Vlach Western Arli: Open Bible Stories

Updated ? hours ago # views See on DCS

38. O Isus inele izdajime

Frame 38-01

Đijekh berš, o Jevreja slavinđe i Pasha. Adava slavinđa pe adalese so o Devel ikalđa lengere pradaden taro robujiba ano Egipat, savo inele angleder but berša. Sar đi ko trin berš palo adava so o Isus lelja javno te propovedini hem te sikaj, phenđa ple učenikonenđe da mangela te slavini i Pasha olencar ano Jerusalim, hem da adari ka mudaren le.

Frame 38-02

Jekh e Isusesere učenikonendar inele manuš kova vičinđa pe Juda. O Juda inele zadužime zaki blagajna e apostolengiri, ali volinđa love, i adalese but puti čorđa oti blagajna. Palo adava so o Isus hem lesere učenici resle ano Jerusalim, o Juda dželo koro e jevrejengere vođe hem phenđa lenđe da ka izdajini e Isuse te dinđe le love. Džanđa da e jevrejengere vođe na prihvatinđe adava dai o Isus Mesija hem da planirinđe te mudaren le.

Frame 38-03

E jevrejengere vođe, kolengoro glavno vođa inele o baro svešteniko, platinđe e Judase trijanda srebrna kovanice te izdajini e Isuse. Adava ulo baš ađahar sar so o proroci vaćerđe da ka ovel. O Juda pristaninđa, lelja o love hem dželo. Lelja te rodel prilika te pomožini lenđe te dolen e Isuse.

Frame 38-04

Ano Jerusalim o Isus slavinđa i Pasha ple učenikonencar. Sar xana ine e pashakoro xajba, o Isus lelja o maro hem phaglja le. Phenđa: "Len hem xan akava. Akavai mlo telo, savo dela pe tumenđe. Akava ćeren te šaj te setinen tumen mandar." Ko adava način, o Isus phenđa lenđe da lesoro telo ka ovel žrtvujime olenđe.

Frame 38-05

Tegani o Isus vazdinđa i čaša pherdi moljaja hem phenđa: "Pijen akava. Adavai mlo rat oto Nevo savez, savo čhorđola zako oprostiba e grejonengoro. Akava ćeren te šaj te setinen tumen mandar đijekh puti ked pijena la."

Frame 38-06

Tegani o Isus phenđa e učenikonenđe: "Jekh tumendar ka izdajini man." O učenici inele iznenadime hem pučle ko šaj ađahar nešto te ćerel. O Isus phenđa: "Okolese kolese ka dav o kotor e maresoro ovi izdajica." Tegani dinđa o maro e Judase.

Frame 38-07

So lelja o Juda o maro, o Sotoni đerdinđa ano leste. O Juda iklilo avri hem dželo te pomožini e jevrejengere vođenđe te dolen e Isuse. Tegani peli i rat.

Frame 38-08

Palo xajba, o Isus hem lesere učenici džele ki E maslinakiri gora. O Isus phenđa lenđe: "Sare tumen erat ka ačhaven man. Pisimei: 'Ka khuvav e pastire i sa o bakre ka našen.'"

Frame 38-09

O Petar phenđa lese: "I sare te ačhaven tut, me na ka ačhavav tut!" Tegani o Isus phenđa e Petrese: "O Sotoni mangela sarijen tumen te prelel, ali me molinđum tuće, Petre, te ačhol ti vera ana mande. A palem, erat, angleder so o bašno ka đilabi, trin puti ka xovave da na pendžareja man."

Frame 38-10

Tegani o Petar phenđa e Isusese: "Čak i te valjani te merav, niked na ka odrekninav man tutar!" Isto adava vaćerđe sa avera učenici.

Frame 38-11

Tegani o Isus dželo ple učenikonencar ko than vičime E getsimanijakiri bašta. O Isus phenđa lenđe te molinen pe te na peren ko iskušenje. Tegani o Isus dželo te molini pe korkoro.

Frame 38-12

O Isus molinđa pe trin puti: "Dade mleja, te šaj, molinava tut te na pijav akaja čaša pherdi patnjaja. Ali, te nane aver način te oprostinen pe e manušengere greja, onda nek ovel ti volja." O Isus inele but uznemirime hem lesoro znoj perela ine sar ratvale kapke. O Devel bičhalđa e anđele te hrabrini le.

Frame 38-13

Palo đijekh puti ked molinđa pe, o Isus irini pe ine koro ple učenici, ali on sovena ine. Ked irinđa pe o trito puti, o Isus phenđa lenđe: "Ušten! Mlo izdajicai akate."

Frame 38-14

O Juda alo e jevrejengere vođencar, e vojnikonencar, hem bute avere manušencar. On akharđe pumencar mačija hem kašta. O Juda alo koro Isus hem phenđa: "Zdravo, Učitelju," hem čumudinđa le. Adava inele znako e jevrejengere vođenđe te džanen kas te dolen. Tegani o Isus phenđa: "Judo, čumudipnaja li izdajineja man?"

Frame 38-15

Sar o vojnici dolena ine e Isuse, o Petar ikalđa o mači hem čhinđa e bare sveštenikosere slugasoro kan. O Isus phenđa lese: "Irin o mači ani korica! Me mle Dadestar šaj te rodav sa e vojska e anđelendar te branini man. A palem, valjani te ovav poslušno mle Dadese." Tegani o Isus sasljarđa adale manušesoro kan. Palo adava so o Isus inele dolime, sa o učenici naštine.

E biblijakiri paramiz taro Matej 26,14–56; Marko 14,10–50; Luka 22,1–53; Jovan 12,6; 18,1–11