Vlach Western Arli: Open Bible Stories

Updated ? hours ago # views See on DCS

49. E Devlesoro Nevo savez

Frame 49-01

O anđeo phenđa e devicaće palo anav Marija da ka bijani e Devlesere Čhave. I ađahar, sar oj pana inele devica, o Sveto Duho hulilo upro late hem oj ačhili khamni. Bijanđa čhave hem dinđa le anav Isus. Adalese, o Isusi hem Devel hem manuš.

Frame 49-02

O Isus ćerđa but čudesija kola mothovena dai ov Devel. Phirđa upro pani, ačhavđa o barvalja, sasljarđa bute namborme manušen, ispudinđa e demonen, vazdinđa e mulen hem ćerđa o pandž mare hem o duj maćhe te oven dovoljno xajbnase zako više oto 5.000 manuša.

Frame 49-03

O Isus inele baro učitelj, a vaćeri ine ano autoritet adalese soi o Čhavo e Devlesoro. Sikaj ine da valjani te mange avere manušen ađahar sar so mangeja korkore tut.

Frame 49-04

Ađahar da, sikaj ine da valjani te mange e Devle više nego so mangeja bilo so aver, više nego sa so isi tut.

Frame 49-05

O Isus phenđa dai o carstvo e Devlesoro po vredno oto bilo so aver ki phuv. Te pripadine e Devlese ko carstvo po bitnoi oto sa aver. Sar te šaj đerdine e Devlese ko carstvo, valjani te ove spasime te grejonendar.

Frame 49-06

O Isus sikaj ine da nesave manuša ka prihvatinen le hem ka oven spasime, a avera na. Phenđa dai nesave manuša sar i šukar phuv. On lena o šukar lafi e Isusestar hem tegani ovena spasime. Avera manušai sar i zorali phuv savi arakhaja ko drom, kote o seme e Devlesere lafestar na đerdini hem na dela ništa zako čediba. Adala manuša na mangena te len o lafi e Isusestar hem na ka đerdinen lese ko carstvo.

Frame 49-07

O Isus sikaj ine da o Devel but mangela e grešnikonen. Ov mangela te oprostini lenđe hem te ćerel len te oven lesere čhave.

Frame 49-08

O Isus isto ađahar phenđa da o Devel mrzini o greh. Ked o Adam hem i Eva grešinđe, adava utičinđa upro sa lengere potomci. Sar posledica adalestar, đijekh manuš ki phuv grešini hem cidimei e Devlestar. Adalese, sare ule e Devlesere neprijatelja.

Frame 49-09

Ali, o Devel edobor but manglja đijekhe manuše ki phuv, da dinđa ple jekhe Čhave da đijekh kova verujini ano Isus na ka ovel kaznime zako ple greja, nego ka živini večno e Devleja.

Frame 49-10

Zbog te greja, tu injan krivo hem zaslužineja te mere. O Devel valjani ine te ovel xoljame upra tute, ali pli xoli čhorđa upro Isus umesto upra tute. Ked o Isus mulo ko krsto, ov lelja ti kazna.

Frame 49-11

O Isus niked na grešinđa, ali odlučinđa te ovel kaznime hem te merel sar savršeno žrtva te legari te greja hem o greja đijekhe manušesere ki phuv. Adalese so o Isus žrtvujinđa korkoro pes, o Devel šaj te oprostini đijekh greh, đi o najphare greja.

Frame 49-12

O šukar delja našti te spasinen tut. Nane ništa so tu šaj te ćere te ovel tut zajedništvo e Devleja. Samo o Isus šaj te kosel te greja. Tu valjani te verujine dai o Isus e Devlesoro Čhavo, da mulo ko krsto umesto tuće hem da o Devel vazdinđa le taro mule.

Frame 49-13

O Devel ka spasini đijekhe kova verujini ano Isus hem kova prihvatini le sar ple Gospodare. Ali, na ka spasini okole kova na verujini ano leste. Nane bitno injan li tu barvalo ili čororo, murš ili đuvli, purano ili terno, ili kaj živineja. O Devel mangela tut hem mangela te verujine ano Isus te šaj ovel le zajedništvo tuja.

Frame 49-14

O Isus vičini tut te verujine ano leste hem te ove krstime. Verujineja li dai o Isus o Mesija, jedino Čhavo e Devlesoro? Verujineja li da injan grešniko hem da zaslužineja te kaznini tut o Devel? Verujineja li da o Isus mulo ko krsto te legari te greja?

Frame 49-15

Te verujinđan ano Isus hem ano okova so ov tuće ćerđa, onda injan hrišćanin. O Devel ikalđa tut taro e Sotonesoro bišukar carstvo savoi sar tomina hem čhivđa tut ano e Devlesoro carstvo savoi sar svetlost. O Devel lelja to purano, grešno dživdipe hem dinđa tut nevo, pravedno dživdipe.

Frame 49-16

Te injan hrišćanin, o Devel oprostinđa te greja zbog adava so o Isus ćerđa. Akana o Devel dikhela tut sar pašutne amale, a na sar neprijatelje.

Frame 49-17

Te injan amal e Devlesoro hem sluga e Gospodesoro e Isusesoro, tu ka mange te ove poslušno okolese so o Isus sikaj. Iako injan hrišćanin, palem ka ove ani kušnja te grešine. Ali o Develi verno hem vaćeri da te priznajinđan te greja, ov ka oprostini će. Ov ka del tut zoralipe te borine tut protiv o greh.

Frame 49-18

O Devel vaćeri će te moline tut, te sikljove lesoro Lafi, te slavine le zajedno avere hrišćanencar hem te vaćere averenđe so ov ćerđa će. Sa akava pomožini će te ovel tut po paše zajedništvo oleja.

E biblijakiri paramiz taro Lil e Rimljanenđe 3,21–26; 5,1–11; Jovan 3,16; Marko 16,16; Lil e Kološanenđe 1,13–14; 2. lil e Korinćanenđe 5,17–21; 1. lil e Jovanesoro 1,5–10