42. O Isus irini pe ko nebo

Adava dive ked o Isus uštino taro mule, duj lesere učenici džana ine ki pašutni diz. Sar ine phirena, vaćerena ine adalestar so ulo e Isuseja. Nadisale dai ov o Mesija, ali onda o Isus inele mudardo. A akana o đuvlja phenđe dai palem dživdo. Na džanđe so te verujinen.

O Isus alo koro lende hem lelja te phirel olencar, ali on na penđarđe le. Pučlja len sostar vaćerena, i on vaćerđe lese oto sa so ulo e Isuseja nekobor dive napalal. Mislinđe da vaćerena jekhe abanđijaja kova na džanđa so ulo ano Jerusalim.

Tegani o Isus objasninđa lenđe so e Devlesoro lafi vaćeri e Mesijastar. Podsetinđa len da o proroci phenđe da o Mesija ka patini hem da ka mudaren le, ali da o trito dive ka uštel taro mule. Ked resle ani diz ani savi o duj manuša mangle te ačhoven, lelja te perel i rat.

Adala duj manuša vičinđe e Isuse te ačhol olencar, i ačhilo. Angleder so te xan, o Isus vazdinđa o maro, zahvalinđa e Devlese hem phaglja le. Otojekhvar penđarđe da adava inele o Isus. Ali, ko adava trenutko nestaninđa anglo lengere jaćha.

O duj manuša phenđe jekh averese: "Adava inele o Isus! Adalese amare vile inele tate ked objasninđa amenđe e Devlesoro lafi!" Odmah džele palal ko Jerusalim. Ked resle, phenđe e učenikonenđe: "O Isusi dživdo! Dikhljam le!"

Sar o učenici vaćerena ine, o Isus otojekhvar iklilo anglo lende ani soba hem phenđa lenđe: "Mir tumencar!" U učenici mislinđe da dikhena duho, ali o Isus phenđa lenđe: "Sose darana hem sose sumnjinena? Dikhen mle vasta hem o pre. E duhoven nane telo sar so man isi." Sar te dokažini lenđe da nane duh, rodinđa lendar nešto te xal. Dinđe le kotor oto peko maćho, a ov xalja le.

O Isus phenđa lenđe: "Phenđum tumenđe so valjani te ispunini pe sa soi pisime mandar ano e Devlesoro lafi." Tegani ćerđa len te oven sposobna te xaljoven e Devlesoro lafi. Phenđa lenđe: "Pana angleder pisimei da o Mesija ka patini, ka merel hem o trito dive ka uštel taro mule."

"Isto ađahar pisimei ano Lila da mle učenici ka vaćeren sarijenđe te pokajinen pe sar te šaj priminen oprostiba zako pumare greja. Adava ka len te ćeren ano Jerusalim, a palo adava ka džan ko sa o thana hem ka svedočinen sa e manušenđe. Tumen injen svedoci adalese.

Ano saranda dive palo adava, o Isus but puti ikljola ine anglo učenici. Jekhvar iklilo anglo više oto 500 manuša ano isto vreme! Dokažinđa ple učenikonenđe ko but načinja dai dživdo, hem sikaj len ine taro carstvo e Devlesoro.

O Isus phenđa ple učenikonenđe: "Maje dindi đijekh vlast ko nebo hem ki phuv. Adalese, džan, ćeren učenikonen oto sa o nacije ađahar so ka krstinen len ano anav e Dadesoro, e Čhavesoro hem e Svetone Duhosoro, hem sikaven len te oven poslušna ko sa so naredinđum tumenđe. Setinen tumen, me uvek ka ovav tumencar."

Saranda dive palo adava so o Isus uštino taro mule, phenđa ple učenikonenđe: "Ačhoven ano Jerusalim đikote mlo Dad na dela tumen zoralipe ked o Sveto Duho ka huljel upra tumende." Tegani o Isus dželo naupre ko nebo, a o oblako garavđa le lengere dikhibnastar. O Isus beštino e Devlese ki desno strana te vladini upro sa.

E biblijakiri paramiz taro Matej 28,16–20; Marko 16,12–20; Luka 24,13–53; Jovan 20,19–23; Ćeriba e apostolengoro 1,1–11