci uništinđe o Jerihon, but darandile da o Izraelci hem olen ka napadinen.

Frame 15-06

O Devel naredinđa e Izraelconenđe te na phanden mir nijekhe narodoja taro Hanaan. Ali jekh narodo taro Hanaan, savo vičinđa pe Giveon, xovavđa e Isus Navine hem phenđa lese da avela taro than savoi dur taro Hanaan. Rodinđe e Isus Navinenstar te phanden mir olencar. O Isus Navin hem o Izraelci na pučle e Devle kotar ale o Giveonci, i o Isus Navin phandlja mir olencar.

Frame 15-07

O Izraelci inele but xoljame kad dodžanđe so o Giveonci xovavđe len, ali ićerđe pe ko adava so phandle mir olencar adalese so adava inele obećanje anglo Devel. Ked nakhlo nesavo vreme, o carija jekhe avere narodosere ano Hanaan, o Amorejci, šunđe so o Giveonci phandle mir e Izraelconencar, i čedinđe pumara vojska ki jekh bari vojska hem napadinđe e Giveonconen. O Giveonci rodinđe pomoć e Isus Navinestar.

Frame 15-08

I ađahar, o Isus Navin čedinđa e izraelesere vojska, i sa i rat phirđe sar te aven koro Giveonci. Sabaleja iznenadinđe e Amorejconen hem napadinđe len.

Frame 15-09

Adava dive o Devel marđa pe zako Izraelci. Zbuninđa e Amorejconen hem bičhalđa bari kukudi savi mudarđa bute Amorejconen.

Frame 15-10

O Devel da ćerđa o kham te terđol sa ko jekh than, sar te ovel e Izraelconen dovoljno vreme te pobedinen e Amorejconen. Adava dive o Devel anđa bari pobeda zako Izraelci.

Frame 15-11

Palo adava so o Devel pobedinđa adala vojska, but avera narodija čedinđe pe te napadinen e Izraelconen. O Isus Navin hem o Izraelci napadinđe len hem pobedinđe len.

Frame 15-12

Palo adava mariba, o Devel dinđa đijekhe izraelskone pleme lesoro kotor oti Obećime phuv. Tegani o Devel dinđa mir e Izraelese ko sa o granice.

Frame 15-13

Ked o Isus Navin inele purano, vičinđa sa e Izraelconen. Podsetinđa len ki lengiri obaveza te oven poslušna zako savez savo o Devel ćerđa e Izraelconencar ko Sinaj. O narodo obećinđa da ka ačhol verno e Devlese hem da ka ićeri lesere naredbe.

E biblijakiri paramiz taro lil e Isus Navinesoro 1-24