Vlach Western Arli: Open Bible Stories

Updated ? hours ago # views See on DCS

46. O Pavle ovela hrišćanin

Frame 46-01

O Savle inele okova terno manuš kova pazinđa o šeja e manušengere kola mudarđe e Stefane. Ov na verujinđa ano Isus, i jurinđa e vernikonen. Džana ine oto čher ko čher ano Jerusalim te dolel e muršen hem e đuvljen hem te frdel len ano phandlipe. O baro svešteniko dinđa dozvola e Savlese te džal ki diz Damask hem adari te dolel e hrišćanen hem te anel len palal ko Jerusalim.

Frame 46-02

Sar o Savle džala ine dromeja ki Damask, o baro svetlo taro nebo zasvetlinđa svugde uzalo leste, ađahar da pelo ki phuv. O Savle šunđa nekas sar vaćeri: "Savle! Savle! Sose jurineja man?" O Savle pučlja: "Ko injan tu, Gospode?" O Isus phenđa lese: "Me injum o Isus. Tu man jurineja!"

Frame 46-03

Ked o Savle uštino, našti ine te dikhel. Lesere amala legarđe le ano Damask. O Savle ništa na xalja ni pilja trin dive.

Frame 46-04

Ano Damask živinđa jekh učeniko kova vičinđa pe Ananija. O Devel phenđa lese: "Dža ko adava čher kaj o Savle. Čhiv te vasta upro leste te šaj palem te dikhel." Ali, o Ananija phenđa: "Gospode, šunđum da akava manuš jurini e vernikonen." O Devel phenđa lese: "Dža! Izaberinđum le te vaćeri mandar e Jevrejenđe hem e manušenđe oto avera nacije. Ov but ka trpini zbog mande."

Frame 46-05

I ađahar o Ananija dželo koro Savle, čhivđa ple vasta upro leste hem phenđa: "O Isus kova mothovđa pe će ko drom nakari bičhalđa man te irini pe to dikhiba hem te ove pherdo e Svetone Duhoja." O Savle odmah šaj ine te dikhel, a o Ananija krstinđa le. Tegani o Savle nešto xalja hem irinđa pe lesoro zoralipe.

Frame 46-06

O Savle odmah lelja te propovedini e Jevrejenđe ano Damask, vaćerindoj: "O Isusi e Devlesoro Čhavo!" O Jevreja inele zadivime adaleja da o manuš kova dikhlja te mudari e vernikonen akana isto verujini ano Isus! O Savle raspravinđa pe e Jevrejencar ađahar so dokažini lenđe ine dai o Isus o Mesija.

Frame 46-07

Palo but dive, o Jevreja ćerđe plan te mudaren e Savle. Bičhalđe e manušen te roden le ko udara e dizjakere te šaj mudaren le. Ali, o Savle šunđa zako lengoro plan, i lesere amala pomožinđe lese te našel. Jekh rat, mukle le prekalo duvari ani bari korpa. Palo adava so o Savle naštino taro Damask, nastavinđa te propovedini e Isusestar.

Frame 46-08

O Savle dželo ano Jerusalim te resel pe e učenikonencar, ali on darandile olestar. Tegani jekh verniko kova vičinđa pe Varnava anđa e Savle anglo apostolja hem phenđa lenđe sar o Savle hrabro propovedinđa ano Damask. Palo adava, o učenici prihvatinđe e Savle.

Frame 46-09

Nesave vernici kola naštine taro juriba savo inele ano Jerusalim, džele dur ani diz Antiohija hem propovedinđe e Isusestar. But manuša ani Antiohija na inele Jevreja, ali, palo prvo puti, but olendar da ule vernici. O Varnava hem o Savle džele adari te sikaven e neve vernikonen više e Isusestar hem osnažinđe i khanđiri. Baš ani Antiohija okola kola verujinena ano Isus inele vičime "hrišćanja".

Frame 46-10

Jekh dive, sar o hrišćanja ani Antiohija postinena ine hem molinena, o Sveto Duho phenđa lenđe: "Čhiven e Varnava hem e Pavle te ćeren okova zako sose vičinđum len." Adalese i khanđiri ani Antiohija molinđa zako Varnava hem zako Savle, o vernici čhivđe pumare vasta upro lende te blagoslovinen len. Bičhalđe len te propovedinen o šukar lafi e Isusestar ko but avera thana. O Varnava hem o Savle sikavena ine e manušen oto razna nacije, hem but đene verujinđe ano Isus.

E biblijakiri paramiz taro Ćeriba e apostolengoro 8,3; 9,1–31; 11,19–26; 13,1–3